មនុស្សប្រុស-ស្រី ក្មេង-ចាស់៦នាក់បានស្លាប់បាត់បង់ជីវិតនៅក្នុងទឹកទន្លេសាប និង៧នាក់ទៀតរងការលង់ទឹកត្រូវបានស្រង់ចេញទាន់ពេលវេលា ហើយត្រូវបញ្ជូនទៅសង្គ្រោះនៅមន្ទីរពេទ្យ ខណៈពួកគេជិះទូកម៉ាស៊ីនតូចល្មមមួយឆ្លងកាត់ជំនន់បឹងទន្លេសាប ជួបរលកធំកាលពីវេលាម៉ោង១០និង៣០នាទីព្រឹកថ្ងៃទី១២ តុលា ២០១១ នៅភូមិព្នៅ សង្កាត់សំបួរ ក្រុងសៀមរាប ដែលគ្រោះថ្នាក់ជាយថាហេតុនេះ បង្កឱ្យមានការភ្ញាក់ផ្អើល និងអាណោចអាធ័មយ៉ាងខ្លាំង ព្រោះពួកគេជិះទូកទៅធ្វើបុណ្យបែរជាជួបគ្រោះថ្នាក់ដល់ជីវិតទៅវិញ ។
តាមងព័ត៌មានបានឱ្យដឹងថា មុនដំបូងប្រជាពលរដ្ឋក្មេង-ចាស់ ប្រុស-ស្រីបានមកជួបជុំគ្នានៅសាលាឆទានមួយ ស្ថិតក្នុងភូមិកើតហេតុខាងលើ ហើយឡើងជិះទូកម៉ាស៊ីនតូចល្មម ចេញទៅកាន់វត្តចេតិយ ដែលនៅមិនឆ្ងាយប៉ុន្មានឡើយ ប៉ុន្តែទីតាងវត្តចេតិយគឺជាទីទួល នៅរដូវវស្សានេះ ត្រូវបានជំនន់បឹងទន្លេសាបព័ទ្ធជុំវិញ មើលឃើញទឹកល្ហល្ហាចគួរសម។ ទូកម៉ាស៊ីនតូចល្មមនេះផ្ទុកមនុស្សទាំងអស់១៣នាក់ គឺចេញទៅកាន់វត្តចេតិយ ដើម្បីធ្វើបុណ្យឆ្លងវស្សា ប៉ុន្តែអកុសលដល់ពាក់កណ្តាលផ្លូវ ស្រាប់តែមានទូកធំមួយរបស់វត្តចេតិយបើកទៅទទួលមនុស្សនៅឯសាលាឆទានខាងលើ ក៏ជួបគ្នានឹងទូកតូចដែលចេញទៅ ប៉ុន្តែទូកធំដែលបើកលឿននោះបានបង្កឱ្យផ្ទៃទឹកកើតជារលកធំៗ រុញច្រានទូកតូចរហូតដល់ក្រឡាប់លិចនៅក្នុងទឹកតែម្តង...ភ្លាមៗនោះគេឃើញទូករបស់វត្តចេតិយបានត្រឡប់មកជួយសង្គ្រោះរួមជាមួយទូកអ្នកស្រុក។
ម្ចាស់ទូកតូចឈ្មោះឃន ធី អាយុ២៨ឆ្នាំ បាននិយាយឱ្យដឹងថា មូលហេតុដែលបណ្តាលឱ្យក្រឡាប់លិចនេះ គឺមកពីទូករបស់គាត់ដឹកលើសចំណុះ និងមានទូកធំរបស់វត្តចេតិយបើកបញ្ច្រាសទិសគ្នាលឿនពេក បង្កឱ្យផ្ទៃទឹកកើតមានរលកធំ ហើយបោកផ្ទប់ក្រឡាប់តែម្តង...មិនមានព្យុះភ្លៀងអ្វីទេ។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព៕
No comments:
Post a Comment
yes