នៅព្រឹកថ្ងៃទី១៤ ខែតុលា ឆ្នាំ២០១១នេះ ស្ថានទូតវៀតណាម បានបដិសេធ មិនព្រមទទួលញាត្តិ របស់សមាគមខ្មែរកម្ពុជាក្រោមជាថ្មីម្តងទៀត បន្ទាប់ពីការដាក់ញាត្តិនេះម្តងរួចមកហើយនៅថ្ងៃទី០៧ ខែតុលា ឆ្នាំ២០១១។ តាមការអោយដឹងរបស់សមត្ថកិច្ចប្រចាំការនៅស្ថានទូតវៀតណាមដែលថ្លែងប្រាប់តំណាង ០៣រូប របស់សមាគមខ្មែរកម្ពុជាក្រោម នៅព្រឹកមិញនេះថា ពួកគាត់បានទំនាក់ទំនងទៅមន្រ្តីស្ថានទូតរូចហើយ តែមន្រ្តីស្ថានទូតទាំងនោះ បដិសេធ ក្នុងការចេញមកទទួលញាត្តិនេះ។
លោក សុន សុផា ប្រធានអង្គការស្រ្តីខ្មែរកម្ពុជាក្រោម និងជាអ្នកកាន់ញាត្តិមកដាក់នៅស្ថានទូតវៀតណាមផ្ទាល់ បានអោយដឹងថា ពួកគាត់ចង់ដឹងពីមូលហេតុនៃការមិនព្រមទទួលយកញាត្តិនេះ ថាតើមកពីមូលហេតុអ្វី?។ ដោយគាត់បានអះអាងថា ប្រសិនបើស្ថានទូតនៅតែបន្តមិនព្រមទទួលញាត្តិរបស់ពួកគាត់ទេនោះ ពួកគាត់នឹងធ្វើការដឹកនាំសមាគមខ្មែរកម្ពុជាក្រោមទាំងអស់ ដើម្បីធ្វើការទំនាក់ទំនងជាមួយបណ្តាអង្គការនានា អោយជួយធ្វើអន្តរាគមន៍ក្នុងរឿងនេះ។
សូមបញ្ជាក់ថា ញាត្តិរបស់សមាគមខ្មែរកម្ពុជាក្រោម បានស្នើអោយរដ្ឋាភិបាលប្រទេសវៀតណាម តាមរយៈឯកឧត្តម ង៉ូ អាញ់ យុង ឯកអគ្គរដ្ឋទូត នៃសាធារណរដ្ឋសង្គមនិយមវៀតណាម ប្រចាំកម្ពុជា អោយចាត់វិធានការជាបន្ទាន់ទៅលើករណីមួយចំនួនទាក់ទងទៅនឹងសិទ្ធិមនុស្ស សិទ្ធិជនជាតិដើម សិទ្ធិរបស់ព្រះសង្ឃ និងប្រជារាស្ត្រខ្មែរក្រោមជាង១២លាននាក់ ដែលកំពុងរស់នៅលើទឹកដីកម្ពុជាក្រោម ដែលបច្ចុប្បន្នកំពុងមានការប្រឈមទៅនឹងការរំលោភសិទ្ធិមនុស្ស និងសិទ្ធិជនជាតិដើមយ៉ាងធ្ងន់ធ្ងរ ដូចជាស្ថាប័នព្រះពុទ្ធសាសនាខ្មែរក្រោម ត្រូវបានត្រួតត្រាដោយស្ថាប័នពុទ្ធសាសនាវៀតណាម គ្រប់វត្តអារាមនៃព្រះពុទ្ធសាសនាខ្មែរក្រោម ត្រូវបង្ខំអោយប្រើប្រាស់ត្រា ជាអក្សរវៀតណាម ការសិក្សារៀនសូត្រតាមវត្តអារាមនានាត្រូវបានហាមឃាត់មិនអោយរៀនវិញ្ញាសារផ្នែកភូមិសាស្រ្ត និងប្រវត្តិសាស្រ្ត ក្នុងនោះមានការហាមឃាត់មិនអោយមានការបង្កើតអង្គការ សមាគម ក្នុងការប្រជុំនយោបាយ និងតស៊ូមតិជាដើម។
នៅក្នុងញាត្តិនេះដដែល បានស្នើអោយរដ្ឋាភិបាល នៃសាធារណរដ្ឋសង្គមនិយមវៀតណាម មេត្តពិនិត្យ និងចាត់វិធានការជាបន្ទាន់ទៅលើករណីដូចខាងក្រោម៖
១-អនុញ្ញាត្តព្រះសង្ឃព្រះពុទ្ធសាសនាខ្មែរក្រោមបង្កើតស្ថាប័នឯករាជ្យមួយដាច់ដោយឡែករបស់ខ្លួន ដូចមុនថ្ងៃទី៣០ ខែមេសា ឆ្នាំ១៩៧៥
២-បង្កើតពុទ្ធសាសនបណ្ឌិតរងនៅខេត្តឃ្លាំងឡើងវិញ
៣-អនុញ្ញាត្តអោយព្រះសង្ឃ និងប្រជារាស្រ្តមានសិទ្ធិពេញលេញក្នុងការសិក្សារៀនសូត្រដោយសេរី
៤-គ្រប់វត្តអារាមព្រះពុទ្ធសាសនាខ្មែរក្រោមទូទាំងដែនដីកម្ពុជាក្រោម មានសិទ្ធិពេញលេញក្នុងការគ្រប់គ្រង និងថែរក្សានូវកេរ្តិ៍តំណែលវប្បធម៌របស់ខ្លួន ជាពិសេសវត្ថុបុរាណខ្មែរ ដោយមិនអនុញ្ញាត្តអោយអាជ្ញាធរវៀតណាមប្រមូលយកទៅទុកនៅកន្លែងផ្សេងឡើយ
៥-អនុញ្ញាត្តអោយប្រជារាស្រ្តខ្មែរក្រោម បង្កើតអង្គការ និងសមាគមដោយសេរី
៦-សិទ្ធិក្នុងការផ្សព្វផ្សាយព័ត៌មាន និងទទួលព័ត៌មាន
៧-អនុញ្ញាត្តអោយខ្មែរក្រោមស្តាប់បទចំរៀងខ្មែរតាមទូរសព្ទដោយសេរី
៨-បញ្ឈប់ជាបន្ទាន់នូវការរឹបអូសយកដីធ្លីប្រជារាស្រ្តខ្មែរក្រោម ទោះក្នុងរូបភាពណាក៏ដោយ
៩-បញ្ឈប់ជាបន្ទាន់ នូវរាល់ការគំរាមកំហែង បំភិតបំភ័យ បំបាក់ស្មារតីប្រជារាស្រ្តខ្មែរក្រោម៕
ពីគេហទំព័រ៖ សារព័ត៌មានសង្គម
No comments:
Post a Comment
yes