Wednesday, October 12, 2011
កម្ពុជា-ថៃ គ្រោងជួបប្រជុំពិភាក្សាជាថ្មីពីបញ្ហាយកប្រេង ឧស្ម័នក្នុងដែនសមុទ្រត្រួតស៊ីគ្នាឆាប់ៗនេះ បន្ទាប់ពីប្រទេសទាំងពីរដោះស្រាយវិបត្តិគ្រោះទឹកជំនន់
មន្ត្រីជាន់ខ្ពស់រដ្ឋាភិបាលបានប្រកាសសារជាថ្មីទៀតថា ប្រទេសកម្ពុជានឹងធ្វើការពិភាក្សាជាមួយរដ្ឋាភិបាលថៃអំពីការទាញយកផលប្រេង និងឧស្ម័ននៅតំបន់សមុទ្រត្រួតស៊ីគ្នា បន្ទាប់ពីប្រទេសទាំងពីរធ្វើការដោះស្រាយវិបត្តិទឹកជំនន់រួចរាល់នៅឆ្នាំ២០១១នេះ។
ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានអាជ្ញាធរជាតិគ្រប់គ្រងប្រេងកាតកម្ពុជាបានថ្លែងនៅក្នុងពិធីបិទសន្និសីទពាណិជ្ជកម្មវិនិយោគឆ្នាំ២០១១ បញ្ហាប្រឈមជាសាកល និងការឆ្លើយតបរបស់កម្ពុជាថា កម្ពុជា ថៃ បានត្រៀមខ្លួនជួបពិភាក្សាគ្នាជាថ្មីអំពីប្រេង ឧស្ម័ននេះរួចហើយ ប៉ុន្តែការពិភាក្សាគ្នានេះអាចនឹងរៀបចំនាពេលខ្លីខាងមុខ បន្ទាប់ពីប្រទេសទាំងពីរដោះស្រាយបញ្ហាទឹកជំនន់រួចរាល់អស់សិន។
បណ្ឌិតសភាចារ្យ សុខ អាន បានបញ្ជាក់ថា កម្ពុជាពេលនេះត្រូវការចាំបាច់ ត្រូវការចំណូលពីប្រេង ឧស្ម័ន មកជួយទ្រទ្រង់សេដ្ឋកិច្ចជាតិ ដើម្បីធ្វើការកែសម្រួលនូវហេដ្ឋារចនាសម្ព័ន្ធផ្សេងៗ ដូចជាកសាងផ្លូវ សាលារៀន មន្ទីរពេទ្យ ស្ពាន និងចំណាយផ្សេងៗទៀត ពីព្រោះប្រេងឧស្ម័ន ត្រូវតែគាំទ្រក្នុងការអភិវឌ្ឍន៍សេដ្ឋកិច្ច ដែលបានផ្ដល់ធនធានអរូបិយមួយ ទន្ទឹមនឹងនេះចំណូលពីប្រេង ឧស្ម័ននឹងអាចជួយកំណើនសេដ្ឋកិច្ចកម្ពុជានាពេលខាងមុខ។
បណ្ឌិតសភាចារ្យ សុខ អាន បន្តថា ដើម្បីឆ្លុះបញ្ចាំងពីគោលនយោបាយរបស់រដ្ឋាភិបាល និងជាអ្នកសម្រេចចិត្តទៅលើការចំណូល និងចំណាយពីប្រេងឧស្ម័ន និងមានជីវសាស្ត្រសេនាធិការមួយ ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងឯកឧត្តម គាត ឈន់ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុជាអ្នកកាន់។ ក្នុងពេលនេះកម្ពុជាបានធ្វើការទំនាក់ទំនងជាមួយក្រុមហ៊ុនមួយចំនួន ហើយទន្ទឹមនឹងនេះគឺស្ថិតនៅក្រោមទម្រង់មួយ ដែលសមស្រប ដើម្បីធានាសម្រេចឲ្យបានផលមួយដ៏ប្រសើរសម្រាប់ប្រទេសកម្ពុជា។
សូមជម្រាបថា កាលពីថ្ងៃទី១៥ ខែកញ្ញា ឆ្នាំ២០១១នេះ ក្នុងដំណើរទស្សនកិច្ចផ្លូវការមកកាន់ប្រទេសកម្ពុជារយៈពេលមួយថ្ងៃលោកស្រី យីង ឡាក់ នាយករដ្ឋមន្ត្រីថៃថ្មី បានព្រមព្រៀងគ្នាជាមួយសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថា នឹងជួបពិភាក្សាគ្នាជាថ្មីឡើងវិញ អំពីប្រេង ឧស្ម័ន បន្ទាប់ពីបានកកស្ទះនាពេលកន្លងមក បន្ទាប់ពីបានផ្លាស់ប្ដូរមេដឹកនាំរដ្ឋាភិបាលថៃ។
កាលពីពេលថ្មីៗនេះឯកឧត្តម បណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានអាជ្ញាធរជាតិគ្រប់គ្រងប្រេងកាត ឧស្ម័នកម្ពុជា មានប្រសាសន៍ថា ការអនុវត្តន៍ច្បាប់ស្ដីពីការគ្រប់គ្រងប្រេងកាតឧស្ម័នកម្ពុជាមានភាពស្មុគស្មាញ និងពិបាកក្នុងការតាក់តែង ហេតុនេះនៅមិនទាន់ដឹងថា អាចនឹងបង្កើតបាននៅមុខពេលកម្ពុជាគ្រោងទាញយកប្រេង ឧស្ម័ននៅក្នុងឆ្នាំ២០១១នេះបានឬទេជាលើកដំបូង៕
ពីគេហទំព័រ៖ វរជនខ្មែរ
Subscribe to:
Post Comments (Atom)
No comments:
Post a Comment
yes