លំនៅឋានរបស់លោកឌុច សំអាន អាយុ៥២ឆ្នាំ ដែលជាមន្ត្រីក្រុមប្រឹក្សាសង្កាត់និរោធ ស្ថិតនៅភូមិបឹងឈូក សង្កាត់និរោធ ខណ្ឌមានជ័យ បានត្រូវអគ្គិភ័យឆាបឆេះអស់ហ្មត់គ្មានសល់តែមួយប៉ប្រិចភ្នែកប៉ុណ្ណោះ កាលពីវេលាម៉ោង៧និង៣០នាទី ព្រឹកថ្ងៃទី៤ វិច្ឆិកា ឆ្នាំ២០១១។
លោកឌុច សំអាន ដែលជាម្ចាស់លំនៅឋានមានប្រសាសន៍ថា នៅព្រឹកកើតហេតុនោះរូបលោក និងកូនធំៗបានចេញទៅប្រកបការងារនៅខាងក្រៅផ្ទះទាំងអស់គ្នា នៅសល់តែជីដូនម្នាក់ចាំផ្ទះប៉ុណ្ណោះ។ ខណៈពេលកើតហេតុនោះ ជីដូន ដែលនៅចាំផ្ទះបានចេញទៅរកទិញអាហារហូបពេលព្រឹក ដូច្នេះមានន័យថា ពេលអគ្គិភ័យកើតឡើង គឺគ្មាននរណានៅផ្ទះឡើយ។ ចំពោះអគ្គិភ័យនេះ មានការសន្និដ្ឋានថា ផ្តើមឡើងពីទុស្សេចរន្តអគ្គិសនី ហើយសម្ភារទ្រព្យសម្បត្តិរួមជាមួយឯកសារផ្សេងៗ ទាំងអស់ត្រូវព្រះអគ្គីលេបត្របាក់អស់គ្មានសល់ឡើយ។
លំនៅឋានដែលរងការខូចខាតទាំាងស្រុងនេះធ្វើអំពីឥដ្ឋក្រោមប្រក់ស័ង្កសី។ មានទំហំទទឹង និងបណ្តោយជាង១០ម៉ែត្រ៤ជ្រុង។ សូមបញ្ជាក់ថា មូលហេតុដែលអណ្តាតភ្លើងឆាបឆេះលំនៅឋានខាងលើនេះរហ័ស គឺដោយសារផ្ទះបែរមុខទៅទន្លេ ស្របពេលរដូវនេះជារដូវរំហើយផង។ រីឯលំនៅឋានផ្សេងៗទៀត អណ្តាតភ្លើងមិនឆាបឆេះរាលដាលឆ្លងដល់ ដោយសារឃ្លាតឆ្ងាយពីផ្ទះដែលឆេះនោះ។ និងម្យ៉ាងទៀត ដោយសារបានរថយន្តពន្លត់អគ្គិភ័យ ដែលប្រចាំការនៅខណ្ឌមានជ័យ ចេញអន្តរាគមន៍បាញ់ពន្លត់ទាន់ពេល។
ក្នុងខណៈពេលកើតមានអគ្គិភ័យ គេឃើញមានលោកគួច ចំរើន អភិបាលខណ្ឌមានជ័យចុះភ្លាមៗ ដោយនាំយកអំណោយមនុស្សធម៌កាកបាទក្រហមទៅចែកជូនផងដែរ៕
ពីគេហទំព័រ៖ កោះសន្តិភាព
No comments:
Post a Comment
yes