ពលរដ្ឋកម្ពុជា ២៤ នាក់ ដែលជាកម្មករលើទូកនេសាទរបស់ថៃ បានវិលត្រឡប់មកដល់រាជធានីភ្នំពេញ តាមជើងយន្តហោះ កាលពីម៉ោង ១១ និង ៤០នាទី ព្រឹកថ្ងៃទី៥វិច្ឆិកា ឆ្នាំ២០១១។ បុរសកម្មករទាំងនោះ ចាញ់បោកមេខ្យល់ ទៅធ្វើការជាកម្មករនេសាទ នៅលើទូកនេសាទសមុទ្រ ក្នុងប្រទេសថៃ ហើយត្រូវចាប់ខ្លួន នៅប្រទេស Mauritius ។
លោកឧត្តមសេនីយ៍ទោ ជីវ ផល្លី អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន របស់ក្រសួងមហាផ្ទៃ ដែលបានទៅទទួលកម្មករកម្ពុជាទាំង ២៤ នាក់ នៅព្រលានយន្តហោះ បានថ្លែងទៅកាន់ក្រុមអ្នកកាសែតថា បន្ទាប់ពីទទួលទានបាយរួចហើយ កម្មករកម្ពុជា ១២ នាក់ នឹងត្រូវទៅពិនិត្យសុខភាព។ ចំណែកកម្មករ ១២ នាក់ទៀត នឹងត្រូវបញ្ជូនទៅក្រសួងមហាផ្ទៃ ដើម្បីសម្ភាស ឈានទៅដល់ការចាប់មេខ្លោង ដែលជាមេខ្យល់នាំកម្មករទាំងនោះទៅកាន់ប្រទេសថៃ យកទៅផ្តន្ទាទោសតាមច្បាប់។
ចំពោះការជួយសង្គ្រោះកម្មករកម្ពុជាទាំងនោះ បានធ្វើឡើងដោយក្រសួងការបរទេសកម្ពុជា សហការជាមួយក្រសួងមហាផ្ទៃ និងអង្គការទេសន្តប្រវេសន៍អន្តរជាតិ IOM ព្រមទាំងរដ្ឋាភិបាល Mauritius ។
ចំពោះការស្នាក់នៅបណ្តោះអាសន្ន និងថ្លៃសំបុត្រយន្តហោះ ក្នុងការបញ្ជូនកម្មករទាំងនោះ ពីប្រទេស Mauritius មកកាន់ប្រទេសកម្ពុជាវិញនៅពេលនេះ ជាបន្ទុករបស់អង្គការ IOM និងរដ្ឋាភិបាល Mauritius ។
បុរសកម្មករកម្ពុជាទាំង ២៤ នាក់នោះ មានអាយុប្រហែលជាពី ១៥ឆ្នាំ ទៅជាង ២០ឆ្នាំ។ អ្នកទាំងនោះ ភាគច្រើនមានស្រុកកំណើតនៅខេត្តឧត្តរមានជ័យ ជាប់ព្រំដែនប្រទេសថៃ។
លោក កុយ គួង អ្នកនាំពាក្យក្រសួងការបរទេស បានឲ្យដឹងថា ក្រុមកម្មករកម្ពុជាទាំង ២៤ នាក់នោះ ស្ថិតនៅលើទូកនេសាទថៃ ដែលត្រូវអាជ្ញាធរប្រទេស Mauritius ចាប់ឃាត់ កាលពីថ្ងៃទី២៨មិថុនា ឆ្នាំ២០១១ ព្រោះតែទូកនេសាទថៃនោះ បានឆ្លងដែនខុសច្បាប់ ចូលក្នុងដែនសមុទ្រប្រទេស Mauritius ។
លោក កុយ គួង បានបន្ថែមថា កម្មករទាំង ២៤ នាក់នោះ បានរងគ្រោះដោយការជួញដូរ នៅលើទូកនេសាទក្នុងប្រទេសថៃ តាមរយៈការអូសទាញពីមេខ្យល់ ដើម្បីចូលទៅរកការងារធ្វើនៅប្រទេសថៃ។ អ្នកទាំងនោះ បានធ្វើដំណើរទៅនេសាទដល់ប្រទេស Mauritius ៕
BY:CEN
No comments:
Post a Comment
yes