ហេតុការណ៍នេះកើតឡើងកាលពីវេលាម៉ោងប្រមាណជាង ៨ យប់ថ្ងៃទី៣ធ្នូ ឆ្នាំ២០១១ នៅផ្ទះសំណាក់ហ្គោលហោល២ អគារលេខ៤០៨ ផ្លូវ២៧១ ក្រុម៣ សង្កាត់ទំនប់ទឹក ខណ្ឌចំការមន។
ប៉ូលិសមូលដ្ឋានដែលសហការបង្ក្រាបករណីនេះបានឲ្យដឹងថា ម្ចាស់ករណីបានចុះបង្ក្រាបជាប៉ូលិសការិយាល័យប្រឆាំងគ្រឿងញៀនរាជធានីភ្នំពេញ រួមសហការជាមួយព្រះរាជអាជ្ញាអមសាលាដំបូងរាជធានី បានឃាត់ជនសង្ស័យម្នាក់ឈ្មោះសេង វណ្ណៈ ភេទប្រុស អាយុ ៣៣ឆ្នាំ ស្នាក់នៅមិនពិត ប្រាកដ ដកហូតថ្នាំញៀនម៉ាទឹកកក ២ កញ្ចប់ ឧបករណ៍ជក់ថ្នាំញៀនមួយចំនួន និងលុយខ្មែរ ៣៥.៥០០ រៀល រួមបញ្ជូនទៅអង្គភាពចាត់ការតាមច្បាប់។
ការបង្ក្រាបករណីគ្រឿងញៀននេះ បង្កឲ្យមានការភ្ញាក់ផ្អើលអ្នកដំណើរ និងប្រជាពលរដ្ឋរស់នៅម្តុំនោះ ដោយអ្នកខ្លះនិយាយថា “ប៉ូលិសចាប់ស្រីខូច” អ្នកខ្លះថា “ប៉ូលិសចាប់គ្រឿងញៀន”។ តាមពិតប៉ូលិសចាប់អ្នកជួញដូរគ្រឿងញៀនដកហូតថ្នាំញៀនបានត្រឹមតែ ២ កញ្ចប់ប៉ុណ្ណោះសោះ។
ជាមួយករណីបង្ក្រាបគ្រឿងញៀនដូចគ្នានេះដែរ នៅវេលាម៉ោង ១ រំលងអធ្រាត្រឈានចូលថ្ងៃទី៤ធ្នូ នៅចំណុចមុខផ្ទះលេខ៧០៤ ផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ ប៉ូលិសឃាត់ជនសង្ស័យម្នាក់ឈ្មោះណន ប៊ុនថន ភេទប្រុស អាយុ ៣៦ឆ្នាំ ជាកម្មករសំណង់ ស្នាក់នៅភូមិព្រែកតាឡុង សង្កាត់ចាក់អង្រែក្រោម ដកហូតថ្នាំញៀនម៉ាទឹកកក ១ កញ្ចប់ និងកាំបិតប៉័ងតោ១ រួចបញ្ជូនទៅខណ្ឌចាត់ការបន្ត៕
CEN
No comments:
Post a Comment
yes