រោងចក្រជីងអ៊ីង បិទទ្វារលែង ដំណើរការ ដោយមិនដឹងមូលហេតុ

ភ្នំពេញ៖ ក្រុមកម្មករោងចក្រជីងអ៊ីង ដែលមាន ទីតាំងនៅសង្កាត់ទួលសង្កែ ខណ្ឌប្ញស្សីកែវ បាននាំ​គ្នាមកតវ៉ា និងរារាំងមិនឲ្យភាគីរោងចក្រ លើករបស់របរចេញ ដោយសាររោងចក្រនេះ បិទ ទ្វារមិន​ប្រាប់ពីមូលហេតុ និងមិនបើកប្រាក់ខែ និងប្រាក់អតីតភាពផ្សេងៗដល់ក្រុមកម្មករនោះទេ។

លោក សេង សុវណ្ណារ៉ា ជាកម្មករក្នុងរោងចក្រជីងអ៊ីង បានរៀបរាប់ថា ថៅកែរោងចក្រនេះ បិទទ្វារ​ដោយមិនប្រាប់មូលហេតុពិតប្រាកដដល់ក្រុមកម្មករទេ ហើយអ្វីដែលពួកគាត់ ចង់បាននោះគឺ​ប្រាក់​ខែ និងប្រាក់ការងារផ្សេងទៀត ហើយរហូតមកទល់ពេលនេះ រោងចក្រមិនទាន់ បានបើក​ប្រាក់ឲ្យ​ពួកគេនោះឡើយ។

លោកថា កម្មករ-កម្មការិនី ដែលបម្រើការងារក្នុងរោងចក្រនេះ មានជាង២០០នាក់ ប៉ុន្តែនៅ​ព្រឹកថ្ងៃ​នេះ មានកម្មករមកតវ៉ាប្រហែលជា៦០នាក់ ដោយសារកម្មករផ្សេងទៀត ត្រូវបានថៅ​កែផ្អាក​ពីការ​ងារ «មុននឹងបិទរោងចក្រ ថៅកែមិនបានបើកប្រាក់ខែឲ្យកម្មករទេ ហើយអ្វីដែលសំខាន់នោះ រោង​ចក្រ​​បានប្រមូលឥវ៉ាន់ ចេញអស់ហើយនៅសល់តែបន្តិចប៉ុណ្ណោះ អ្នកដែលគេឲ្យឈប់ ប៉ុន្មានថ្ងៃនោះ ម៉ាស៊ីនត្រូវបានគេដឹកចេញអស់ហើយ ទុកម៉ាស៊ីនសម្រាប់ឲ្យអ្នកធ្វើការ ប្រហែលជា៦០នាក់ទេ»។

ប្រធានសហជីពសេរីកម្មករ នៃព្រះរាជាណាចក្រកម្ពុជា លោក ជា មុនី បានឲ្យដឹងថា បើក្រុមហ៊ុន​បិទទ្វារហើយ មិនបានផ្តល់ព័ត៌មានជាមុននោះ លោកនឹងជួយអន្តរាគមន៍ចំពោះបញ្ហានេះ ដោយ​ប្តឹងទៅតាមនីតីវិធីច្បាប់ ព្រមទាំងស្ថាប័នពាក់ព័ន្ធដូចជា ក្រសួងការងារ និងក្រសួងសង្គមកិច្ច។

ប្រសិនបើពុំមានដំណោះស្រាយទេ លោកនឹងជូនដំណឹងទៅរាជរដ្ឋាភិបាល ស្តីពីរោងចក្រ​សហ​គ្រាស ដែលមកវិនិយោគនៅកម្ពុជាពុំបានគោរពច្បាប់ស្តីពីការងារ «ជាទូទៅរោងចក្រស្រុកខ្មែរ បាន​បិទទ្វារ ដោយមិនមានការទូទាត់ សំណងដល់កម្មករទៅតាមផ្លូវច្បាប់ទេ បញ្ហានេះដែលយើង ឃើញ​ជារឿយៗមក»។

លោក សុវណ្ណារ៉ា ជាកម្មករក្នុងរោងចក្រជីងអ៊ីង ឱ្យដឹងបន្ថែមថា បើរោងចក្រចង់បិទទ្វារនោះ ជា​រឿងរបស់គេ ប៉ុន្តែអ្វីដែលកម្មករចង់បាននោះ គឺប្រាក់បញ្ឈប់កម្មករ មិនបានជូនដំណឹងមុន ប្រាក់​បណ្តេញចេញ ប្រាក់លើកទឹកចិត្ត ជាពិសេសប្រាក់ខែប្រចាំខែធ្នូ និងប្រាក់បំណាច់ឆ្នាំ។

អ្នកយកព័ត៌មានយើង មិនអាចទាក់ទងសុំការបំភ្លឺពីភាគី រោងចក្របានទេ នៅព្រឹកថ្ងៃទី២៩ ខែធ្នូ ឆ្នាំ២០១១នេះ៕

DAP-NEWS