ភ្នំពេញ៖ តំណាងរាស្ត្រគណបក្ស សម រង្ស៊ី ចំនួនពីររូបទៀតហើយ បានដាក់ពាក្យលាលែងពីអ្នកតំណាងរាស្ត្រ ឬសមាជិករដ្ឋសភា។ នេះបើតាមមន្ត្រីជាន់ខ្ពស់គណបក្ស សម រង្ស៊ី បានប្រាប់ នៅព្រឹកថ្ងៃទី៤ ខែកុម្ភៈ ឆ្នាំ២០១២នេះ។
មន្ត្រីជាន់ខ្ពស់បានអោយដឹងថា លោក ម៉ែន សុថាវរិន្ទ្រ អ្នកតំណាងរាស្ត្រគណបក្ស សម រង្ស៊ី មណ្ឌលកំពង់ធំ និងលោក ហូរ វ៉ាន់ អ្នកតំណាងរាស្ត្រ មណ្ឌលភ្នំពេញ បានធ្វើលិខិតលាលែង ចេញពីអ្នកតំណាងរាស្ត្រជាផ្លូវការ ដោយដាក់ទៅលោក គង់ គាំ ប្រធានស្តីទីគណបក្ស សម រង្ស៊ី កាលពីថ្ងៃទី២ ខែកុម្ភៈ ឆ្នាំ២០១២។ ការលាលែងនេះ គឺដោយសារតែអ្នកតំណាងរាស្ត្រទាំងពីររូប បានជាប់ជាសមាជិកព្រឹទ្ធសភា នីតិកាលទី៣។ ហេតុដូច្នេះ ហើយបានជាដាក់ពាក្យធ្វើការលាលែង។
មន្ត្រីដដែលបានបន្តថា តាមគម្រោងលេខរៀងបន្ទាប់លោក ម៉ែន សុថាវរិន្ទ្រ និងលោក ហូរ វ៉ាន់ ត្រូវឡើងជំនួស ដោយលោក កែត ឃី ជំនួសលោក ម៉ែន សុថាវរិន្ទ្រ និងលោក ដាំ សិទ្ធ ចាងហ្វាងកាសែត មនសិការខ្មែរ ជំនួសលោក ហូរ វ៉ាន់។
ការលាលែងរបស់អ្នកតំណាងរាស្ត្រទាំងពីររូបនេះ គឺដោយសារអ្នកទាំងពីរ បានឈរឈ្មោះជាបេក្ខជនសមាជិកព្រឹទ្ធសភានីតិកាលទី៣ ហើយដែលត្រូវបាន សមាជិកក្រុមប្រឹក្សា គណបក្ស សម រង្ស៊ី និងគណបក្សផ្សេង បានបោះឆ្នោតអោយជាប់ជាបេក្ខជនព្រឹទ្ធសភា កាលពីថ្ងៃទី២៩ ខែមករា ឆ្នាំ២០១២ ក្នុងការបោះឆ្នោតជ្រើសតាំងសមាជិកព្រឹទ្ធសភា។
លោក ហូរ វ៉ាន់ ដែលបានលាលែងពីតំណាងរាស្ត្រ បានឈរឈ្មោះជាបេក្ខជនបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣ លំដាប់ទី២ នៅភូមិភាគ១ រាជធានីភ្នំពេញ ជាលទ្ធផលបណ្តោះអាសន្នគណបក្ស សម រង្ស៊ី នៅមណ្ឌលភូមិភាគ១ ទទួលបាន ២ អាសនៈ និងលោក ម៉ែន សុថាវរិន្ទ្រ ឈរឈ្មោះលំដាប់ទី១ នៅមណ្ឌលភូមិភាគ៨ ខេត្តកំពង់ធំ ព្រះវិហារ ក្រចេះ ស្ទឹងត្រែង ស្ទឹង ត្រែង រតនគីរី និងមណ្ឌលគីរី ដោយក្នុងការបោះឆ្នោត កាលពីថ្ងៃទី២៩ ខែមករា ឆ្នាំ២០១២ ដោយលទ្ធផលបណ្តោះអាសន្នគណបក្ស សម រង្ស៊ី បានទទួល ១ អាសនៈ ( នៅភូមិភាគ៨ )។
គួរបញ្ជាក់ថា ការលាលែងពីអ្នកតំណាងរាស្ត្រគណបក្ស សម រង្ស៊ី រហូតមកដល់ពេលនេះ គឺមានចំនួន ៥ នាក់ហើយ ដោយលើកទី១ កាលពីថ្ងៃទី២១ ខែវិច្ឆិកា ឆ្នាំ២០១១ មានអ្នកតំណាងរាស្ត្រចំនួន ៣ រូប បានលាលែង។ តំណាងរាស្ត្រគណបក្សសមរង្ស៊ី ដែលលាលែងទាំងនោះ បានទៅឈរឈ្មោះ សម្រាប់ការបោះឆ្នោតព្រឹទ្ធសភា និងបានជាប់ឆ្នោត តាមរយៈការបោះឆ្នោត កាលពីថ្ងៃទី២៩ ខែមករា ឆ្នាំ២០១២៕
No comments:
Post a Comment
yes