(រូបថត ម៉ម មុនីរតន៍)
លោក សន ជ័យ អ្នកសម្របសម្រួលបណ្តាញរួបរួម គណនេយ្យភាពសង្គម ប្រចាំអាស៊ីបូព៌ា និងប៉ាស៊ីហ្វិច បានហៅការឡើងថ្លៃ រថយន្តឈ្នួល ក្នុងពេលបុណ្យចូលឆ្នាំថ្មីនេះថា ដោយសារមន្រ្តីជំនាញ និងអ្នកពាក់ព័ន្ធផ្សេងទៀត បានលាភសក្ការៈពីអ្នកធ្វើអាជីវកម្ម ឡានក្រុង និងអ្នករថយន្តតាក់ស៊ី ទើបបើកឱកាស ឲ្យអ្នកទាំងនោះដំឡើងថ្លៃស្ទើរទ្វេដង ៖ "ឬសគុលដែលសំខាន់ ដែលយើងមើលទៅថាវាអាចពាក់ព័ន្ធជាមួយនឹងអំពើពុករលួយ គឺការឃុបឃិតនៅក្នុងការតំរូវ ឬជំរុញអោយបេនឡាននិមួយៗហ្នឹងឡើងថ្លៃ នេះជាឬសគុលដ៏ធំ សំខាន់ យើងឃើញថា គឺជាការសូកប៉ាន់គគ្រឹកគគ្រេងតែម្តង ដែលនាំអោយមានឡើងថ្លៃហ្នឹង"។
ទាក់ទិនករណីនេះ កាលពីថ្ងៃទី៩ ខែមេសា ម្សិលមិញ ក្រុមអង្គការសម្ព័ន្ធភាពប្រជាពលរដ្ឋ ដើម្បីគណនេយ្យភាពសង្គមនៅកម្ពុជា ដែលមានសមាជិកចំនួន ១៣អង្គភាព បានចេញសេចក្តីប្រកាសរបស់ខ្លួន រកឃើញថា ការតំឡើងថ្លៃឈ្លួលរថយន្ត ដូចជារថយន្តតាក់ស៊ី និងរថយន្តក្រុង ជាដើមក្នុងពេលពិធីបុណ្យចូលឆ្នាំនេះ ចាត់ទុកថា គឺជាផ្នែកមួយដ៏អាក្រក់បំផុត និងស្ថិតក្នុងស្ថានភាពគ្មានរបៀបរៀបរយ ដែលមិនគួរកើតមានក្នុងប្រទេសកាន់នីតិរដ្ឋដូចកម្ពុជាឡើយ។
នៅព្រឹកថ្ងៃអង្គារនេះ VOD ពុំអាចស្នើសុំបំភ្លឺបានទេ ពីមន្រ្តីសាលារាជធានីភ្នំពេញ មួយចំនួន ជុំវិញករណីនេះ។
ក៏ប៉ុន្តែសេចក្តីជូនដំណឹងរបស់សាលារាជធានីភ្នំពេញ កាលពីថ្ងៃ២ ខែមេសា ឲ្យដឹងថា ដើម្បីសម្រួលជីវភាពពលរដ្ឋដែលកំពុងជួបផលលំបាក និងបញ្ចៀសនូវគ្រោះថ្នាក់ចរាចរបណ្តាលមកពីផ្ទុកលើសចំណុះនេះ សាលារាជធានីភ្នំពេញ បានអំពាវនាវឲ្យម្ចាស់ក្រុមហ៊ុន និងម្ចាស់រថយន្តកុំតំឡើងថ្លៃឈ្លួលរថយន្ត ក្នុងឱកាសបុណ្យជាតិធំៗ។
លោក កែម ឡី អ្នកស្រាវជ្រាវឯករាជ្យជាន់ខ្ពស់ នៃក្រុមអ្នកស្រាវជ្រាវ AIT ព្រមានថា ប្រទេសកម្ពុជានឹងក្លាយជាប្រទេសអនាធិបតេយ្យគ្រប់គ្រងលែងបាន បើសិនជាបណ្តោយឲ្យបញ្ហាកើតមានទៀតនោះ ខណៈបណ្តាប្រទេសជិតខាងកម្ពុជា រដ្ឋាភិបាលគេបញ្ចេញខ្ទង់ចំណាយ ដើម្បីទប់ស្កាត់ការឡើងថ្លៃសេវាកម្ម ក្នុងពិធីបុណ្យជាតិសំខាន់ៗ ៖ "បទបញ្ជា ឬក៏ការបញ្ជា ឬក៏ការដាក់វិធានការហ្នឹង គឺមិនមានប្រសិទ្ធិភាពគ្រប់កន្លែងតែម្តង អាហ្នឹងដែលនាំអោយស្រុកយើងហ្នឹងមានអណាធិបតេយ្យ ឥឡូវនេះវាមានអណាធិបតេយ្យហើយ ប៉ុន្តែយើងនៅអណាធិបតេយ្យយើងគ្រប់គ្រងបាន បានន័យថា យើងមានទ័ព យើងមានអីអញ្ចឹងយើងមាននគរបាល មានអីអញ្ចឹង អណាធិបតេយ្យគ្រប់គ្រងបាន ប៉ុន្តែបន្តិចទៀតទៅ ខ្ញុំបារម្ភខ្លាចមានអណាធិបតេយ្យ ដែលយើងមិនអាចគ្រប់គ្រងបាន"។
បុគ្គលិកក្រុមឡានក្រុងជាច្រើន ដែលបានទាក់ទងពួកគេ មិនបានបញ្ជាក់ពីមូលហេតុដែលខ្លួនតំឡើងថ្លៃឈ្នួលរថយន្តខុសប្រក្រតីនេះទេ។ ចំណែកក្រុមអ្នករត់តាក់ស៊ីខ្លះ បានបន្ទោសទៅលើការឡើងថ្លៃប្រេងសាំង ទើបពួកគេតំឡើងថ្លៃឈ្នួលរថយន្តនេះ។
យ៉ាងណាក៏ដោយ ក្រុមសង្គមស៊ីវិល តែងរិះគន់ថា សេចក្តីប្រកាសរបស់សាលារាជធានីភ្នំពេញ ដែលធ្វើឡើងជារៀងរាល់ឆ្នាំ គឺមានប្រសិទ្ធិភាពនោះទេ។ ក៏ប៉ុន្តែករណីនេះ កន្លងមក មន្រ្តីរដ្ឋាភិបាល ធ្លាប់បានអះអាងថា ការដែលខ្លួនមិនមានវិធានការតឹងរឹង ចំពោះការបំពានបំរាមរបស់អាជ្ញាធរនេះ ដោយសារប្រទេសកម្ពុជា ប្រកាន់គោលការណ៍សេដ្ឋកិច្ច ទីផ្សារសេរី៕
No comments:
Post a Comment
yes