ខេត្តតាកែវ ៖ គោយន្តដើរតាមចំនួន ១៦គ្រឿង ដែលមកពីបណ្តាស្រុក ភូមិជាច្រើន ក្នុងខេត្តតាកែវ បានចូលរួមក្នុងព្រឹត្តិការណ៍ប្រណាំងគោយន្តដណ្តើមពានជើងឯក កាលពីថ្ងៃទី២៤ មិថុនា នៅលើទីលានដីភក់មួយស្ថិតនៅក្នុងបរិវេណសាលាបឋមសិក្សាធ្លាប្រជុំ ភូមិរលួស ឃុំធ្លាប្រជុំ ស្រុកកោះអណ្តែត ខេត្តតាកែវ ។ នេះគឺជាព្រឹត្តិការណ៍ប្រណាំងគោយន្តដើរតាមលើកដំបូងដែលមិនធ្លាប់មានពីមុនមកនៅក្នុងប្រទេសកម្ពុជា បង្កឱ្យមានការភ្ញាក់ផ្អើលបំផុតពីសំណាក់ប្រជាពលរដ្ឋនៅក្នុងតំបន់នាំគ្នាមកចូលរួមទស្សនាយ៉ាងច្រើនកុះករ ។ព្រឹត្តិការណ៍នេះ ធ្វើឡើងចាប់ពីម៉ោង៩ព្រឹកដល់ម៉ោង៤រសៀល ហើយអ្នកឈ្នះត្រូវបានគេកំណត់យកលេខ១ ដល់លេខ៤ ។ រីឯរង្វាន់លេខ១ ទទួលបានប្រាក់ ៣២០ដុល្លារ ពានជើងឯក១ ម៉ាស៊ីនបាញ់ថ្នាំស្រូវ១ ម៉ាស៊ីនចាក់VCDផលិតនៅប្រទេសជប៉ុន១ ។ លេខ២ ទទួលបានប្រាក់២៥០ដុល្លារ មេដាយ១ ម៉ាស៊ីនបាញ់ថ្នាំស្រូវ១ និងម៉ាស៊ីនចាក់VCDផលិតនៅប្រទេសជប៉ុន១។ លេខ៣ ទទួលប្រាក់ ១០០ដុល្លារ មេដាយ១ ម៉ាស៊ីនបាញ់ថ្នាំស្រូវ១ និងម៉ាស៊ីនចាក់VCDផលិតនៅប្រទេសជប៉ុន១ និងលេខ៤ ទទួលបានប្រាក់១០០ដុល្លារ មេដាយ១ ម៉ាស៊ីនបាញ់ថ្នាំស្រូវ១ និងម៉ាស៊ីនចាក់VCDផលិតនៅប្រទេសជប៉ុន១ ។
កម្មវិធីនេះ រៀបចំឡើងដោយក្រុមហ៊ុនស្យាមគូបូតាខូភូរ៉េសិន រួមសហការជាមួយភ្នាក់ងារចែកចាយហួតពៅ ប្រចាំនៅខេត្តតាកែវ ដើម្បីលើកទឹកចិត្តដល់អតិថិជនជាប្រជាកសិករដែលនិយមទិញម៉ាស៊ីនម៉ាស៊ូតគូបូតា និងគោយន្តដើរតាមត្រាឆាងយកទៅធ្វើស្រែចម្ការចិញ្ចឹមជីវិត ។លោក Weerapong Wirabutra តំណាងក្រុមហ៊ុនស្យាមកូបូតាខូភូរ៉េសិនថ្លែងថា ក្រុមហ៊ុននឹងរៀបចំព្រឹត្តិការណ៍ប្រណាំងគោយន្តដើរតាមលើទីលានដីភក់បែបនេះនៅតាមបណ្តាខេត្តជាច្រើនទៀតនៅក្នុងប្រទេសកម្ពុជា ដើម្បីផ្តល់ឱកាសឱ្យអ្នកប្រើប្រាស់គោយន្តគូបូតាទាំងអស់មកជួបជុំគ្នាសប្បាយរីករាយក្នុងការដណ្តើមពានជើងឯក និងរង្វាន់ជាច្រើនសន្ធឹកសន្ធាប់ទៀត ដែលផ្តល់ដោយក្រុមហ៊ុនស្យាមគូបូតាខូភូរ៉េសិន និងដើម្បីណែនាំឱ្យកសិករកម្ពុជាស្គាល់ច្បាស់អំពីផលិតផលរបស់ក្រុមហ៊ុនដែលជាផលិតផលរបស់ប្រទេសជប៉ុនធន់ ស៊ីប្រេងតិច កម្លាំងខ្លាំងងាយស្រួលប្រើប្រាស់ ។ផលិតផលរបស់ក្រុមហ៊ុនទាំងអស់នោះ មានដូចជា ម៉ាស៊ីនច្រូតស្រូវ ត្រាក់ទ័រ ម៉ាស៊ីនស្ទូង ម៉ាស៊ីនភ្លើង គោយន្ត និងអេស្កាវ៉ាទ័រ ជាដើម ដែលក្រុមហ៊ុនធានាពីរឆ្នាំជួសជុលដល់ផ្ទះ ឬដល់វាលស្រែដោយឥតគិតថ្លៃ និងមានសេវាកម្មជួសជុលនៅក្រុមហ៊ុនដោយឥតគិតថ្លៃផងដែរ ៕
No comments:
Post a Comment
yes