ដោយ សុខ សេរី
សម្ដេចក្រុមព្រះ នរោត្តម រណឫទ្ធិ នៅថ្ងៃទី២៦ ខែមិថុនា ឆ្នាំ២០១២ បានជួបសំណេះសំណាលជាមួយសមាជិកបក្ស នៃក្រុមប្រឹក្សាស្រុក និងសមាជិកនៃក្រុមប្រឹក្សាខេត្ត នៅឯទីស្នាក់ការគណបក្ស នរោត្តម រណឫទ្ធិ នៅខណ្ឌទួលគោក រាជធានីភ្នំពេញ។
សម្ដេចក្រុមព្រះ នរោត្តម រណឫទ្ធិ ប្រធានគណបក្ស នរោត្តម រណឫទ្ធិ ជួបសំណេះសំណាលជាមួយសកម្មជន និងជំទប់ឃុំ ដែលជាប់ឆ្នោតថ្មី នាទីស្នាក់ការបក្សខណ្ឌទួលគោក កាលពីថ្ងៃទី២៦ ខែមិថុនា ឆ្នាំ២០១២។
ស្របពេលនេះដែរ ព្រះអង្គក៏បានជួបសំណេះសំណាលជាមួយជំទប់ទី២ របស់គណបក្ស នរោត្តម រណឫទ្ធិ ដែលបានជាប់ឆ្នោតក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៣ កាលថ្ងៃទី៣ ខែមិថុនា ឆ្នាំ២០១២ កន្លងទៅនេះ។
សម្ដេចក្រុមព្រះ នរោត្តម រណឫទ្ធិ ប្រធានគណបក្ស នរោត្តម រណឫទ្ធិ នៅថ្ងៃទី២៦ ខែមិថុនា ឆ្នាំ២០១២ បានប្រកាសថា ព្រះអង្គគ្រោងវិលត្រឡប់ទៅដឹកនាំគណបក្ស ហ៊្វុនស៊ិនប៉ិច (Funcinpec) វិញ នៅមុនបោះឆ្នោតជាតិឆ្នាំ២០១៣ ដោយគ្មានវត្តមានរបស់អគ្គលេខាធិការគណបក្ស ហ៊្វុនស៊ិនប៉ិច លោក ញឹក ប៊ុនឆៃ។
ដើម្បីសម្រេចផែនការនេះ សម្ដេចក្រុមព្រះ នរោត្តម រណឫទ្ធិ គ្រោងជួបជាមួយលោកនាយករដ្ឋមន្ត្រី ហ៊ុន សែន និងជាអនុប្រធានគណបក្សប្រជាជនកម្ពុជា ដែលជាគណបក្សដ៏រឹងមាំ និងកាន់អំណាច ដើម្បីពិភាក្សារឿងនេះ។
សម្ដេចក្រុមព្រះ នរោត្តម រណឫទ្ធិ បានមានបន្ទូលប្រាប់អ្នកកាសែតថា មានមន្ត្រីជាន់ខ្ពស់មួយចំនួននៅគណបក្ស ហ៊្វុនស៊ិនប៉ិច ត្រៀមដើរចេញពីគណបក្សនេះ ដើម្បីទុកឲ្យព្រះអង្គចូលដឹកនាំគណបក្ស ហ៊្វុនស៊ិនប៉ិច៖ «យើងពុំអាចវិលត្រឡប់ទៅរក ហ៊្វុនស៊ិនប៉ិច រុងរឿងថ្កុំថ្កើងបានទេ ល្គឹកណាមានលោក ញឹក ប៊ុនឆៃ ជាប្រធាននៃគណបក្សនេះ។ ខ្ញុំដកឧទាហរណ៍មួយទៀត ការចុះហត្ថលេខាគណបក្ស ហ៊្វុនស៊ិនប៉ិច គ្រាន់តែតំណាងខាងលោក កែវ ពុទ្ធរស្មី ហ្នឹង ក៏គ្មានផង ដូចជាគណបក្សបែកបាក់គ្នា។ ម្ល៉េះហើយ ខ្ញុំយល់ថា ខ្ញុំចង់ណាស់ ចង់វិលត្រឡប់ទៅដឹកនាំគណបក្ស ហ៊្វុនស៊ិនប៉ិច របស់សម្ដេចតា សម្ដេចតាទួតឡើងវិញ។ ចង់ប្រមែប្រមូលអ្នករាជានិយម»។
ព្រះអង្គក៏បានបញ្ជាក់ថា ព្រះអង្គនៅតែបន្តសម្ព័ន្ធភាព រវាងគណបក្ស ហ៊្វុនស៊ិនប៉ិច និងគណបក្សប្រជាជនកម្ពុជា នៅក្នុងរដ្ឋាភិបាលចម្រុះ។
ផ្ទុយពីការអះអាងនេះ អគ្គលេខាធិការគណបក្ស ហ៊្វុនស៊ិនប៉ិច លោក ញឹក ប៊ុនឆៃ បានមានប្រសាសន៍ថា សម្ដេចក្រុមព្រះ នរោត្តម រណឫទ្ធិ កំពុងតែយល់សប្តហើយ៖ «រកគ្រប់វិធី ដើម្បីកំចាត់ ដើម្បីឲ្យខ្ញុំចេញពីគណបក្សហ្នឹងយូរហើយ មិនមែនទើបឥឡូវទេ តាំងពីយូរណាស់មកហើយ។ ប៉ុន្តែមិនអាចទៅរួច ដោយសារអ្វីដែលខ្ញុំមាន គឺអំពើល្អ ដែលខ្ញុំបានធ្វើ ទី២ សមាជិកសមាជិកាអ្នកគាំទ្រច្រើនលើសលប់ណាស់ ដែលទាក់ទិននៅមូលដ្ឋាន ជាអតីតអ្នកតស៊ូ តែងតែផ្តល់យុត្តិធម៌ឲ្យខ្ញុំ គឺគេជួយគាំទ្រខ្ញុំ»។
អ្នកវិភាគឯករាជ្យ លោកបណ្ឌិត សុខ ទូច បានមានប្រសាសន៍ថា នយោបាយបង្រួបបង្រួម គឺត្រូវការរួបរួមគ្នា គឺមិនមែនកំចាត់គ្នានោះទេ៖ «មកកាន់ ហ៊្វុនស៊ិនប៉ិច វិញ វាទាល់តែធ្វើរដ្ឋប្រហារមួយសារទៀត នៃគណបក្ស ហ៊្វុនស៊ិនប៉ិច ហ្នឹង។ រដ្ឋប្រហារបានន័យថា សមាជិកទាំងអស់លែងគាំទ្រអគ្គលេខាធិការ ហើយដើរចូលសម្ដេចក្រុមព្រះ អាហ្នឹងបានទៅរួច។ តែបើសិនជាសមាជិកទាំងអស់ នៅមានការគាំទ្រពីរាជរដ្ឋាភិបាល ផ្តល់តំណែងឲ្យតិចតួច។ យើងដឹងហើយថា ហ៊្វុនស៊ិនប៉ិច បែកបាក់ កើតចេញមកពីផលប្រយោជន៍ពីរ ទី១ អំណាច ទី២ ផលប្រយោជន៍»។
ការប្រកាសជាចំហ ដោយសម្ដេចក្រុមព្រះ នរោត្តម រណឫទ្ធិ នៅពេលនេះ គឺនៅគ្រាដែលកិច្ចព្រមព្រៀងបង្រួបបង្រួម រវាងគណបក្ស នរោត្តម រណឫទ្ធិ និងគណបក្ស ហ៊្វុនស៊ិនប៉ិច បានចុះហត្ថលេខារួបរួមគ្នា កាលពីថ្ងៃទី២៤ ខែឧសភា ឆ្នាំ២០១២ កន្លងទៅនេះ នៅឯវិមានសន្តិភាព បានឈានដល់ការបែកបាក់គ្នា៕
No comments:
Post a Comment
yes