សៀមរាប: បន្ទាប់ពីជំនួបជាមួយលោកស្រី យីងឡាក់ ស៊ីណាវ៉ាត្រា នាយករដ្ឋមន្ត្រីថៃ នាល្ងាចថ្ងៃទី១៣ ខៃកក្កដា ឆ្នាំ២០១២ នៅសណ្ឋាគារសុខារួចមក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏បានទទួលជួបពិភាក្សាការងារទ្វេភាគីជាមួយលោក ធេន សេន ប្រធានាធិបតីនៃសាធារណរដ្ឋសហភាព មីយ៉ាន់ម៉ា ជាបន្ត។
នៅក្នុងជំនួបនោះ ប្រមុខរដ្ឋាភិបាលទាំងពីរ បានយល់ស្របគ្នាថា បញ្ហាសហភាពមីយ៉ាន់ម៉ា លែងជាបញ្ហាឈឺក្បាលសម្រាប់អាស៊ានទៀតហើយ។
បន្ទាប់ពីជំនួបនោះ លោក ស្រ៊ី ថាមរ៉ុង្គ រដ្ឋមន្ត្រីប្រតិភូអមនាយករដ្ឋមន្ត្រី បានថ្លែងប្រាប់អ្នកកាសែតថា នៅក្នុងជំនួបនោះ សម្តេចបានមានប្រសាសន៍ថា វត្តមានរបស់លោក ធេន សេន មកកាន់ប្រទេសកម្ពុជានៅពេលនេះ យើងគួរតែអរគុណ ចំពោះលោកស្រី ហ៊ីលឡារី គ្លីនតុន រដ្ឋមន្ត្រីក្រសួងការបរទេសអាមេរិក ដែលបានអញ្ជើញលោកប្រធានាធិបតីមកកាន់ប្រទេសកម្ពុជា ហើយបានផ្តល់ឱកាសឲ្យប្រធានាធិបតី បានជួបគ្នាជាមួយសម្តេចនាពេលនេះ។
ជាកិច្ចឆ្លើយតប លោកប្រធានាធិបតី ធេន សេន បានមានប្រសាសន៍ថា នេះគឺកិត្តិយសដ៏ខ្ពង់ខ្ពស់ ដែលបានជួបសម្តេចសាជាថ្មីជាលើកទី២ តាំងពីកិច្ចប្រជុំកំពូលអាស៊ាន កាលពីខែមេសាកន្លងមក។
ក្នុងនោះដែរ លោក ធេន សេន បានសម្ដែងនូវការអរគុណចំពោះកម្ពុជា ដែលក្នុងកិច្ចប្រជុំអាស៊ានកន្លងមកនេះ បានអំពាវនាវទៅដល់ការលុបចោលនូវទណ្ឌកម្មលើសហភាពមីយ៉ាន់ម៉ា ហើយអាស៊ានក៏លែងមានបញ្ហាឈឺក្បាល ដោយសារមីយ៉ាន់ម៉ាទៀតហើយ។
ជាមួយនោះ លោក ធេន សេន បានជម្រាបជូនសម្តេចអំពីការរីកចម្រើននៅមីយ៉ាន់ម៉ា បន្ទាប់ពីលោកស្រី គ្លីនតុន បានធ្វើទស្សនកិច្ចកាលពីចុងឆ្នាំទៅ ហើយបន្ទាប់មកគឺមានការតែងតាំងឯកអគ្គរដ្ឋទូតអាមេរិកប្រចាំនៅសហភាពមីយ៉ាន់ម៉ា ក្រោយពីអវត្តមានជាច្រើនឆ្នាំមកហើយ។ ក្រោយពីទស្សនកិច្ចរបស់ប្រមុខការទូតអាមេរិកនោះមក ក៏មានការជឿនលឿនលើការដកទណ្ឌកម្មពីមីយ៉ាន់ម៉ា។ ថ្មីៗនេះ ប្រធានាធិបតី មីយ៉ាន់ម៉ា ក៏បានចុះហត្ថលេខាលើក្រឹត្យលើកលែងទណ្ឌកម្មនេះ ដែលនាំឲ្យអ្នកវិនិយោគទុនអាមេរិក អាចមកធ្វើការវិនិយោគនៅក្នុងសហភាពមីយ៉ាន់ម៉ាបាន។
ចំណែកឯមីយ៉ាន់ម៉ាវិញ ក៏ខិតខំមានវិធានការមួយចំនួនធ្វើការកែទម្រង់ទាំងខាងនយោបាយរបស់ខ្លួន ដែលមានការបោះឆ្នោត ហើយលោកស្រី អ៊ុង សានស៊ូជី បានក្លាយទៅជាសមាជិកសភាមួយនៅក្នុងសភាមីយ៉ាន់ម៉ា។
សម្តេចតេជោនាយករដ្ឋមន្ត្រី បានឯកភាពទៅលើការវិវត្តន៍រីកចម្រើនរបស់មីយ៉ាន់ម៉ា និងជាការពិតបញ្ហាមីយ៉ាន់ម៉ា វាលែងឈឺក្បាលដល់អាស៊ានទៀត ប៉ុន្តែយើងនៅមានកិច្ចការជាច្រើនទៀត ដែលត្រូវបន្តរួមគ្នាដោះស្រាយ ដូចជាបញ្ហានៅឈូងសមុទ្រចិនខាងត្បូង បញ្ហានៅឧបទ្វីបកូរ៉េ និងបញ្ហាដទៃទៀត ដែលជាផលប្រយោជន៍សម្រាប់តំបន់ទាំងមូល។
គួរបញ្ជាក់ថា លោក ធេន សេន ត្រូវបានទទួលការអញ្ជើញពីលោកស្រី ហ៊ីលឡារី គ្លីនតុន រដ្ឋមន្ត្រីការបរទេសអាមេរិក ដើម្បីចូលរួមនៅក្នុងវេទិកាធុរកិច្ច អាមេរិក-អាស៊ាន នៅទីរួមខេត្តសៀមរាប នាព្រលប់ថ្ងៃទី១៣កក្កដា ឆ្នាំ២០១២៕
No comments:
Post a Comment
yes