Popzone Asia សូមធ្វើការបកប្រែមិនផ្លូវការអំពីសន្ទរកថារបស់ឯកឧត្ដមបណ្ឌិត ជា ចំរើន ស្ថាបនិកនៃ សកលវិទ្យាល័យ ចំរើនពហុបច្ចេកវិទ្យា និងជាទីប្រឹក្សាសម្ដេចអគ្គមហាពញាចក្រី ហេង សំរិន នៅក្នុង កម្មវិធីប្រគល់ពានរង្វាន់ការអប់រំនៃភាពជាអ្នកដឹកនាំ (The Educational Leadership Award) នាថ្ងៃទី១៩ ខែកក្កដា ឆ្នាំ២០១២ នៅប្រទេសសិង្ហបុរី។
ជាកិច្ចចាប់ផ្ដើមឯកឧត្ដមបណ្ឌិត ជា ចំរើន បានមានប្រសាសន៍ថាថ្ងៃនេះគឺជាថ្ងៃដ៏រីករាយបំផុតសម្រាប់រូបឯកឧត្ដម ភរិយា និងកូនៗរបស់ឯកឧត្តម ព្រមទាំងក្រុមការងាររបស់ឯកឧត្ដមផ្ទាល់ដែលបានចូលរួមក្នុងកម្មវិធីប្រគល់រង្វាន់របស់ Asia’s Best B-school Award ដែលបានរៀបចំឡើងដោយសភាអប់រំពិភពលោក (World Education Congress), CMO Asia និង CMO Council។
ឯកឧត្ដមបានបន្ថែមទៀតថាពានរង្វាន់ “អប់រំនៃភាពជាអ្នកដឹកនាំ” (The Educational Leadership Award) នេះ គឺមិនមែនសម្រាប់តែឯកឧត្ដមមួយរូបនោះទេ ប៉ុន្តែវាគឺសម្រាប់បងប្អូនប្រជាពលរដ្ឋខ្មែរទាំង អស់គ្នា ជាពិសេសនោះគឺសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណា ចក្រកម្ពុជាដែលសម្ដេច តែងតែធ្វើការគាំទ្រ និងជ្រោមជ្រែងឯកឧត្ដមនៅក្នុងកិច្ចការអភិវឌ្ឍន៍ធនធាន មនុស្ស និងកសាងសមត្ថភាពរបស់ប្រជាពលរដ្ឋខ្មែរ ដោយតាមរយៈការបង្កើតអង្គការអភិវឌ្ឍយុវជនខ្មែរសកលវិទ្យាល័យចំរើនពហុបច្ចេកវិទ្យា មជ្ឈមណ្ឌលព័ត៌មានខ្មែរ វិទ្យាសាស្រ្ត និងវិទ្យាស្ថានកម្ពុជាដើម្បីអភិវឌ្ឍ និងសិទ្ធិមនុស្ស។
ជាមួយគ្នានោះឯកឧត្ដមក៏បានមានប្រសាសន៍ឲ្យដឹងថាបើយើងក្រលេកមើលប្រវត្តិសាស្រ្តខ្មែរ ប្រទេស កម្ពុជា បានរួចផុតពីរបបប្រល័យពូជសាសន៍ប៉ុលពត ដែលរបបនេះបានធ្វើឲ្យឯកឧត្តមក្លាយជាក្មេងកំព្រា ហើយនៅកំលុងទសវត្សឆ្នាំ ១៩៨០ ឯកឧត្តមត្រូវបានគេជម្លៀសទៅកាន់ជំរុំជនភៀសខ្លួនសាយធូនៅព្រំដែនថៃ។ ឯកឧត្ដម បានធ្វើមាតុភូមិនិវត្តន៍មកវិញនៅឆ្នាំ ១៩៩៣។ កាលពីនៅជំរុំឯកឧត្ដមត្រូវបានចូលរៀន និងបង្រៀនមុខវិជ្ជា គិណិតវិទ្យា ដល់ក្មេងៗ និងយុវជនជាច្រើន។
ឯកឧត្ដមគឺ ជាបុគ្គលដែលមានចំណេះដឹងខ្ពង់ខ្ពស់ហើយ ឯកឧត្តម ក៏បានធ្វើការចែករំលែក ចំណេះដឹង ទៅដល់អ្នកដែលមានចំណេះដឹងតិចតួច និងអ្នកដែលមិនចេះអ្វីទាំងអស់តាមរយៈការបង្រៀនរបស់ឯកឧត្តម។ ដោយការឆ្លងកាត់នូវពេលវេលាដ៏ជូរចត់នាពេលកន្លងមកធ្វើឲ្យឯកឧត្ដមកំណត់នូវទស្សនៈផ្ទាល់ខ្លួនមួយថា “ស្នាម ញញឹម នាពេលចុងក្រោយគឺ មានន័យជាងការ សើចនាពេលដំបូង ” ដែលមានន័យ ថាការឆ្លងកាត់នូវឧបសគ្គ នានា ជាជំហានឈានទៅរកភាពត្រចះត្រចង់នាពេលអនាគត។ អនាគតដ៏ ត្រចះត្រចង់នោះ គឺជាការខិតខំប្រឹងប្រែង រៀនសូត្រដោយខ្លួនឯកឧត្តមផ្ទាល់ នៅឯសាលារៀន ពីក្រុមគ្រួសារ អង្គការនានា ក៏ដូចជាពីសង្គមទាំងមូលដើម្បីអោយឯកឧត្ដមចេះតែមានការរីកចំរើន។ ហើយថ្ងៃ នេះគឺជាលទ្ធផលដែលឯកឧត្តម បានទទួលស្គាល់អំពីសភាអប់រំពិភពលោក CMO Asia និង CMO Council ព្រមទាំងបានផ្ដល់នូវចំណេះដឹងជាសកលលោកចំពោះឯកឧត្តម។
ឯកឧត្តម បានមានប្រសាសន៍ទៀតថា ដើម្បីធ្វើការអភិវឌ្ឍន៍សម្ថភាពផ្ទាល់ខ្លួន ឯកឧត្តមបានខិតខំប្រឹងប្រែងក្នុងការពង្រីកនូវចំណេះដឹងផ្ទាល់ខ្លួន ដើម្បីធ្វើការអភិវឌ្ឍន៍លើគ្រប់អង្គភាព និងសង្គមទាំងមូល។
ជាចុងបញ្ចប់ឯកឧត្តមបានសម្ដែងនូវភាពសោមនស្សរីករាយជាខ្លាំង ដែលសភាអប់រំពិភពលោក (World Education Congress), CMO Asia និងCMO Council បានប្រគល់ពានរង្វាន់ “អប់រំនៃភាពជាអ្នកដឹកនាំ”ចំពោះរូបឯកឧត្តម ហើយឯកឧត្តមក៏បានបញ្ជាក់ម្ដងទៀតដែរថាពានរង្វាន់នេះមិនមែនសម្រាប់តែ ឯកឧត្តមម្នាក់នោះទេ តែគឺសម្រាប់ប្រជាពលរដ្ឋកម្ពុជាគ្រប់រូប និងជាពិសេសគឺសម្ដេចអគ្គមហាសេនាបតីតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។
Popzone Asia សូមធ្វើការថ្លែងអំណរគុណចំពោះប្រសាសន៍ដ៏មានតម្លៃរបស់ឯកឧត្តមបណ្ឌិត ជា ចំរើន និង សូមជូនពរ ឯកឧត្តម និងក្រុមគ្រួសារឲ្យជួបតែពុទ្ធពរទាំង៤ប្រការគឺអាយុ វណ្ណៈ សុខៈ ពលៈ កុំបី ឃ្លៀងឃ្លាតឡើយ។Popzone Asia សង្ឃឹមថាយុវជនកម្ពុជានឹងចាត់ទុកឯកឧត្តមជាគំរូដ៏ត្រចះត្រចង់ និង រួបរួមគ្នាក្នុងការអភិវឌ្ឍប្រទេសជាតិយើងទាំងមូល។
No comments:
Post a Comment
yes