ឧត្តរមានជ័យ ៖ តាមប្រភពរាយការណ៍ពីស្រុកត្រពាំងប្រាសាទឲ្យដឹងថា រៀងរាល់ថ្ងៃគេសង្កេតឃើញមានប្រជាពលរដ្ឋជាច្រើន បានឡើងភ្នំអូសឈើគ្រញូង តាមរយៈមេឈ្មួញដែលប្រមូលទិញឈើគ្រញូងដែលឈរជើងនៅតាមច្រកនីមួយៗដូចជា ចំបក់កោងជប់រុន ត្រពាំងបី អន្ទង់អាំង ប្រទាលជ្រុំ ដែលស្ថិតនៅក្នុង ភូមិសាស្ត្រឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ។ រីឯអស់លោកសមត្ថកិច្ចគ្រប់ស្ថាប័នដែលមានតួនាទីជាអ្នកបង្ក្រាបបទល្មើសព្រៃឈើ បានត្រឹមតែប្រមូលផ្តុំគ្នាត្រង់ចំណុចស្នាក់ការអង្គការការពារបរិស្ថាននិងពលរដ្ឋកម្ពុជា ចាំប្រមូលតែផលប្រយោជន៍ប៉ុណ្ណោះ។
ប្រភពខាងលើបានបន្តទៀតថា សមត្ថកិច្ចដែលមកប្រមួលផ្តុំគ្នានៅចំណុចខាងលើនេះមិនមែនមកបង្ក្រាបបទល្មើសទេ គឺនាំគ្នាមករាប់ក្បាលឡានយកលុយពីក្រុមឈ្មួញព្រោះពួកគេស្គាល់ឈ្មោះមេឈ្មួញដឹកឈើគ្រញូងទាំងអស់នោះហើយ។ ប្រភពបានបន្តទៀតថា រៀងរាល់យប់ប្រជាពលរដ្ឋនៅតាមដងផ្លូវមានការព្រួយបារម្ភ ចំពោះបញ្ហារថយន្តដឹកឈើគ្រញូងដែលមានល្បឿន លឿនបើកបរយ៉ាងអនាធិបតេយ្យ លើដងផ្លូវលេខ៦៦ត្រង់ចំណុចរង្វង់មូលត្រពាំងប្រាសាទទៅស្រុកស្វាយលើ ខេត្តសៀមរាបដែលអាចបង្កឲ្យមានគ្រោះថ្នាក់ជាយថាហេតុ។
លោក វណ្ណ កុសល អភិបាលស្រុកត្រពាំងប្រាសាទបានប្រាប់ឲ្យដឹងថា លោកតែងតែរំលឹកដល់ស្ថាប័នសមត្ថកិច្ចពាក់ព័ន្ធទាំងអស់ ក្នុងស្រុកត្រពាំងប្រាសាទឲ្យជួយសហការជាមួយអាជ្ញាធរស្រុកបង្ក្រាបបទល្មើសគ្រប់ប្រភេទ ដែលធ្វើចរាចរណ៍នៅឆ្លងកាត់ស្រុកនេះ។ លោកបានបន្តទៀតថា ជាពិសេសសមត្ថកិច្ចពាក់ព័ន្ធទាំងអស់ត្រូវជួយទប់ស្កាត់ប្រជាពលរដ្ឋដែលមានមេឈ្មួញនៅពីក្រោយជួយឧបត្ថម្ភស្បៀងឲ្យពួកគាត់ ឡើងភ្នំឆ្លងដែនទៅកាប់ឈើគ្រញូងនឹងអូសឈើគ្រញូងនៅក្នុងទឹកដីថៃ យកមកលក់ឲ្យឈ្មួញទាំងនោះហើយលោកអភិបាលស្រុកមានការព្រួយបារម្ភពីបញ្ហាសុវត្ថិភាពប្រជាពលរដ្ឋទាំងនោះ ព្រោះចៃដន្យចំពេលទាហានសៀមដើរល្បាតជួបអាចបាញ់សម្លាប់ពួកគាត់គ្រប់ពេលវេលា ។
ជាក់ស្តែងកាលពីថ្ងៃទី២៨ ខែសីហា ឆ្នាំ២០១២នេះ គេសង្កេតឃើញមានប្រជាពលរដ្ឋក្មេងចាស់ ជាច្រើននាក់បានឡើងភ្នំឆ្លងដែនចូលទៅកាប់ឈើ និងអូសឈើគ្មានសមត្ថកិច្ចណាមួយទប់ ស្កាត់ឡើយមានតែចាំយកលុយពីប្រជាពលរដ្ឋនិងរថយន្តដឹកឈើគ្រញូងតែប៉ុណ្ណោះ។ សមត្ថកិច្ចទាំងនោះហាក់បីដូចជាមិនគោរពតាមអនុសាសន៍របស់សម្តេចតេជោ ហ៊ុន សែន ដែលតែងតែដាក់បទបញ្ជាឲ្យសមត្ថកិច្ចពាក់ព័ន្ធទាំងអស់ជួយទប់ស្កាត់កុំឲ្យប្រជាពលរដ្ឋឡើងភ្នំកាប់ឈើនិងបទល្មើសផ្សេងៗនៅក្នុងភូមិសាស្ត្រគ្រប់គ្រងរបស់ខ្លួន។ សូមបញ្ជាក់ថា មានសមត្ថកិច្ចមួយចំនួនក្នុងស្រុកត្រពាំងប្រាសាទ បានជេប្រមាថរកវាយតប់ អ្នកកាសែតបន្ទាប់ពីមានការចុះផ្សាយរឿងអាស្រូវមួយចំនួនព្រោះបុគ្គលទាំងនោះខ្លាចខូចប្រយោជន៍របស់ខ្លួន៕
No comments:
Post a Comment
yes