ឥណ្ឌូនេស៊ីចាប់ខ្លួនជនជាតិវៀតណាម លួចឈើប្រណិត

ប្រភពព័ត៌មានពីគេហទំព័រ BBC ចុះផ្សាយកាលពីថ្ងៃទី២៨ ខែសីហា កន្លងទៅនេះ បានឲ្យដឹងថា ប៉ុលីសឥណ្ឌូនេស៊ីទើបតែបាន ចាប់ឃុំខ្លួនជនជាតិវៀតណាមចំនួន ២១ នាក់ ដោយសង្ស័យ ពីបទ លួចឈើក្នុង​ព្រៃហាមឃាត់ នៅខេត្ត Aceh ។

វរៈសេនីយ៍ទោ Trisno Rianto ជាមេប៉ុលីសប្រចាំមូលដ្ឋាន បាន មានប្រសាសន៍ថា ជនទាំងនេះ​ត្រូវបានរកឃើញក្នុងពេល ដែលកំ ពុង ធ្វើដំណើរចាកចេញពីព្រៃនៅ Aceh កាលពីថ្ងៃទី២៦ ខែសីហា។ ពួកគេបានដឹកខ្លឹមចន្ទពេញមួយរទេះ។ 

តាមប្រសាសន៍លោក Rianto ជន៦នាក់ក្នុងចំណោមនោះត្រូវបានឃុំឃាំងដោយចោទពីបទ​លួចកាប់ឈើ ក្នុងខណៈជន១៥នាក់ផ្សេងទៀត ត្រូវបានបញ្ជូនទៅស្ថាប័នអន្តោប្រវេសន៍ ពីព្រោះហួស​ទិដ្ឋាការចូលមក ទេសចរណ៍ នៅក្នុងប្រទេសឥណ្ដូនេស៊ី។

បើទោះបីជាពលរដ្ឋវៀតណាម ក៏ដូចជាពលរដ្ឋនៃប្រទេសអាស៊ានផ្សេងទៀត មិនចាំបាច់សុំ​ទិដ្ឋាការចូល ប្រទេសឥណ្ឌូនេស៊ីក៏ដោយ តែអាចមានសិទ្ធិចូល ក្នុងប្រទេសនេះបានត្រឹមតែរយៈពេល ​៣០ ថ្ងៃប៉ុណ្ណោះ។

ប៉ុលីសខេត្ត Aceh បានមានប្រសាសន៍ទៀតថា បណ្ដាជនជាតិវៀតណាម ដែលត្រូវបានចាប់​ខ្លួន ពួកគេបាន លួចកាប់ដើមខ្លឹមចន្ទ នៅទីនេះតាំងពីខែមុនមកម្លេះ។ ខ្លឹមចន្ទគឺជាប្រភេទឈើប្រណិតដ៏កម្រ ត្រូវបានប្រើប្រាស់ ផលិតជាទឹកអប់ និងគ្រឿងក្រអូប។ នេះជាលើកទីមួយដែលប៉ុលីសឥណ្ឌូនេស៊ី បានចាប់ខ្លួនជនជាតិវៀតណាម យ៉ាងច្រើននាក់ ពី​បទលួចឈើ ប្រណិត។

កន្លងមកជនជាតិវៀតណាម ត្រូវបានចាប់ខ្លួនជាច្រើននាក់ណាស់ដែរ ដោយចោទពីបទចូល​នេសាទត្រី និង ជលផល ផ្សេងទៀតដោយខុសច្បាប់ក្នុងផ្ទៃសមុទ្រឥណ្ឌូនេស៊ី និងមានអ្នក ដែលត្រូវជាប់គុក ជាច្រើនឆ្នាំផង។

កាលពីឆ្នាំ២០០៩ ប៉ុលីសខេត្តនៃកោះ Riau របស់ឥណ្ឌូនស៊ីក៏បានប្រមូលរក្សាទុកជនជាតិ​វៀតណាមរាប់សិប នាក់ ពីបទរុករកផ្កាថ្មខ្មៅនៅក្នុងសមុទ្រឥណ្ឌូនេស៊ី ៕a