គង់ គាំ៖ បើពុំមានការចូលរួមរបស់គណបក្ស សង្គ្រោះជាតិ និងពុំមានការចូលរួមរបស់លោក សម រង្ស៊ី នៅក្នុងការបោះឆ្នោតខាងមុខ នោះការបោះឆ្នោតនិងគ្មានន័យឡើយ

លោក គង់ គាំ ប្រធានស្តីទីគណបក្ស សម រង្ស៊ី

បន្ទាប់ពីទទួលរងនូវព្យុះភ្លៀងអស់ជាច្រើនដំណាក់កាលរួចមក ឥឡូវនេះព្រះអាទិត្យថ្មីចាប់ផ្តើម​រះលើផែនដីចាស់ហើយ នោះគឺការដំណើរការផ្លូវការរបស់គណបក្ស សង្គ្រោះជាតិ ដែលជាការ ទន្ទឹងរងចាំជាយូរមកហើយរបស់ប្រជាពលរដ្ឋខ្មែរដែលជាអ្នកស្នេហាជាតិ និងអ្នកស្រលាញ់នូវ របបប្រជាធិបតេយ្យ ។

ការចាប់បដិសន្ធិឡើងរបស់គណបក្ស សង្គ្រោះជាតិ គឺជាការខិតខំប្រឹងប្រែងតស៊ូយ៉ាងលំ​បាក​របស់ប្រជាពលរដ្ឋខ្មែរដែលជាអ្នកប្រជាធិបតេយ្យ ដើម្បីស្រោចស្រង់ប្រទេសជាតិចេញពី​កណ្តាប់​ដៃនៃការគ្រប់គ្រងរបស់គណបក្សប្រជាជនអស់រយៈពេលជាច្រើនឆ្នាំមកហើយនោះ ដែលមិន បានធ្វើអ្វីដើម្បីជាប្រយោជន៏ដល់ប្រជាពលរដ្ឋ និងប្រទេសជាតិឡើយគឺគិតតែពីបំផ្លាញជាតិ ធ្វើ​បាបប្រជាពលរដ្ឋ ដើម្បីផលប្រយោជន៏ផ្ទាល់ខ្លួនបក្ខពូក អ្វីដែលសំខាន់នោះគឺការថែរក្សា អំណាចរបស់គេឲ្យបាននៅគង់វង្សជារៀងដរាប ។

កម្លាំងអ្នកប្រជាធិបតេយ្យ ដែលឥឡូវកំពុងតែបានមកប្រមូលផ្តុំគ្នាជាមួយនិងគណ​បក្ស សង្គ្រោះ​ជាតិ ដែលជាគណបក្សថ្មីរបស់អ្នកប្រជាធិបតេយ្យដើម្បីចូលរួមប្រគួតប្រជែងក្នុងការបោះឆ្នោត នៅឆ្នាំ២០១៣ខាងមុខនេះ ជាមួយនិងគណបក្សប្រជាជនរបស់លោក ហ៊ុន សែន ។ កម្លាំងមហា សាមគ្គីរបស់ប្រជាពលរដ្ឋជាមួយនិងគណបក្ស សង្គ្រោះជាតិ ត្រូវបានគេមើលឃើញថាជារបត់ នយោបាយថ្មីដើម្បីការផ្លាស់ប្តូរនៅកម្ពុជា ដែលសន្ទុះនៃការគាំទ្រមកលើគណបក្សមួយនេះកាន់ តែច្រើនឡើងៗពីមួយថ្ងៃទៅមួយថ្ងៃ ដែលធ្វើឲ្យគណបក្សកាន់អំណាចសព្វថ្ងៃមានការព្រួយបារម្ភ យ៉ាងខ្លាំង ព្រោះសូម្បីតែសមាជិករបស់គណបក្សកាន់អំណាចក៏បានមកចូលរួមជាមួយនិងគណ​បក្ស សង្គ្រោះជាតិ ផងដែរ ដោយសារតែពួកគាត់មានការភ្ញាក់រលឹក និងយល់ឃើញថាពួកគាត់ មិនត្រូវនៅជាមួយនិងគណបក្សប្រជាជន ក្នុងការចូលដៃជើងធ្វើបាបប្រជាពលរដ្ឋខ្មែរស្លូតត្រង់​ដូចគ្នា និងប្រទេសជាតិរបស់យើងជាបន្តទៀតឡើយ ព្រោះពួកគាត់មិនចង់មានឈ្មោះជាអ្នកបំ ផ្លាញជាតិជាមួយគណបក្សប្រជាជន ។

ហេតុដូចនេះហើយទើបកាលពីថ្ងៃទី១១ ខែកញ្ញា ឆ្នាំ២០១២ គណបក្ស សង្គ្រោះជាតិ បាន​សម្រេចនូវគោលបំណងរបស់​ខ្លួនដោយបានបើកសម្ភោធទីស្នាក់ការរបស់ខ្លួនដើម្បីដំណើរការ ជាផ្លូវការនៅលើឆាកនយោបាយរបស់ប្រទេសកម្ពុជានៅផ្ទះលេខ​៣៨ ផ្លូវ១៩៧២ ភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដែលមានប្រជាពលរដ្ឋអ្នកគាំទ្រគណបក្ស សង្គ្រោះជាតិ និងអ្នកសារព័ត៌មានចូលរួមយ៉ាងច្រើនកោះកុះករ ។

លោក គង់ គាំ ប្រធានស្តីទីរបស់គណបក្ស សម រង្ស៊ី ដែលបានអញ្ជើញទៅចូលរួមក្នុងពិធីបើក សម្ភោធទីស្នាក់ការកណ្តាលរបស់គណបក្ស សង្គ្រោះជាតិ បានមានប្រសាសន៏ថា ឥឡូវមានតែ​គណបក្សពីរទេដែលប្រគួតប្រជែងគ្នា គឺគណបក្សកាន់អំណាចសព្វថ្ងៃ និងគណបក្សប្រជែងដ៏​ធំនោះគឺគណបក្ស សង្គ្រោះជាតិនេះ​ឯង ។ លោកបន្តថា បើពុំមានការចូលរួមរបស់គណបក្ស សង្គ្រោះជាតិ ពុំមានការចូលរួមរបស់ លោក សម រង្ស៊ី ពុំមានការចូលរួមពីសំណាក់លោក​អនុ​ប្រធានគណបក្ស សង្គ្រោះជាតិ កឹម សុខា នៅក្នុងការបោះឆ្នោតខាងមុខ នោះការបោះឆ្នោត​និង​គ្មានន័យនោះទេ ។ ជាមួយគ្នានោះស្ថានការ ណ៏របស់កម្ពុជាត្រូវតែសង្គ្រោះដែលកាលនោះ​យើង​បានរួមកម្លាំងគ្នាដោយបានធ្វើការសង្គ្រោះ ប្រទេសជាតិកាលពីឆ្នាំ១៩៩៣ម្តងរួចមកហើយ ឥឡូវ​ម្ភៃឆ្នាំក្រោយត្រូវតែមានការសង្គ្រោះជាថ្មី ហើយសង្គ្រោះឲ្យបានស្ថិតស្ថេរជាស្ថាពរតទៅ ។

អនុប្រធានស្តីទីរបស់គណបក្ស សម រង្ស៊ី បានមានប្រសាសន៏បន្តថា កាលពីឆ្នាំ១៩៩៣មានអង្គ ការសហប្រជាជាតិមកជួយប្រទេសកម្ពុជាដើម្បីឲ្យការបោះឆ្នោតមានភាពសេរី ត្រឹមត្រូវ និងយុត្តិ ធម៌ ហើយឥឡូវលោក សម រង្ស៊ី និងលោក កឹម សុខា គឺបានបំពេញបេសកកម្មយ៉ាងសំខាន់នៅ ក្រៅប្រទេស បានទទួលការគាំទ្រជាក់ស្តែងនិងច្បាស់លាស់ ហើយទាំងមជ្ឈដ្ឋានជាតិ និងអន្តរ​ជាតិក៏បានអបអរសាទរគណបក្ស សង្គ្រោះជាតិ ផងដែរ ។ ជាមួយគ្នានោះគេបាន​ថែមទាំងទាម​ទារឲ្យមេដឹកនាំគណបក្ស សង្គ្រោះជាតិ ត្រូវតែមានវត្តមាននៅក្នុងប្រទេសកម្ពុជា ហើយក៏បាន​ទាមទារឲ្យមានការផ្លាស់ប្តូរគណកម្មាធិការជាតិរៀបចំការបោះឆ្នោតផងដែរ ។

លោក គង់ គាំ បានមានប្រសាសន៏ទៀតថា ពេលនេះអង្គការសហប្រជាជាតិបានចេញមុខជួយ ពលរដ្ឋកម្ពុជា និងប្រទេសជាតិរបស់យើងម្តងទៀតហើយ ដើម្បីឲ្យមានការបោះឆ្នោតសេរី ត្រឹម​ត្រូវ និងយុត្តិធម៌នៅកម្ពុជា ដូចនេះជ័យជំនះរបស់អ្នកប្រជាធិបតេយ្យគឺស្ថិតនៅនិងមុខរបស់​យើងហើយ ហើយគណបក្សកាន់អំណាចសព្វថ្ងៃនិងចាញ់យ៉ាងអាម៉ាស់នៅឆ្នាំ២០១៣ខាងមុខ​នេះ ព្រោះដោយសារតែមិនមានអ្នកណាជួយខ្លួនទៀតនោះទេ ក្នុងការលួចបន្លំសម្លេង ដែលក្បត់ ទៅនិងឆន្ទះរបស់ប្រជាពលរដ្ឋនោះ ។

លោក គង់ គាំ បាន មានប្រសាសន៏បន្តថា អ្វីដែលជាការគួរឲ្យកត់សម្គាល់គឺ​លោកមិននឹកស្មាន​ដល់​ទាល់តែសោះថា ចលនាប្រជាធិបតេយ្យសង្គ្រោះជាតិ និង គណបក្ស សង្គ្រោះជាតិ ដែល​ទើប​តែបង្កើតឡើងមិន​ទាន់បានប៉ុន្មានផងនោះ តែ​សន្ទុះ​​បងប្អូនប្រជាពលរដ្ឋ និងអ្នកនយោបាយ​ផ្សេងៗមកពីគ្រប់គណបក្ស បានសម្រេចចិត្ត​​ចូល​​មករួមរស់ជាមួយនិង ចលនាប្រជាធិបតេយ្យ​សង្គ្រោះជាតិ ក៏ដូចជាគណបក្ស សង្គ្រោះជាតិ ។ លោក គង់ គាំ បាន​បន្ត​ថា ទាំងអស់នេះគឺជា​សញ្ញា​បង្ហាញពីភាពជោគជ័យរបស់គណបក្ស សង្គ្រោះជាតិ ក្នុងការចូល​រួម​ប្រគួតប្រជែង​នៅ​ពេល​បោះឆ្នោត ជាមួយនិងគណបក្សប្រជាជនរបស់លោក ហ៊ុន សែន នៅឆ្នាំ​២០១៣ខាង​មុខ​នេះ ។ លោកបានបន្តថា ជោគជ័យទាំងអស់នេះ​មិនមែនជា​ជោគជ័យរបស់គណបក្ស សង្គ្រោះ​ជាតិ តែមួយប៉ុណ្ណោះទេ តែជាជោគជ័យរបស់ប្រជាពល​រដ្ឋ​ខ្មែរ​ទាំងអស់គ្នា ក៏ដូចជាប្រ​ទេសជាតិ​របស់យើងផងដែរ  ។

គណបក្ស សង្គ្រោះជាតិ ក្រោមការដឹកនាំរបស់លោក សម រង្ស៊ី ជាប្រធាន និងលោក កឹម សុខា ជាអនុប្រធាន រួមជាមួយនិងឥស្សរជននយោបាយសំខាន់ៗមួយចំនួនទៀតដែលជាស្នូល និងធ្វើ ឲ្យប្រទេសជាតិមានការរីកចំរើកលូតលាស់លើគ្រប់វិស័យបានយ៉ាងឆាប់រហ័សបំផុត ហើយប្រជា​ពលរដ្ឋខ្មែរគ្រប់រូបនិងរស់នៅក្នុងជីវភាពមួយដ៏សមរម្យ យុវជននិងមានការងារធ្វើគ្រប់ៗគ្នា ហើយប្រទេសជាតិនិងមានឈ្មោះបោះសម្លេងនៅលើឆាកអន្តរជាតិ ដែលមានការទទួលស្គាល់ ពីគ្រប់មជ្ឈដ្ឋាន ។ ដូចនេះជំរើសតែមួយគត់របស់ប្រជាពលរដ្ឋខ្មែរគឺគណបក្ស សង្គ្រោះជាតិ ៕