ការកែប្រែនីតិវិធី និងផ្លាស់ប្តូរសមាសភាព គ.ជ.ប គឺមានសារសំខាន់ណាស់ ដើម្បី ឲ្យការបោះឆ្នោតមានភាពសេរី ត្រឹមត្រូវ យុត្តិធម៌ និងការទទួលស្គាល់ជាអន្តរជាតិ

លោក សម រង្ស៊ី ប្រធាន ចលនាប្រជាធិបតេយ្យសង្គ្រោះជាតិ និងជាប្រធានគណបក្ស សង្គ្រោះ​ជាតិ ជារៀងរាល់ថ្ងៃបាននិងកំពុងតែមានភាពមមាញឹកនៅក្រៅប្រទេស ជាមួយអន្តរជាតិដើម្បី​រកអន្តរាគមន៏​ឲ្យមានការដាក់​សម្ពាធមកលើរដ្ឋាភិបាលរបស់លោក ហ៊ុន សែន ឲ្យកែលំអរ និង​កែប្រែ​ចលនាសម្ព័ន្ធ ក៏ដូចជានីតិវិធីមួយចំនួនរបស់ គ.ជ.ប ដែលពោពេញទៅដោយ​ភាពស្មុក​ស្មាញ​ បង្ករការលំបាកដល់ប្រជាពលរដ្ឋដែលជាម្ចាស់ឆ្នោត ។

ជាមួយគ្នានោះគណកម្មាធិការជាតិរៀបចំការបោះឆ្នោត ក៏ត្រូវបានគេមើលឃើញផងដែថា ជាឧ បករណ៏នយោបាយរបស់គណបក្សកាន់អំណាចសព្វថ្ងៃ ដែលធ្វើអ្វីៗគ្រប់បែបយ៉ាងដើម្បីឲ្យគណ មួយនេះឈ្នះរហូត ដោយមិនខ្វល់ការរិះគន់ពីគ្រប់មជ្ឈដ្ឋាននោះឡើយ ហើយ​ក៏មិនខ្វល់ពី​អនុ​សា​ស​ន៏របស់អន្តរជាតិផងដែរ ដើម្បីឲ្យមានការកែលំអរ និងកែប្រែរចនាសម្ព័ន្ធរបស់គណ​កម្មា​ធិ​ការ​ជាតិរៀបចំការបោះឆ្នោត ដែលមានលោក អ៊ឹម សួស្តី ជាប្រធាន និងលោក ទេព នីថា ជាអគ្គ​លេ​ខាធិការឲ្យមានភាពល្អប្រសើរនោះ ។

យ៉ាងណាម៉ិញបើយើងក្រលែកមើលមួយរយៈចុងក្រោយនេះ រដ្ឋាភិបាលរបស់លោក ហ៊ុន សែន បាននិងកំពុងតែ​ទទួល​រង​នូវសម្ពាធពីអន្តរជាតិយ៉ាងខ្លាំង ចំពោះឲ្យមានការកែប្រែនីតិវិធី​មួយ​ចំនួន និង​ឲ្យមាន​ការ​ដុះ​​ដូរ​ក្បាលម៉ាស៊ីនរបស់ស្ថាប័ន គ.ជ.ប មួយនេះ ដើម្បីឲ្យការបោះឆ្នោតនៅ​ឆ្នាំ២០​១៣ ធានាថាប្រព្រឹត្តទៅដោយសេរី ត្រឹមត្រូវ និងយុត្តិធម៌ ។

ទាក់ទងទៅនិងការជំរុញពីអន្តរជាតិឲ្យកម្ពុជាធ្វើការកែលំអរស្ថាប័ន គ.ជ.ប ដើម្បការបោះឆ្នោត​នៅឆ្នាំក្រោយដំណើរការទៅដោយរលូន លោក គីមសួរ ភីរិទ្ធ តំណាងរាស្រ្តរបស់គណបក្ស សម រង្ស៊ី បានមានប្រសាសន៏ឲ្យដឹងថា ការជំរុញឲ្យមានការបោះឆ្នោតនៅកម្ពុជាប្រព្រឹត្តទៅដោយសេរី ត្រឹម​ត្រូវ និងយុត្តិធម៌ ពីអន្តរជាតិបាននិងកំពុងតែមានទំងន់ធ្ងន់ឡើងៗហើយ ជាពិសេសគឺបណ្តា​ប្រទេសដែលពាក់ព័ន្ធជាហត្ថលេខីនៅក្នុងសន្ធិសញ្ញាទីក្រុងប៉ារីស ឆ្នាំ១៩៩១ គឺគេមិនព្រលែង​ចោលនោះទេ ហើយកាលពីពេលកន្លងទៅថ្មីៗនេះក៏មានការបង្កើតគណកម្មា​ធិការអន្តរ​ជាតិ​មួយដោយជំរុញធ្វើយ៉ាងណាឲ្យដំណើការបោះឆ្នោតនៅក្នុងប្រទេសកម្ពុជា នាពេលខាងមុខ​ប្រ​ព្រឹត្តទៅដោយសេរី និងយុត្តិធម៌  ។

លោក គីមសួរ ភីរិទ្ធិ បានបន្តថា ប្រសិនបើពុំមានការកែប្រែ និងផ្លាស់ប្តូរ គ.ជ.ប នោះទេ រដ្ឋាភិ​បាលដែលកើតក្រោយការបោះឆ្នោតនៅឆ្នាំ២០១៣គឺពុំមានការទទួលស្គាល់ជាអន្តរជាតិនោះ

ឡើយ ។ លោកបន្តថា មួយវិញទៀតចំពោះចលនានយោបាយនៅក្នុងប្រទេសកម្ពុជាកំពុងតែ​មានសន្ទុះខ្លាំងណាស់ សម្រាប់ប្រជាពលរដ្ឋដែលមកចូលរួមជាមួយនិង ចលនាប្រជាធិបតេយ្យ សង្គ្រោះជាតិ ក៏ដូចជាគណបក្ស សង្គ្រោះជាតិ ផងដែរ ដែលបើកសម្ភោធន៏ទីស្នាក់ការកណ្តាល របស់គណបក្ស និងការលើកស្លាកនៅថ្ងៃនេះ ហើយប្រជាពលរដ្ឋជាច្រើន និងពីគ្រប់និន្នាការ គណបក្សនយោបាយ បានមកចូលរួមជាមួយគណបក្ស​ សង្គ្រោះជាតិ ហើយការមកចូលរួមរបស់ ប្រជាពលរដ្ឋនេះ បានធ្វើឲ្យគណបក្សកាន់អំណាចកាន់តែមានការភ័យខ្លាចខ្លាំងឡើង រួមផ្សុំជា​មួយសម្ពាធដ៏ធ្ងន់ធ្ងររបស់អន្តរជាតិផងនោះ ។ 

តំណាងរាស្រ្តរបស់គណបក្ស​ សម រង្ស៊ី លោក គីមសួរ ភីរិទ្ធិ បានមានប្រសាសន៏បន្តថា ប្រសិន​បើមានការកែប្រែនីតិវិធី និងការកែលំអរ គ.ជ.ប ទទួលបានជោគជ័យ នោះប្រជាពលរដ្ឋលោក ងាយស្រួលក្នុងការសម្រេចជោគវាសនារបស់ប្រទេសជាតិខ្លាំងណាស់ ព្រោះពួកគាត់លែងព្រួយ បារម្ភចំពោះការបាត់ឈ្មោះនៅក្នុងបញ្ជីឈ្មោះអ្នកបោះឆ្នោត លែងមានការបំភិតបំភ័យការគំរាម កំហែងពីអ្នកមានអំណាចឲ្យបោះឆ្នោតគំទ្រគណបក្សរបស់ខ្លួនដែលពួកគាត់មិនពេញចិត្ត និង​ឈប់ខ្វល់ខ្វាយពីការមានឈ្មោះស្ទួនជាដើម ។ លោក គីមសួរ ភីរិទ្ធិ បន្តថា ប្រជាពលរដ្ឋទាំង​អស់​គ្នាត្រូវតែចូលរួមជាមួយ ចលនាប្រជាធិបតេយ្យសង្គ្រោះជាតិ ក៏ដូចជាគណបក្ស សង្ក្រោះជាតិ ដើម្បីយើងរុញចលនានេះឲ្យមានសន្ទុះកាន់តែខ្លាំងឡើងបន្ថែមទៀត ដើម្បីឲ្យអន្តរជាតិកាន់តែ ចាប់អារម្ភចំពោះប្រជាពលរដ្ឋខ្មែរដែលចង់មានការផ្លាស់ប្តូរមួយដ៏ពិតប្រាកដ ពេលនោះហើយគេ និងកាន់តែជុំវិញខ្លាំងឡើងបន្ថែមទៀតដើម្បីឲ្យមានការផ្លាស់ប្តូរយ៉ាងឆាប់រហ័ស និងពិតប្រាកដ ។

គួររំលឹកផងដែរថា កាលពីថ្ងៃទី២២ ខែសីហា ឆ្នាំ២០១២ គណបក្ស​ សម រង្ស៊ី និងគណបក្ស សិទ្ធិ មនុស្ស ក្នុងចលនាប្រជាធិបតេយ្យសង្គ្រោះជាតិ បានចេញសេចក្តីថ្លែងការណ៏រួមគ្នាមួយដោយ គណបក្ស​ទាំងពីរនិងមិនបញ្ជូនតំណាងគណបក្សទៅចូលរួមសង្កេតការណ៏អំពីដំណើរការពិនិត្យ បញ្ជីឈ្មោះ និងចុះឈ្មោះបោះឆ្នោតឆ្នាំ២០១២ ដែលកំពុងតែដំណើរការនេះ និងបញ្ចប់ទៅ​នៅ​ថ្ងៃ​ទី១២ ខែតុលា ឆ្នាំ២០១២ឡើយ ។ មូលហេតុដោយសារតែគណបក្ស សម រង្ស៊ី និងគណបក្ស សិទ្ធិមនុស្ស មើលឃើញថា នីតិវិធីនៃការចុះឈ្មោះ ការលុបឈ្មោះអ្នកបោះឆ្នោតនៅដដែល​ពុំ​មាន​អ្វីផ្លាស់ប្តូរនោះឡើយ ពោលគឺមានភាពសាំញ៉ាំដែលបង្កការលំបាក ស្មុគស្មាញដល់ប្រជា​ពល​រដ្ឋ ក្នុងការពិនិត្យបញ្ជីឈ្មោះ និងចុះឈ្មោះបោះឆ្នោត ។ ឯមន្រ្តីអនុវត្តការងារពិនិត្យ​បញ្ជី​ឈ្មោះ និង ចុះឈ្មោះបោះឆ្នោតនេះភាគច្រើលើសលុបជាសកម្មជន​របស់គណបក្សកាន់​អំណាច​បច្ចុប្បន្ន ។

ដូច្នេះគណបក្ស សម រង្ស៊ី និងគណបក្ស សិទ្ធិមនុស្ស ចាត់ទុកថាដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១២ ដែលរៀបចំដោយគណកម្មាធិការជាតិរៀបចំការបោះឆ្នោត មិនអាចជួយឲ្យការបោះឆ្នោតសកលឆ្នាំ២០១៣ប្រព្រឹត្តទៅដោយសេរី ត្រឹមត្រូវ និងយុត្តិធម៌បាន ឡើយ ។

សូមជំរាបជូនផងដែរថា គណបក្ស​កាន់អំណាច​សព្វ​ថ្ងៃ​ធ្លាប់បានអះអាងថា ខ្លួនមាន​សមាជិ​ក​​​

ចំនួន​ប្រាំលាននាក់ ក្នុងចំ​ណោម​ប្រជាពលរដ្ឋមាន​សិទ្ធិបោះឆ្នោត៩លាននាក់ ។ ដូចនេះ​គណ​បក្សកាន់អំណាចមិនត្រូវមានការភ័យខ្លាចក្នុងការឲ្យមានការកែប្រែនីតិវិធីរបស់ គ.ជ.ប និងផ្លាស់ ប្តូរក្បាលម៉ាស៊ីនរបស់ គ.ជ.ប ឡើយ ។ ព្រោះ​បើមានការផ្លាស់ប្តូរ គ.ជ.ប មានការកែប្រែនីតិវិធី និងធ្វើឲ្យការបោះឆ្នោតឆ្នាំក្រោយមានតម្លៃ ហើយរដ្ឋាភិបាលដែលកើតចេញពីការបោះឆ្នោត​ដែលប្រព្រឹត្តទៅដោយសេរី ត្រឹមត្រូវ និងយុត្តិធម៌បែបនេះ គឺមានការទទួលស្គាល់ជាអន្តរជាតិ ដែលធ្វើឲ្យមានសក្តានុពលក្នុងការគ្រប់គ្រងប្រទេសរបស់ខ្លួន ៕