លោក Greg So រដ្ឋមន្ត្រីក្រសួងពាណិជ្ជកម្ម និងអភិវឌ្ឍន៍សេដ្ឋកិច្ច ហុងកុង
ភ្នំពេញៈ នៅក្នុងអំឡុងដំណើរទស្សនកិច្ចមកភ្នំពេញ នៅសប្តាហ៍នេះ រដ្ឋមន្ត្រីក្រសួងពាណិជ្ជកម្មនិងអភិវឌ្ឍន៍សេដ្ឋកិច្ច ហុងកុង លោក Greg So បានអះអាងសាជាថ្មីអំពីបំណងរបស់ហុងកុង ក្នុងការចូលរួមក្នុងកិច្ចព្រមព្រៀងពាណិជ្ជកម្មអាស៊ាន និងចិន ព្រមទាំងគូសបញ្ជាក់ថា កម្ពុជាជាអ្នកទទួលបានអត្ថប្រយោជន៍ដ៏ច្រើន សម្រាប់វិនិយោគបរទេសផ្ទាល់ពីហុងកុងមក។
ចំពោះទស្សនៈលោក Greg So ចំណងទាក់ទងសេដ្ឋកិច្ចរវាងហុងកុង និងកម្ពុជា មានភាពរឹងមាំដោយមានកំណើនពាណិជ្ជកម្មយ៉ាងខ្លាំងរវាងប្រទេសទាំងពីរ អំឡុង២០១១ និង ២០១២។
លោកបានលើកឡើងថា៖ «នៅឆ្នាំ២០១១ មានកំណើនពាណិជ្ជកម្ម ២២ភាគរយ។ ក្នុងរយៈពេល ៩ខែឆ្នាំ២០១២ ពាណិជ្ជកម្មនេះ មានកំណើន១៦ភាគរយ»។
លោកបន្តថា កំណើនដ៏ច្រើននេះ អាចសង្កេតឃើញតាមរយៈការនាំចូលរបស់កម្ពុជា ទៅហុងកុង។ លោកបានថ្លែងថា៖ «ការនាំចូលពីកម្ពុជា កាលពីឆ្នាំមុនមានកំណើន៩០ភាគរយ។រយៈពេល៨ខែឆ្នាំនេះ មានកំណើន៧៦ភាគរយ។ ទាំងនេះចង្អុលបង្ហាញអំពីកិច្ចសហប្រតិបត្តិការជាច្រើនរវាងប្រទេសទាំងពីរ»។
លោក Greg So បានកត់សម្គាល់លើវិស័យជាក់លាក់មួយចំនួន គឺការកែច្នៃផលិតផលកសិកម្ម រោងចក្រឧស្សាហកម្ម និងឧស្សាហកម្មកាត់ដេរ។
ទោះបីយ៉ាងនេះក្តី លោកបានឲ្យដឹងថា វិស័យសេវាកម្មមានរហូតដល់៩៣ភាគរយនៃផលិតផលក្នុងស្រុកសរុបរបស់ហុងកុង។
កិច្ចសហប្រតិបត្តិការរវាងភាគីទាំងពីរ អាចរីកតាម រយៈវិស័យទេសចរណ៍ បដិសណ្ឋារកិច្ច ការរចនាការបង្កើតថ្មី បច្ចេកវិទ្យា ការស្រាវជ្រាវ និងការអភិវឌ្ឍ។
លោកGreg បានលើកឡើងថា៖«ប្រទេសនេះ[កម្ពុជា] មានឱកាសវិនិយោគជាច្រើន។ ខ្ញុំគិតថា កម្ពុជា បើកចំហសម្រាប់វិនិយោគិនហុងកុង»។
ហុងកុង កំពុងធ្វើយុទ្ធនាការចូលរួមក្នុងកិច្ចព្រមព្រៀងពាណិជ្ជកម្មរវាងចិន និងអាស៊ាន។
លោក Greg Soក៏បានគូសបញ្ជាក់ផងដែរថា ហុងកុង ធ្លាប់ជាច្រកសម្រាប់ធ្វើពាណិជ្ជកម្មជាមួយចិនដីគោក។ លោកបន្តថា៖ «ការនាំចេញជាមួយប្រទេសអាស៊ាន៩៧ភាគរយនៃការនាំចេញទាំងនោះ គឺការនាំចេញបន្តដែល៧១ភាគរយ មកពីប្រទេសចិនដីគោក។ ដូច្នេះអ្នកសង្កេតឃើញពីសារៈសំខាន់នៃការធ្វើពាណិជ្ជកម្មរវាងអាស៊ាន និងចិន តាមរយៈហុងកុង។ នោះជាតួនាទីដ៏សំខាន់នៅក្នុងគម្រោងទាំងនោះ»។
ការធ្វើសមាហរណកម្មហុងកុងទៅក្នុងកិច្ចព្រមព្រៀងពាណិជ្ជកម្មសេរីនេះ នឹងដាក់បញ្ចូលទៅក្នុងរបៀបវារៈសម្រាប់ជំនួបកំពូលអាស៊ាននៅកម្ពុជា ក្នុងខែវិច្ឆិកា។ លោក Greg So បានលើកឡើងថា៖ «ខ្ញុំយល់ថា លោកនាយករដ្ឋមន្ត្រីហ៊ុន សែន ដែលជាប្រធានកិច្ចប្រជុំអាស៊ាន នឹងជំរុញឲ្យហុងកុងក្លាយទៅជាផ្នែកមួយនៃកិច្ចព្រមព្រៀងនៅខែវិច្ឆិកា»។
លោកបន្តថា កម្ពុជានឹងទទួលបានប្រយោជន៍ពីការចូលរួមរបស់ហុងកុង ទៅក្នុងកិច្ចព្រមព្រៀងពាណិជ្ជកម្មសេរីចិន តាមរយៈការបង្កើនឱកាសវិនិយោគ និងការទទួលបាននូវហេដ្ឋារចនាសម្ព័ន្ធហិរញ្ញវត្ថុកាន់តែរឹងមាំ។ លោកថ្លែងថា៖ «យើងស្ថិតនៅលំដាប់ទី៥នៅលើពិភពលោក បើគិតទៅលើការវិនិយោគផ្ទាល់ពីបរទេស។ ខ្ញុំគិតថា យើងអាចមានការវិនិយោគជាច្រើន នៅកម្ពុជា។វិស័យឧស្សាហកម្ម នឹងទទួលបានឱកា ស និងសហការជាមួយសហគ្រាសក្នុងស្រុក ទាក់ទងនឹងការបង្កើតអាជីវកម្មនៅទីនេះ»៕
No comments:
Post a Comment
yes