លោកម៉ម សូណង់ដូ ពេលដឹកចេញពីតុលាការក្រុង កាលពីថ្ងៃទី ១ ខែតុលា
ភ្នំពេញៈ កម្មវិធីសំខាន់ៗមួយចំនួន របស់វិទ្យុសំបុកឃ្មុំ ដែលផលិតឡើងដោយផ្ទាល់ របស់លោកម៉ម សូណង់ដូ ប្រធានសមាគមអ្នកប្រជាធិបតេយ្យ និងជានាយកវិទ្យុនេះ ដែលកំពុងត្រូវជាប់ឃុំ នៅពន្ធនាគារព្រៃស រហូតដល់ទៅ ២០ ឆ្នាំ ទៅតាមអំណាចសាលក្រមរបស់សាលាដំបូងរាជធានី ពាក់ព័ន្ធទៅនឹងបទចោទប្រកាន់ដ៏ចម្រូងចម្រាសនោះ ត្រូវបានកែប្រែទាំងស្រុង ដោយសារតែគ្មានអ្នកជំនួស។
លោកស្រី ឌិន សុផាន់ណារ៉ា ភរិយារបស់លោកម៉ម សូណង់ដូ ឲ្យដឹងថា បច្ចុប្បន្ននេះ វិទ្យុសំបុកឃ្មុំ មានបញ្ហាជាច្រើនបន្ទាប់ពីស្វាមីរបស់លោកស្រី ត្រូវបានឃុំខ្លួននៅក្នុងពន្ធនាគារព្រៃស។ លោកស្រីមានប្រសាសន៍ថា៖ «កម្មវិធីឆ្លងឆ្លើយដោយផ្ទាល់តាម ទូរស័ព្ទ រវាងលោកប្រធានជាមួយប្រជាពលរដ្ឋដែលបកស្រាយអំពីចម្ងល់ទូទៅ របស់ប្រជាពលរដ្ឋ ត្រូវបានចំហចោល។ យើងសោកស្តាយ ចំពោះការបាត់បង់កម្មវិធីនេះ ពីព្រោះគ្មានអ្នកណា អាចធ្វើជំនួសលោកប្រធានបានទេ»។ លោកស្រីឲ្យដឹងទៀតថា ក្រៅពីនេះ កម្មវិធីដែលនិយាយអំពីលទ្ធិប្រជាធិបតេយ្យ និងកម្មវិធីសកម្មភាពសម្បុរសធម៌ចុះចែកអំណោយតាមខេត្ត ក៏ត្រូវទុកចំហចោលដែរ ដោយចាក់ផ្សាយកម្មវិធីចាស់ៗ ដែលលោកម៉ម សូណង់ដូ បានធ្វើកាលពីមុនឡើងវិញ។ លោកស្រីថ្លែងទៀតថា៖ «យើងមិនទាន់ប្រាកដថា នឹងត្រូវធ្វើយ៉ាងម៉េចទេ ទៅអនាគត»។
លោកស្រីបញ្ជាក់ថា៖«ពីមុនមានប្រជាពលរដ្ឋទូរស័ព្ទមក គឺមានលោកប្រធានពន្យល់គាត់ តែពេលនេះ នៅពេលប្រជាពលរដ្ឋទូរស័ព្ទមក គឺយើងឲ្យគាត់សម្តែងមតិរបស់គាត់ដោយពុំមានអ្នកបកស្រាយឡើយ»។
លោក ចាន់ ហម អ្នកគាំទ្រ នឹងស្តាប់កម្មវិធីរបស់វិទ្យុសំបុកឃ្មុំ នៅឯខេត្តកណ្តាល មានការសោកស្តាយ ចំពោះការលុបចោលកម្មវិធីមួយចំនួនរបស់វិទ្យុឯករាជ្យមួយនេះ។ លោកបន្តថា៖ «ខ្ញុំធ្លាប់បានចូលសួរសុខទុក្ខលោកប្រធាន នៅឯពន្ធនាគារ ហើយលោកប្រធានបានប្រាប់ខ្ញុំថា ទោះបីជារូបគាត់ជាប់ពន្ធនាគារក៏ដោយ ក៏ត្រូវតែនាំគ្នាពង្រឹងសមាគមអ្នកប្រជាធិបតេយ្យដែរ ពីព្រោះសមាគមនេះស្របច្បាប់ មានការអនុញ្ញាតពីក្រសួងមហាផ្ទៃ មិនត្រូវទន់ជ្រាយនោះទេ»។
យ៉ាងណាក្តី លោក ចាន់ ហម បាននិយាយទៀតថា៖«ទោះបីជាពុំមានកម្មវិធីរបស់លោកប្រធានក៏ ដោយ ក៏ខ្ញុំនៅតែស្តាប់វិទ្យុនេះដែរ ពីព្រោះមានផ្សាយព័ត៌មានជាច្រើនទៀត ដូចជាវិទ្យុអាស៊ីសេរី និងវិទ្យុសំឡេងសហរដ្ឋអាមេរិក»។
លោកអំ សំអាតមន្ត្រីស៊ើបអង្កេតជាន់ខ្ពស់ អង្គការការពារសិទ្ធិមនុស្សលីកាដូមានការសោកស្តាយចំពោះការ បាត់បង់កម្មវិធីសំខាន់ៗរបស់វិទ្យុសំបុកឃ្មុំ ដោយលោកលើកឡើងថា កម្មវិធីរបស់វិទ្យុនេះ ដើរតួយ៉ាងសំខាន់ ក្នុងការផ្សព្វផ្សាយ អំពីប្រជាធិបតេយ្យ ច្បាប់និងសិទ្ធិមនុស្ស ជាពិសេសសេរីភាពក្នុងការបញ្ចេញមតិ។ លោកថ្លែងថា៖ «បើទោះបីជារដ្ឋាភិបាល មិនបានបិទវិទ្យុនេះក៏ដោយ ប៉ុន្តែកម្មវិធីសំខាន់ៗជាច្រើនត្រូវបានផ្អាកទៅហើយ នៅពេលដែលអវត្តមានលោកម៉ម សូណង់ដូ ដូច្នេះវាមិនខុសអីនឹងការបិទវិទ្យុនោះទេ»។
កាលពីថ្ងៃទី ១ ខែតុលា ឆ្នាំ ២០១២ សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសលោកម៉ម សូណង់ដូ ឲ្យជាប់ពន្ធនាគារ ២០ ឆ្នាំ និងពិន័យជាប្រាក់ ១០ លានរៀល។ សាលក្រមនេះ បានធ្វើឲ្យអង្គការជាតិអន្តរជាតិ គណបក្សប្រឆាំង រួមទាំងប្រទេសមហាអំណាចធំៗ និងសហភាពអឺរ៉ុប បានធ្វើការរិះគន់យ៉ាងខ្លាំង លើប្រព័ន្ធតុលាការកម្ពុជា ថាមិនឯករាជ្យនិងចាត់ទុកការសម្រេចក្តីនេះថា ជារឿងនយោបាយ និងអំពាវនាវឲ្យធ្វើការដោះលែងដោយគ្មានលក្ខខណ្ឌ។
លោកម៉ម សូណង់ដូ ត្រូវបានប៉ូលិសចាប់ខ្លួន កាលពីថ្ងៃទី ១៥ កក្កដា បន្ទាប់ពីរូបលោក បានវិលត្រឡប់មកពីបរទេស រយៈពេលបីថ្ងៃ ដោយសាលាដំបូងរាជធានីបានសម្រេចឃុំខ្លួន នៅពន្ធនាគារព្រៃស ក្រោមការចោទប្រកាន់ពីបទ ផ្ដួចផ្ដើមគំនិតប្រឆាំងអ្នករាជការសាធារណៈ ធ្វើកុបកម្មជ្រៀតជ្រែកខុសច្បាប់នៅក្នុងការបំពេញមុខងារសាធារណៈ ញុះញង់ឲ្យប្រជាពលរដ្ឋកាន់អាវុធខុសច្បាប់ និងប្រឆាំងនឹងអាជ្ញាធរស្របច្បាប់ ដែលមានចែងក្នុងមាត្រា មួយចំនួននៃក្រមព្រហ្មទណ្ឌ បើទោះបីជាទាំងលោកម៉ម សូណង់ដូ និងអង្គការសង្គមស៊ីវិលជាច្រើន ដែលតាមឃ្លាំមើលរឿងហេតុនេះ ចាត់ទុកថា ជាការចោទប្រកាន់ដោយពុំមានការពិតក៏ដោយ៕
No comments:
Post a Comment
yes