ភ្នំពេញ: ការធ្វើជំរឿនចំនួនគ្រួសារ និងចំនួនប្រជាជន ដែលរស់នៅក្នុងទីតាំងសំណង់បណ្តោះអាសន្ន សរុបមានចំនួន ៥១១ ទីតាំង ( កើន ៨ ទីទាំង បើធៀបនឹងឆ្នាំមុន ) ដែលមានប្រជាជនសរុបជាង ១ សែននាក់ ក្នុងចំណោមប្រជាជនសរុប ដែលរស់នៅភ្នំពេញជាង ១,៣ លាននាក់។ នេះបើតាមរបាយការណ៍។
របាយការណ៍បាយការណ៍ បូកសរុបលទ្ធផលអនុវត្តការងារ ឆ្នាំ២០១២ និងទិសដៅ ឆ្នាំ២០១៣ របស់សាលារាជធានីភ្នំពេញ ដែលបានផ្សព្វផ្សាយក្នុងសន្និបាតបូកសរុបលទ្ធផលអនុវត្តការងារឆ្នាំ២០១២ និងទិសដៅឆ្នាំ២០១៣ របស់រដ្ឋបាលរាជធានីភ្នំពេញ កាលពីព្រឹកថ្ងៃទី១៨ ខែកុម្ភៈ ឆ្នាំ២០១៣ នៅសាលារាជធានីភ្នំពេញ បង្ហាញថា ប្រជាជន ដែលរស់នៅក្នុងទីតាំងសំណង់បណ្តោះអាសន្ន ដែលមាន ៥១១ ទីតាំង រួមមាន៖ ២៣.៥៤៦ ខ្នងផ្ទះ ( ថយចុះ ១.៩៨៥ ខ្នងផ្ទះ ) មានទំហំដី ៣.៦៤៣.៦២០ ម៉ែត្រក្រឡា មានប្រជាពលរដ្ឋរស់នៅ ចំនួន ២៥.១៤២ គ្រួសារ ( កើន ៤៧៤ គ្រួសារ ) និងមានមនុស្ស ចំនួន ១០៥.៧៧១ នាក់ ( កើន ១៩.៩៦៤ នាក់ )។
របាយការណ៍ដដែល ក៏បានបង្ហាញថា ក្នុងឆ្នាំ២០១២ គណៈកម្មការសុរិយោដីរាជធានីភ្នំពេញ បានទទួលពាក្យបណ្តឹងវិវាទដីធ្លី ចំនួន ៦ ករណី បន្ថែមលើបណ្តឹងនៅសល់ពីឆ្នាំចាស់ចំនួន ៦៩ ករណី។ ក្នុងនោះ អាជ្ញាធរបានដោះស្រាយរួច ៥ករណី ច្រានចោល ៨ ករណី ដកពាក្យវិវាទ ២ ករណី និងកំពុងដោះស្រាយ ៦០ ករណី។
ពាក់ព័ន្ធនឹងជម្លោះដីធ្លី នៅភ្នំពេញ ក៏ត្រូវបានលើកបង្ហាញក្នុងរបាយការណ៍ តែករណីបូរីកីឡាប៉ុណ្ណោះ។ ចំណែកករណីរបស់អ្នកភូមិបឹងកក់ មិនត្រូវបានលើកបង្ហាញឡើយ។
តាមរបាយការណ៍ ប្រជាពលរដ្ឋនៅសហគមន៍បុរីកីឡា ដែលមានសិទ្ធិទទួលផ្ទះ និងចូលទៅរស់នៅក្នុងអគារទាំង៨ ដែលសាងសង់ដោយក្រុមហ៊ុន ផានអ៊ីម៉ិច មានចំនួន ១.៣៨០ គ្រួសារ។ ក្នុងនោះ ប្រជាពលរដ្ឋ បានចាប់ឆ្នោតឡើងរស់នៅ មានចំនួន ១.៣២៨ គ្រួសារ នៅសល់ ៥២ គ្រួសារទៀត ( គ្រួសារនគរបាលចំនួន ២៤ គ្រួសារ និងប្រជាពលរដ្ឋ ចំនួ ២៨ គ្រួសារ )៕
No comments:
Post a Comment
yes