ម៉ម សូណង់ដូ
ខណៈសវនាការបណ្ដឹងឧទ្ធរណ៍ជិតចូលមកគេសង្កេតឃើញក្រុមឃ្លាំមើលសិទិ្ធមនុស្សទាំងជាតិ
និងអន្តរជាតិ បានទាមទារជាបន្តបន្ទាប់ឲ្យរដ្ឋាភិបាលកម្ពុជាដោះលែងប្រធានវិទ្យុសំបុកឃ្មុំលោក
ម៉ម សូណង់ដូ ឲ្យមានសេរីភាពឡើងវិញ ។
នៅថ្ងៃសុក្រ ទី២២ ខែកុម្ភៈ ឆ្នាំ២០១៣នេះ
យ៉ាងតិចណាស់មានអង្គការធំៗចំនួនពីរ
បានចេញសេចក្ដីថ្លែងការដាច់ដោយឡែកពីគ្នា
ឲ្យដោះលែងប្រធានវិទ្យុសំបុកឃ្មុំ
និងជាប្រធានសមាគមអ្នកប្រជាធិបតេយ្យរូបនេះ
ឲ្យមានសេរីភាពឡើងវិញ ។ អង្គការទាំងពីរនេះ
គឺអង្គការលើកលែងទោសអន្តរជាតិ Amnesty International ដែលមានមូលដ្ឋាននៅប្រទេសអង់គ្លេស
និងមជ្ឈមណ្ឌលសិទិ្ធមនុស្សកម្ពុជា (CCHR) ។
នៅក្នុងសេចក្ដីថ្លែងការណ៍
ដែលមានអត្ថន័យប្រហាក់ប្រហែលគ្នា អង្គការទាំងពីរបានថ្លែងថា
ដោយសារតែភស្តុតាងដាក់បន្ទុក ដែលប្រមូលដោយរដ្ឋាភិបាល
មិនមានភាពជាក់លាក់ និងគ្រប់គា្រន់ គឺជាផ្នែកមួយ ដែលមើលឃើញថា វាជារឿងនយោបាយហើយម្យ៉ាងទៀតការ
ចាប់ ខ្លួន និងការកាត់ទោសគឺធ្វើឡើងតែប៉ុន្មានថ្ងៃប៉ុណ្ណោះ
បន្ទាប់ពីនាយករដ្ឋមន្ត្រីកម្ពុជា លោក ហ៊ុន សែន បានថ្លែងគំរាម
ដោយមិនចេញឈ្មោះថា ត្រូវចាប់ខ្លួនយកមកកាត់ទោសឲ្យតែបាន ។
លោក ម៉ម សូណង់ដូ ត្រូវបានផ្តន្ទាទោស២០ឆ្នាំ
ដោយអំណាចសាលក្រមរបស់តុលាការសាលាដំបូងរាជធានីភ្នំពេញ កាលពីថ្ងៃទី១
ខែតុលា ឆ្នាំ២០១២ ពីបទ នៅពីក្រោយការធ្វើអបគមន៍ នៅក្នុងស្រុកឆ្លូង
ខេត្តក្រចេះ ។
ប៉ុន្តែសេចក្ដីថ្លែងការណ៍របស់អង្គការទាំងពីរបានទទូចថា
លោក ម៉ម សូណង់ដូ គឺជាអ្នកទោសមនសិកា និងជាអ្នកសារព័ត៌មានឈានមុខគេម្នាក់
ដែលហ៊ាននិយាយរិះគន់រាល់កំហុសឆ្គងរបស់រដ្ឋាភិបាល
និងប្រព័ន្ធតុលាការនៅកម្ពុជា ។
មជ្ឈមណ្ឌលសិទិ្ធមនុស្សកម្ពុជាប្រកាសថា នៅថ្ងៃនេះមជ្ឈមណ្ឌលបានចុះចែកកាតប៉ុស្តាល់
១០០០០សន្លឹក ដែលជារូបភាពនៃការបើកយុទ្ធនាការដើម្បីដោះលែងលោក ម៉ម សូណង់ដូ ។
តាមព័ត៌មានសវនាការបណ្ដឹងឧទ្ធរណ៍របស់លោក ម៉ម សូណង់ដូ
នឹងត្រូវធ្វើឡើងនៅថ្ងៃទី៥ ខែមិនា ឆ្នាំ២០១៣ ដែលគេរំពឹងថា
នឹងមានអ្នកសង្កេតការជាតិ និងអន្តរជាតិរាប់រយនាក់ចូលសង្កេតការណ៍ព្រឹត្តិការណ៍នេះ
៕
No comments:
Post a Comment
yes