លោកអៀង សារី បានស្លាប់នៅក្នុងមន្ទីរពេទ្យមិត្តភាពខ្មែរ-សូរៀត នៅព្រឹកថ្ងៃនេះ
លោក អៀង សារី កាលនៅរស់
ភ្នំពេញ: លោក អៀង សារី បានស្លាប់នៅម៉ោង ៨និង៤៥នាទី នៅក្នុងមន្ទីរពេទ្យ។ នេះគឺជាការអះអាងរបស់មន្ត្រីព័ត៌មាននៃសាលាក្តីខ្មែរក្រហម។
ជាមួយសេចក្តីសោកស្តាយ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) សូមប្រកាសជូនដំណឹងអំពីមរណភាពរបស់ជនជាប់ចោទអៀង សារី។ លោកអៀង សារី បានស្លាប់នៅក្នុងមន្ទីរពេទ្យមិត្តភាពខ្មែរ-សូរៀត នៅព្រឹកថ្ងៃនេះ បន្ទាប់ពីបានចូលសម្រាកព្យាបាលជំងឺនៅមន្ទីរពេទ្យនៅថ្ងៃទី៤ ខែមីនា ឆ្នាំ២០១៣។
លោកនេត ភក្ត្រា មន្ត្រីព័ត៌មានសាលាក្តីខ្មែរក្រហម បាននិយាយថា សពរបស់គាត់នឹង ត្រូវប្រគល់ជូនគ្រួសារនៃសព បន្ទាប់ពីសាកសពត្រូវបានពិនិត្យដោយព្រះរាជាអាជ្ញា។
យោងតាមសេចក្តីប្រកាសព័ត៌មានរបស់អង្គជំនុំជម្រះវិសាមញ្ញក្នុងតុលាការកម្ពុជា នៅថ្ងៃទី១៤ ខែមីនានេះ បានបង្ហាញថា អនុលោមតាមវិធាន ៣២ ស្ទួន នៃវិធានផ្ទៃក្នុងរបស់ អ.វ.ត.ក សហព្រះរាជអាជ្ញានឹងបញ្ជាក់អំពីមូលហេតុពិតប្រាកដនៃការស្លាប់នេះ បន្ទាប់ពីបានធ្វើការស៊ើបអង្កេតពាក់ព័ន្ធនានា។ សហព្រះរាជអាជ្ញានឹងចេញរបាយការណ៍ជាលាយលក្ខណ៍អក្សរមួយអំពីការរកឃើញរបស់គាត់នៅក្នុងពេលឆាប់ៗខាងមុខនេះ។
សេចក្តីប្រកាសព័ត៌មាន បានឲ្យដឹងទៀតថា លោកអៀង សារី កើតនៅថ្ងៃទី២៤ខែតុលា ឆ្នាំ១៩២៥ មានតួនាទីជាអតីតឧបនាយករដ្ឋមន្ត្រីទទួលបន្ទុកកិច្ចការបរទេស និងជាសមាជិកមួយរូបនៃគណៈអចិន្ត្រៃយ៍នៃបក្សកុម្មុយនិស្តកម្ពុជាក្នុងរបបកម្ពុជាប្រជាធិបតេយ្យ។ អៀង សារី ត្រូវបានចាប់ខ្លួននៅថ្ងៃទី១២ ខែវិច្ឆិកា ឆ្នាំ២០០៧ ហើយត្រូវបានជំនុំជម្រះក្តីនៅចំពោះមុខ អ.វ.ត.ក ចំពោះបទចោទប្រកាន់អំពីឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងការរំលោភបំពារបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវ ឆ្នាំ១៩៤៩។
សេចក្តីប្រកាសព័ត៌មាន បានបញ្ជាក់ថា លោកអៀង សារី ត្រូវបានបញ្ជូនទៅសម្រាកព្យាបាលជំងឺនៅមន្ទីរពេទ្យជាច្រើនលើករួចមកហើយ ចាប់តាំងពីគាត់ត្រូវបានឃុំខ្លួននៅមន្ទីរឃុំឃាំងបណ្តោះអាសន្នរបស់ អ.វ.ត.ក ហើយការវាយតម្លៃទៅលើកាយសម្បទា និងបញ្ញាស្មារតីក្នុងការចូលរួមសវនាការមួយគ្រោងនឹងធ្វើឡើងដោយអ្នកជំនាញផ្នែកវេជ្ជសាស្ត្រជាតិ និងអន្តរជាតិនៅចុងខែមីនានេះ៕
No comments:
Post a Comment
yes