ភ្នំពេញ: ទីបំផុតទៅ ចៅក្រមតុលាការសាលាឧទ្ធរណ៍ បានកាត់តម្រឹមទោសជាប់ពន្ធនាគារ របស់លោក ម៉ម សូណង់ដូ រយៈពេល ៨ ខែ ហើយបើគិតទៅលោក ម៉ម សូណង់ដូ នឹងត្រូវជាប់ពន្ធនាគាររយៈពេល ៨ ខែ នៅថ្ងៃទី១៥ ខែមីនា ឆ្នាំ២០១៣។ ដូច្នេះចៅក្រម សម្រេចថានឹងដោះលែងលោក ម៉ម សូណង់ដូ នៅថ្ងៃទី១៥ ឬថ្ងៃទី១៦ ខែមីនា ឆ្នាំ២០១៣។
ក្នុងពេលប្រកាសសាលដីកានៅព្រឹកថ្ងៃទី១៤ ខែមីនា ឆ្នាំ២០១៣ ចំពោះមុខលោក ម៉ម សូណង់ដូ និងពលរដ្ឋជាប់ចោទ ២ នាក់ទៀត លោកចៅក្រម ឃុន លាងម៉េង បានសម្តេចផ្តន្ទាទោសលោក ម៉ម សូណង់ដូ ពីទោសជាប់ ២០ ឆ្នាំ កាលពីនៅតុលាការសាលាដំបូង មកនៅត្រឹមទោស ៥ ឆ្នាំ។ ក៏ប៉ុន្តែត្រូវអនុវត្តន៍ទោសក្នុងពន្ធនាគារតែ ៨ ខែប៉ុណ្ណោះ។ ដូច្នេះបើគិតពីថ្ងៃចាប់ខ្លួនកាលពីថ្ងៃទី១៥ ខែកក្កដា ឆ្នាំ២០១២ គឺលោក ម៉ម សូណង់ដូ នឹងត្រូវជាប់ពន្ធនាគារគម្រប់ ៨ ខែ នៅថ្ងៃទី១៥ ខែមីនា ឆ្នាំ២០១៣។
ដោយឡែកប្រជាពលរដ្ឋពីរនាក់ទៀត ដែលត្រូវបាននាំមកកាត់ទោសជាមួយលោក ម៉ម សូណង់ដូ គឺត្រូវចៅក្រមសម្រេចបន្ធូរបន្ថយទោសពី ៥ ឆ្នាំ មកនៅត្រឹម ជាប់ពន្ធនាគារ ១០ ខែ ហើយបើគិតតាំងពីថ្ងៃចាប់ខ្លួន គឺអ្នកភូមិប្រម៉ាទាំងពីរនាក់ នឹងត្រូវរួចខ្លួននៅថ្ងៃទី១៦ ខែមីនា ឆ្នាំ២០១៣។
ពាក់ព័ន្ធនឹងករណីលោក ម៉ម សូណង់ដូ ចៅក្រមបានសម្រេចប្តូរបទចោទប្រកាន់លើលោក ម៉ម សូណង់ដូ ពីបទបង្កើតតំបន់អបគមន៍ ប្រឆាំងរដ្ឋាភិបាល ទៅជាបទល្មើសកាប់រានព្រៃឈើ តាមរយៈជម្លោះដីនៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ កាលពីខែមេសា និងខែឧសភា ឆ្នាំ២០១២។
នៅខាងក្រៅរបងសាលាឧទ្ធរណ៍ក្រុមអ្នកគាំទ្ររាប់រយនាក់ ដែលជាសមាជិកនៃសមាគមអ្នកប្រជាធិបតេយ្យ បាននាំគ្នាកាន់រូបថតលោក ម៉ម សូណង់ដូ ផងនោះ បាននាំគ្នាស្រែកទាមទារឲ្យមានការដោះលែងលោក ម៉ម សូណង់ដូ ពីពន្ធនាគារ។
ក្រុមអ្នកតវ៉ាអះអាងថា លោក ម៉ម សូណង់ដូ ពុំមានកំហុស និងពុំបានប្រព្រឹត្តបទល្មើសព្រៃឈើ ដូចដែលចៅក្រមនៃសាលាឧទ្ធរណ៍ ធ្វើការចោទប្រកាន់នោះឡើយ។
លោក អំ សំអាត មន្ត្រីស៊ើបអង្កេតជាន់ខ្ពស់ នៃអង្គការលីកាដូ ដែលបានចូលរួមស្តាប់សវនាការ បានមានប្រសាសន៍ប្រាប់ក្រុមអ្នកយកព័ត៌មានថា
តុលាការនៅថ្ងៃទី១៤ ខែមីនា ឆ្នាំ ២០១៣ នេះ បានសម្រេចធ្វើការលុបបទចោទប្រកាន់លើលោក ម៉ម សូណង់ដូ ពីបទធ្វើកុបកម្ម និងញុះញង់ ឲ្យប្រជាពលរដ្ឋកាន់កាប់អាវុធប្រឆាំងនឹងអ្នករាជការសាធារណៈ មកជាបទល្មើសព្រៃឈើវិញ ដោយយោងតាមមាត្រា ៩៧ ចំណុចទី៦ និងបទជ្រៀតជ្រែកដោយខុសច្បាប់លើមុខងារអ្នកសាធារណៈ និងបទប្រឆាំងនឹងអ្នករាជការសាធារណៈ ដោយស្ថានភាពទំងន់ទោស។
លោក អំ សំអាត បានបន្តថា លោកសុំស្វាគមន៍នូវចំណាត់ការរបស់សាលាឧទ្ធរណ៍ ប៉ុន្តែទោះជាយ៉ាងណា ក៏លោកនូវយល់ឃើញថា ករណីលោក ម៉ម សូណង់ដូ មិនបានប្រព្រឹត្តដូចការចោទប្រកាន់របស់តុលាការនោះទេ។ ករណីទាំងនេះ វាជាការសោកស្តាយទោះបីជារូបលោកដល់ថ្ងៃត្រូវចេញក៏ដោយ ក៏លោកនៅតែទទួលទោសនូវការចោទប្រកាន់ដដែល។
លោក អំ សំអាត ក៏បានសម្តែងនូវតែសោកស្តាយ ចំពោះមនុស្សដែលមិនបានប្រព្រឹត្តខុស ត្រូវបានតុលាការចោទប្រកាន់ បើទោះបីជារូបលោក ត្រូវបានតុលាការដោះលែងក៏ដោយ តែសិទ្ធិសិរីភាពរបស់ លោក ម៉ម សូណង់ដូ ប្រធានវិទ្យុសំបុកឃ្មុំ ត្រូវបានបិទសិទ្ធិសិរីភាព និងស្ថិតនៅក្រោមការឃ្លាំមើលរបស់តុលាការ។
ចំណែកមេធាវីការពារក្តីរបស់លោក ម៉ម សូណង់ដូ លោក ស សូវ៉ាន បានមានប្រសាសន៍ថា ចំពោះរូបលោកផ្ទាល់ មានការសប្បាយចិត្ត នៅពេលដែលឃើញសាលាឧទ្ធរណ៍ បានលុបចោលនូវការចោទប្រកាន់អំពីបទឧក្រិដ្ឋពីបទកុបកម្ម។ តែបែរលោកមេធាវី ក៏បង្ហាញការមិនពេញចិត្ត ចំពោះតុលាការសាលាឧទ្ធរណ៍ ដែលចោទប្រកាន់លោក ម៉ម សូណង់ដូ ពីបទល្មើសព្រៃឈើ ដោយផ្តន្ទាទោស ៥ ឆ្នាំ។
សូមជម្រាបថា ក្រោយពីចៅក្រមប្រកាសសាលដីការួច លោក ម៉ម សូណង់ដូ ត្រូវបានសន្តិសុខពន្ធនាគារ នាំចូលបន្ទប់រង់ចាំ ដោយមិនអនុញ្ញាតផ្តល់បទសម្ភាសន៍ជាមួយអ្នកសារព័ត៌មាននោះទេ។ លោក ម៉ម សូណង់ដូ ត្រូវបានឃុំនៅក្នុងបន្ទប់រង់ចាំ ប្រហែលជា ២ ម៉ោង ទើបបណ្តើរលោក ដោយដៃដាក់ខ្នោះ ជាមួយនឹងអ្នកទោសជាច្រើនទៀត ចេញពីតុលាការសាលាឧទ្ធរណ៍ ទៅកាន់ឡានដឹកអ្នកទោស ទៅកាន់ពន្ធនាគារព្រៃស។
លោក ម៉ម សូណង់ដូ បាននិយាយយ៉ាងខ្លីទៅកាន់អ្នកកាសែតថា នៅពេលនេះ រូបលោកមិនទាន់មានសេរីភាពពេញលេញនៅឡើយនោះទេ ហើយក៏មិនអាចនិយាយបានទេ។ លោកថា រង់ចាំជួបគ្នា នៅថ្ងៃស្អែក ពេលគេដោះលែងរូបលោក។
មានអាយុ ៧២ ឆ្នាំ លោក ម៉ម សូណង់ដូ ត្រូវបានតុលាការក្រុងភ្នំពេញ សម្រេចផ្តន្ទាទោសលោក ម៉ម សូណង់ដូ ដាក់ពន្ធនាគារ ២០ ឆ្នាំ ក្នុងរឿងបង្កើតតំបន់អបគមន៍ ប្រឆាំងនឹងរដ្ឋាភិបាល។ លោក ម៉ម សូណង់ដូ ត្រូវបានចោទប្រកាន់ថា ជាមេគំនិតក្នុងរឿងបង្កើតតំបន់អបគមន៍ បះបោរ បង្កើតកម្លាំងតស៊ូ ប្រឆាំងរដ្ឋាភិបាល។
ក៏ប៉ុន្តែការចោទប្រកាន់ទាំងនោះ ត្រូវបានលោក ម៉ម សូណង់ដូ និងសង្គមស៊ីវិល ច្រានចោល ហើយក៏មិនមានភស្តុតាងគ្រប់គ្រាន់ដើម្បីយកមកធ្វើសំអាងប្រឆាំងនឹងលោក ម៉ម សូណង់ដូ ព្រមទាំងអ្នកភូមិផ្សេងទៀតឡើយ៕
No comments:
Post a Comment
yes