កុមារនៅតំបន់បឹងកក់ ដែលរស់នៅរងទុក្ខលំបាកក៏មានសិទ្ធិតវ៉ាដែរ
ភ្នំពេញៈ កុមារប្រមាណ ៥០នាក់មកពីតាមបណ្តាខេត្ត-ក្រុង ចំនួន១៦ នៅទូទាំងប្រទេស បានជួបជុំគ្នាបង្ហាញពីក្តីកង្វល់និងបញ្ហាដែលពួកគេកំពុងជួប ប្រទះសព្វថ្ងៃ ដើម្បីចងក្រងជាអនុសាសន៍សម្រាប់ដាក់បញ្ចូលទៅក្នុងសេចក្តីថ្លែង ការណ៍រួមផ្ញើទៅកាន់វេទិកាប្រជាពលរដ្ឋអាស៊ានឆ្នាំ២០១៣ ដែលគ្រោងនឹងរៀបចំធ្វើនៅប្រទេសប៊្រុយណេ។
វេទិកានេះរៀបចំ ឡើងដោយសម្ពន្ធ័អង្គការមិនមែនរដ្ឋាភិបាលដើម្បីសិទ្ធិកុមារ ក្នុងបំណងផ្តល់ឱកាសឲ្យកុមារបង្ហាញពីកង្វល់របស់ខ្លួន និងដាក់ចេញនូវអនុសាសន៍ ជូនថ្នាក់ដឹកនាំអាស៊ានជួយរកដំណោះស្រាយ។
លោកស្រី ឃឹម សុខារី ប្រធានគណៈកម្មាធិការប្រតិបត្តិនៃសម្ព័ន្ធអង្គការមិនមែនរដ្ឋាភិបាល ដើម្បីសិទ្ធិកុមារបានថ្លែងថា ឆ្នាំនេះជាលើកទី២ហើយដែលសម្ព័ន្ធអង្គការមិនមែនរដ្ឋាភិបាលដើម្បី សិទ្ធិកុមាររៀបចំពិធីនេះឡើង ហើយដើម្បីធ្វើឲ្យជីវិតកុមារបានប្រសើរឆ្នាំនេះកិច្ចធ្វើក្រោម ប្រធានបទ«ធ្វើឲ្យការចូលរួមដោយពេញលេញរបស់កុមារ ក្នុងអាស៊ានក្លាយជាកាពិត»។
លោកស្រីបញ្ជាក់ថា៖«ជាអនុសាសន៍ឬសំណូមពររបស់កុមារ ដែលលើកឡើងពីក្តីកង្វល់និងបញ្ហាពួកគេ គោលដៅសំខាន់គឺ សម្រាប់បញ្ចូលបញ្ហាទាំងនោះទៅក្នុងសេចក្តីថ្លែងការណ៍រួមគឺ ដើម្បីស្វែងរកដំណោះស្រាយក្នុងការលើកកម្ពស់ការលើកតម្លៃនៃការ ចូលរួមរបស់កុមារស្របតាមអនុសញ្ញាអង្គការសហប្រជាជាតិដែល គ្រប់គ្នាត្រូវយកចិត្តទុកដាក់»។
កុមារី រស់ ស្រីនិត អាយុ១៥ឆ្នាំ រៀនថ្នាក់ទី១០ មកពីខេត្តពោធិ៍សាត់និយាយថា នៅក្នុងសហគមន៍ដែលនាងរស់នៅ កុមារភាគច្រើនបោះបង់ចោលការសិក្សា ធ្វើចំណាកស្រុក កុមារខ្លះរងអំពើហិង្សា ខ្វះខាតក្នុងការរៀនសូត្រ រើសអេតចាយ...ជាដើម។
នាងមាន សង្ឃឹមថា អាស៊ាននឹងធ្វើការដោះស្រាយទៅលើបញ្ហាលុបបំបាត់ពលកម្មកុមារ ពិសេសការថតរូបអាសអាសភាសកុមារ និងបញ្ហាជាច្រើនដែល កុមារកំពុងតែជួបប្រទះ។ កុមារីរូបនេះស្នើថា៖«សូម រដ្ឋាភិបាល និងថ្នាក់ដឹកនាំផ្សេងៗទៀត មេត្តាយកចិត្តទុកដាក់ទៅលើកុមារឲ្យបានកាន់តែច្រើនជាងមុន និងសូមជួយដោះស្រាយរាល់បញ្ហាកុមារទាំងអស់ផង ព្រោះ កុមារមានសារៈសំខាន់ណាស់សម្រាប់ប្រទេសជាតិ»។
ប្រទេសកម្ពុជា ចូលជាសមាជិកនៃអនុសញ្ញាសិទ្ធិកុមារ នៅថ្ងៃទី២២ ខែកញ្ញា ឆ្នាំ១៩៩២ និងក្លាយជារដ្ឋភាគីនៃអនុសញ្ញានេះ នៅថ្ងៃទី១៥ ខែតុលា និងផ្តល់សច្ចាប័នលើពិធីសារបន្ថែមចំនួនពីរនៃអនុសញ្ញាសិទិ្ធកុមារ គឺស្តីពីការចូលរួមរបស់កុមារក្នុងជម្លោះប្រដាប់អាវុធនិងការជួញ ដូរកុមារ ការធ្វើពេស្យាកម្មកុមារ និងរូបភាពអាសអាភាសនៅឆ្នាំ២០០២ រួមទាំងពិធីសារស្តីពីការទប់ស្កាត់ ការបង្ក្រាប ការដាក់ទណ្ឌកម្ម ការជួញដូរមនុស្ស ជាពិសេសស្រ្តី និងកុមារ ក្នុងនោះអនុសញ្ញាក្រុងឡាអេស្តីពីកិច្ចការពារកុមារនិងសហប្រតិបត្តិការទាក់ទងនឹងស្មុំកូនអន្តរប្រទេស អនុសញ្ញាអន្តរជាតិ និងពិធីសារមួយចំនួនទៀត។
លោក អ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជននិងយុវនីតិសម្បទា បានថ្លែងថា ៖«ក្នុងនាមប្រទេសហត្ថលេខី យើងត្រូវតែមានកាតព្វកិច្ចគោរពនិងអនុវត្តតាមបទប្បញ្ញត្តិទាំង ឡាយ ដែលចែងក្នុងអនុសញ្ញាសិទ្ធិកុមារ និងពិធីសារបន្ថែមនៃអនុសញ្ញានេះ ដើម្បីលើកស្ទួយនិងការពារសិទ្ធិកុមារ»។ លោកបន្តថា រដ្ឋាភិបាលក៏មានកាតព្វកិច្ចសំខាន់មួយទៀត គឺធ្វើរបាយការណ៍ស្តីពីការរីកចម្រើននៃការអនុវត្តពិធីសារបន្ថែម នៃអនុសញ្ញាសិទ្ធិកុមារ ជូនគណៈកម្មាធិការសិទ្ធិកុមារនៃអង្គការសហប្រជាជាតិផងដែរ៕
No comments:
Post a Comment
yes