ប្រជាពលរដ្ឋសហគមន៍ជនជាតិដើមភាគតិចទំពួន ភូមិស៊ូ ឃុំស៊ឺង ស្រុកបរកែវ ខេត្តរតនគិរី នៅថ្ងៃអាទិត្យ ទី២៦ ខែឧសភា ឆ្នាំ២០១៣ អំពាវនាវឲ្យអាជ្ញាធរខេត្តចាត់វិធានការជាបន្ទាន់ ទៅលើមនុស្ស ៦នាក់ ដែលជាប់ពាក់ព័ន្ធកាប់រានព្រៃឈើសហគមន៍ការពារ ដើម្បីយកដីជាកម្មសិទ្ធិខុសច្បាប់។
សេចក្តីអំពាវនាវនេះ ធ្វើឡើងបន្ទាប់ពីតំណាងសហគមន៍ធ្វើដំណើរមកការិយាល័យសមាគមការពារសិទ្ធិមនុស្សអាដហុក (ADHOC) ខេត្តរតនគិរី កាលពីថ្ងៃសុក្រ ទី២៤ ខែឧសភា សុំឲ្យមន្ត្រីសមាគមជួយអន្តរាគមន៍ពាក្យប្ដឹងអ្នកភូមិ ទៅស្ថាប័នអយ្យការស៊ើបអង្កេតរកអ្នកបំផ្លាញព្រៃឈើនេះ មកផ្ដន្ទាទោសតាមផ្លូវច្បាប់។
យោងតាមពាក្យបណ្ដឹងរបស់អ្នកភូមិ បានប្ដឹងមនុស្ស ៦នាក់ថាជាអ្នកកាប់រានព្រៃសហគមន៍អស់គ្មានសល់ តាំងពីឆ្នាំ២០១១ រហូតបច្ចុប្បន្ន។ មនុស្សទាំង ៦នាក់ រួមមាន មន្ត្រីនគរបាលប៉ុស្តិ៍រដ្ឋបាលឃុំស៊ឺង លោក សុខ មុត និងអតីតយោធាស្រុក លោក ទី ផល្លី រួមទាំងប្រជាពលរដ្ឋភូមិចែត្រ ៤នាក់ គឺលោក រម៉ាស យ៉ាល់ លោក រម៉ាស បាន លោក រម៉ាម មេន និងលោក រម៉ាស ទឿង។
ប្រធានសហគមន៍លោក ក្លោង សាង មានប្រសាសន៍បញ្ជាក់ថា សហគមន៍បានរាយការណ៍ និងសុំកិច្ចអន្តរាគមន៍ពីមន្ត្រីមូលដ្ឋានឃុំស្រុកចំនួនបីលើករួចហើយ ប៉ុន្តែមិនឃើញសមត្ថកិច្ចណាអាចបញ្ឈប់សកម្មភាពកាប់ព្រៃសហគមន៍នេះបានឡើយ។ លោកបន្តថា ព្រៃឈើជាង ៧០ហិកតារ នេះ មន្ត្រីអាជ្ញាធរពាក់ព័ន្ធគូសផែនទី និងចេញលិខិតទទួលស្គាល់ជាព្រៃការពាររបស់សហគមន៍ផ្លូវការ៖ «សហគមន៍ទប់អត់ឈ្នះ បើឃុំជួយក៏ទប់អត់ឈ្នះដែរ ចាប់ម៉ាស៊ីន ហើយក៏ទប់អត់ឈ្នះដែរ»។
ប្រធានភូមិស៊ឺង លោក ទីង ខុនសែ មានប្រសាសន៍បញ្ជាក់ថា លោកបានចូលរួមជាមួយសហគមន៍ ប្ដឹងទៅតុលាការ ពីព្រោះមន្ត្រីអាជ្ញាធរមិនមានលទ្ធភាពទប់ស្កាត់ ឬបង្ក្រាបករណីនេះបាន។ លោកបន្តថា មន្ត្រីជំនាញព្រៃឈើ បានចុះទៅពិនិត្យករណីនេះ ប៉ុន្តែព្រៃការពារទាំងអស់ត្រូវគេកាប់រំលំ គ្រោងនឹងដុតរាននៅពេលខាងមុខនេះ៖ «ព្រៃតំបន់ការពារអភិរក្ស ព្រៃស្រោងទៀត។ ភូមិគេដោះស្រាយហើយ។ ឃុំ និងឃុំ គេដោះស្រាយហើយ ប៉ុន្តែបុគ្គល ៦នាក់ហ្នឹង»។
ចំណែកមេឃុំស៊ឺង លោក ប៉ែន សុផុន មានប្រសាសន៍ទទួលស្គាល់ថា ព្រៃសហគមន៍ពិតជាត្រូវគេកាប់រានអស់មែន ក៏ប៉ុន្តែលោកបញ្ជាក់ថា បានរាយការណ៍ជូនអាជ្ញាធរស្រុកអស់ហើយ ពីព្រោះអាជ្ញាឃុំមិនមានសមត្ថភាពទប់ស្កាត់ករណីនេះបាន៖ «គេកាប់ឡើងខ្ទេចអស់តែម្តង ខ្ញុំរាយការណ៍ជូនស្រុកអស់ហើយ មិនដឹងម៉េចទៀត គាត់ធ្វើការយឺតយ៉ាវ»។
ឆ្លើយតបបញ្ហានេះ នាយរងខណ្ឌរដ្ឋបាលព្រៃឈើ ខេត្តរតនគិរី លោក ផាន់ ភិន មានប្រសាសន៍ថា មន្ត្រីសង្កាត់ព្រៃឈើបានធ្វើរបាយការណ៍ស្ដីពីសកម្មភាពកាប់រានព្រៃសហគមន៍ មកខណ្ឌរដ្ឋបាលព្រៃឈើអស់ហើយ។ លោកបន្តថា នឹងចាត់វិធានការផ្លូវច្បាប់ចំពោះក្រុមអ្នកពាក់ព័ន្ធកាប់រានព្រៃឈើនេះ៖ «សង្កាត់ចុះធ្វើហើយ យើងនឹងចាត់ការតាមលិខិតរបស់រដ្ឋាភិបាល។ ការងារនឹងធ្វើ ចាំមេគាត់មក»។
មន្ត្រីផ្នែកអង្កេតសមាគមអាដហុក ខេត្តរតនគិរី លោក មាន ព្រហ្មមុនី ចាត់ទុកទង្វើនេះជាបទល្មើសបំផ្លាញព្រៃឈើធ្ងន់ធ្ងរមួយទៀត ក្នុងឆ្នាំ២០១៣។ លោកបន្តថា មន្ត្រីព្រៃឈើ និងមន្ត្រីមូលដ្ឋាន គឺជាអ្នកទទួលខុសត្រូវ ដែលបណ្ដែតបណ្តោយឲ្យព្រៃឈើត្រូវគេកាប់រានដោយមិនចាត់វិធានការបង្ក្រាបឲ្យទាន់ពេលវេលា៖ «យើងសោកស្ដាយ ដោយសារអាជ្ញាធរមូលដ្ឋាន មន្ត្រីជំនាញ ការដោះស្រាយរបស់គាត់ខ្វះការពង្រឹងច្បាប់ ទទួលខុសត្រូវខ្ពស់ យឺតយ៉ាវមែនទែន។ សហគមន៍ គាត់បានយល់ថា សុខចិត្តធ្វើតាមខ្សែបណ្តោយ តាមលំដាប់ពីអាជ្ញាធរមូលដ្ឋានមក។ គាត់សុខចិត្តនៅពន្យារពេលដល់ថ្ងៃនេះ រហូតអស់ព្រៃរលីង»។
របាយការណ៍អង្កេតរបស់មន្ត្រីសមាគមអាដហុក ឲ្យដឹងនៅឆ្នាំ២០១៣ នេះថា ព្រៃឈើសហគមន៍ភូមិឡំ ស្រុកអូរយ៉ាដាវ រាប់រយហិកតារ ត្រូវក្រុមហ៊ុនសម្បទានឈូសឆាយ និងឈើមានតម្លៃរាប់ពាន់ដើមក្នុងដែនជម្រកសត្វព្រៃលំផាត់ ត្រូវគេកាប់ដោយបំពានច្បាប់ ហើយមិនទាន់ឃើញជនប្រព្រឹត្តល្មើសណាម្នាក់ត្រូវផ្ដន្ទាទោស៕
No comments:
Post a Comment
yes