រាជធានីភ្នំពេញ ៖ តុលាការបានចេញដីកា កោះហៅនាយកវិទ្យាស្ថានអភិវឌ្ឍន៍និស្សិត លោក គា បូរ៉ាត់ ឲ្យចូលឆ្លើយបំភ្លឺនៅរសៀលថ្ងៃទី២ ខែឧសភា ឆ្នាំ២០១៣ ដើម្បីសាកសួរបន្ទាប់ ក្រោយពីមានពាក្យបណ្តឹង ដែលចោទលើជនសង្ស័យរូបនេះ និងបក្ខពួកថា បានយកកាំភ្លើងភ្ជង់ និងវាយ បង្ករបួសស្នាមទៅលើស្រីម្នាក់ កាលពីដើមខែមេសា ឆ្នាំ២០១៣ កន្លងទៅ។
តាមដីកាកោះហៅរបស់លោក ជេត ខេមរា ព្រះរាជអាជ្ញារងអមសាលាដំបូង ចុះថ្ងៃទី២៤ ខែមេសា ឆ្នាំ២០១៣ បានកោះហៅឈ្មោះ គា បូរ៉ាត់ ភេទប្រុស នាយកវិទ្យាស្ថាន អភិវឌ្ឍន៍និស្សិត ជាជនសង្ស័យ ស្នាក់នៅផ្ទះលេខ២១ ផ្លូវលេខ១១ បុរីពិភពថ្មី សង្កាត់ដង្កោ ខណ្ឌដង្កោ ឲ្យចូលខ្លួនទៅតុលាការ នៅម៉ោង១៥ និង៣០នាទី រសៀលថ្ងៃទី២ ខែឧសភា ឆ្នាំ២០១៣ ដើម្បីសាកសួរពីដំណើររឿង តាមបណ្តឹងរបស់ឈ្មោះ ភួង ណាវុធ្ធ និងប្រពន្ធឈ្មោះ នួន សាន ដែលបានចោទប្រកាន់ជនសង្ស័យ គា បូរ៉ាត់ និងភរិយា ព្រមទាំងបក្សពួកម្នាក់ទៀតថា បានប្រើប្រាស់អំពើហិង្សាដោយចេតនា និងប្រើប្រាស់អាវុធជាតិផ្ទុះ ដោយគ្មានការអនុញ្ញាត បំពានលើដើមបណ្តឹង នៅចំណុចផ្ទះលេខ 5D ផ្លូវលេខ២៦៥ ក្រុម៣៣ ភូមិ១៣ សង្កាត់ទឹកល្អក់៣ ខណ្ឌទួលគោក កាលពីថ្ងៃទី០៧ ខែមេសា ឆ្នាំ២០១៣ ។
យោងតាមរបាយការណ៍ សំយោគរបស់អធិការដ្ឋាននគរបាលខណ្ឌទួលគោក បានបញ្ជាក់ឲ្យដឹងថា កាលពីម៉ោង១០និង៣០នាទី ព្រឹកថ្ងៃទី០៧ ខែមេសា ឆ្នាំ២០១៣ ឈ្មោះ គា បូរ៉ាត់ និងប្រពន្ធ ឈ្មោះ ភ័ណ្ឌ បានជិះរថយន្តហាយឡិនឌ័រ រួមជាមួយនឹងបក្ខពួកម្នាក់ទៀត ភេទប្រុសជិះម៉ូតូម៉ាក FTR បានមកផ្ទះជនរងគ្រោះឈ្មោះ ភួង ណាវុធ្ធ។ ពេលមកដល់ឈ្មោះ ភួង ណាវុធ្ធ ក៏បានហៅឲ្យភ្ញៀវទាំង៣នាក់ ចូលក្នុងផ្ទះ ហើយនិយាយពិភាក្សារឿង រកស៊ីរត់ការធ្វើប្លង់ដីឲ្យគេ។
ប្រភពដដែលបានឲ្យដឹងថា ពេលនោះការជជែកគ្នា មិនចុះសម្រុងក៏មានទំនាស់ពាក្យសំដី ហើយឈ្មោះ ភួង ណាវុធ្ធ ក៏បានដេញភ្ញៀវចេញផុតពីមាត់ទ្វារ ស្រាប់តែបក្ខពួករបស់ឈ្មោះ គា បូរ៉ាត់ បានដកកាំភ្លើងខ្លី អាមេបញ្ចូលគ្រាប់ភ្ជង់ គម្រាម ឈ្មោះ ភួង ណាវុធ្ធ។ បន្ទាប់មកឈ្មោះ នួន សាន ជាប្រពន្ធក៏បានចេញពីក្នុងផ្ទះ មកសួរនាំ ពីរឿងហេតុដែលគេដកកាំភ្លើងភ្ជង់ប្តី ហើយភ្លាមនោះ ស្រាប់តែ ឈ្មោះភ័ណ្ឌ ជាប្រពន្ធឈ្មោះ គា បូរ៉ាត់ បានយកមួកការពារ សុវត្ថិភាព ទៅវាយលើក្បាល និងផ្ទៃមុខរបស់ឈ្មោះ នួន សាន បណ្តាលឲ្យរងរបួស។ ពេលធ្វើសកម្មភាពរួចក្រុមជនដៃដល់ បានជិះរថយន្តនិង ម៉ូតូគេចខ្លួនអស់ មុនពេលប៉ូលិសមូលដ្ឋានទៅដល់កន្លែងកើតហេតុ។
នគរបាលបានសន្និដ្ឋានថា នាយកវិទ្យាស្ថានអភិឌ្ឍន៍ធនធាននិស្សិត លោក គា សារ៉ាត់ និងបក្ខពួកពិតជាបានប្រព្រឹត្តិបទល្មើស ហិង្សាដោយចេតនា និងប្រើប្រាស់អាវុធជាតិផ្ទុះ ដោយគ្មានការអនុញ្ញាត ទៅលើជនរងគ្រោះពិតប្រាកដមែន ហើយបានបញ្ជូនសំណុំរឿងទៅតុលាការ ។
តុលាការក៏បានចេញដីការកោះហៅនាយកវិទ្យាស្ថានអភិឌ្ឍន៍ធនធាននិស្សិត លោក គា សារ៉ាត់ ចូលបំភ្លឺនៅរសៀលថ្ងៃនេះ៕
No comments:
Post a Comment
yes