អ្នកភូមិអង្គុយរង់ចាំដំណោះស្រាយ នៅក្រោមដើមពោធិ៍មុខវត្តបទុមវតី
ពលរដ្ឋប្រមាណជិត ១០០នាក់តំណាងឲ្យ ១៣៧ គ្រួសារនៅក្នុងខេត្តបាត់ដំបងបាននាំគ្នាឡើងមកតវ៉ានៅរាជធានីភ្នំពេញដើម្បីស្នើសុំកិច្ចអន្តរាគមន៍ពីលោកនាយករដ្ឋមន្ត្រីហ៊ុន សែន បន្ទាប់ពីដីស្រែចម្ការរបស់ពួកគាត់ជាង ៥០០ ហិកតា ត្រូវបានអាជ្ញាធរ ដកហូតយកទៅឲ្យអ្នកចំណូលថ្មី។
ប្រជាពលរដ្ឋទាំងនេះបានមកប្រមូលផ្តុំគ្នានៅមុខវត្តបទុមវតី ជិតភូមិគ្រិះលោកនាយករដ្ឋមន្ត្រីហ៊ុន សែន កាលពីថ្ងៃពុធ ហើយក្រុមការងាររបស់ខុទ្ទកាល័យលោកនាយករដ្ឋមន្ត្រី បានចុះមកទទួលយកញត្តិរបស់ពួកគាត់ដើម្បីដាក់ជូនថ្នាក់លើពិនិត្យរកដំណោះស្រាយ។ ប៉ុន្តែកាលពីថ្ងៃព្រហស្បតិ៍ម្សិលមិញ ប្រជាពលរដ្ឋទាំងនោះបាននាំគ្នាមកប្រមូលផ្តុំនៅមុខវត្តបទុមវតីម្តងទៀតតែមិនមានវត្តមានមន្ត្រីណាម្នាក់មកជួបជាមួយពួកគាត់ទៀតឡើយ។
លោកអ៊ុល យ៉ាន់ អាយុ ៥១ឆ្នាំបានថ្លែងថា អាជ្ញាធរឃុំ និងស្រុក បានឃុបឃិតគ្នារំលោភយកដីស្រែដីចម្ការរបស់ពួកគាត់ចំនួន ៥២៧ ហិកតាស្ថិតនៅក្នុងឃុំបឹងប្រាំ ឃុំអម្ពិល៥ដើម ស្រុកបវេល និងឃុំបួរ ស្រុកភ្នំព្រឹក ហើយវាស់វែងដីទាំងនោះចែកឲ្យពលរដ្ឋចំណូលថ្មីនៅក្នុងឆ្នាំ ២០១៣នេះ។ លោកអ៊ុល យ៉ាន់បញ្ជាក់ថា៖«យើងខ្ញុំភាគច្រើនជាពលរដ្ឋធ្វើសមាហរណកម្មពីការគ្រប់គ្រងរបស់ខ្មែរក្រហម ចូលមកក្នុងរដ្ឋាភិបាល ហើយបានចូលកាន់កាប់ដីទាំងនោះចាប់ពីឆ្នាំ ១៩៩៨ មក។ ប៉ុន្តែមេឃុំបានដកហូតនិងឲ្យក្រុមនិស្សិតវាស់វែងដីនេះឲ្យអ្នកចំណូលថ្មីទៅវិញ»។
អ្នកភូមិទាំងនេះ ក៏បានបង្ហាញខ្សែវីដេអូឃ្លីបដែលថតពីសកម្មភាពដែលពួកគាត់ជាម្ចាស់ដីឈ្លោះប្រកែកគ្នា និងប្រឆាំងជំទាស់ទៅការវាស់វែងដីពួកគាត់ពីសំណាក់ក្រុមនិស្សិតស្ម័គ្រចិត្តនិងអាជ្ញាធរចាប់ពីថ្នាក់ឃុំឡើងទៅហើយក៏កំពុងបិទប្រកាសក្បាលដីទាំងនោះផងដែរ។
លោកវ៉ន ធួក មេភូមិបឹងពពូលដែលត្រូវបាត់ដីផងដែរនោះបានថ្លែងថា៖«ពលរដ្ឋនាំគ្នាតវ៉ាតែប៉ូលិសចោទខ្ញុំថា ជាអ្នកដឹកនាំ ហើយបានហៅខ្ញុំឲ្យផ្តិតមេដៃឈប់ដឹកនាំពលរដ្ឋតវ៉ាទៀត។ បើមិនអ៊ីចឹងទេគេនឹងចាប់ដាក់គុកមិនខាន»។ ប្រជាពលរដ្ឋទាំងនេះមានដីចាប់ពី១ហិកតារហូតដល់៥ហិកតាសម្រាប់ធ្វើស្រែចម្ការដើម្បីចិញ្ចឹមជីវិត។ ប៉ុន្តែពេលនេះអស់ដីមិនដឹងសង្ឃឹមអ្វីទៀតនោះទេ។
លោក អ៊ុល យ៉ាន់ បានថ្លែងដូច្នេះថា៖«រដូវដាំដុះបានចូលមកដល់ហើយតែយើងគ្មានដីធ្វើស្រែទេ។ បើមួយអាទិត្យទៀតនៅតែគ្មានដំណោះស្រាយពួកយើងមានតែចូលទៅធ្វើស្រែលើដីចាស់នោះតែម្តង។ បើមានអំពើហិង្សាដាក់គ្នាក៏មានទៅ។ សុខចិត្តស្លាប់រស់លើដីហើយ»។
ប៉ុន្តែ លោក ឈា នី មេឃុំបឹងប្រាំបានច្រានចោលការចោទប្រកាន់របស់ប្រជាពលរដ្ឋទាំងនេះ។ លោកបានថ្លែងថា៖«ពួកគាត់ខ្លះមកពីបណ្តាខេត្តផ្សេងៗ ហើយបានកាប់រានដីព្រៃរដ្ឋដោយខុសច្បាប់»។ លោកមេឃុំបានបន្ថែមថាកាលពីថ្ងៃទី៥ខែកញ្ញាឆ្នាំ២០១១ រដ្ឋាភិបាលបានផ្តល់ដីសម្បទានសង្គមកិច្ចចំនួន ៣៦៣៨ ហិកតា។ ដីសម្បទាននេះ ជាន់លើដី ប្រជាពលរដ្ឋដែលបានកាន់កាប់ខុសច្បាប់ទាំងនោះ។ លោកបន្តថា ដីសម្បទានសង្គមកិច្ចទំហំ ៣៦៣៨ ហិកតានេះ ត្រូវបានផ្តល់ជូនប្រជាពលរដ្ឋក្រីក្រ និងគ្រួសារកងទ័ព ដោយមានទាំងធ្វើសាលារៀនផ្លូវថ្នល់និងមន្ទីរពេទ្យជាដើម អស់សរុប ២៩៨០ ហិកតា។ សល់ប៉ុន្មានបានវាស់វែងបែងចែកឲ្យពលរដ្ឋអ្នកតវ៉ាទាំងនោះបានខ្លះប៉ុន្តែពួកគាត់មិនពេញចិត្ត ព្រោះចង់បានច្រើនដែលអាជ្ញាធរមិនមានដីចែកឲ្យទៀតទេ៕
No comments:
Post a Comment
yes