ក្រុមហ៊ុនបានបើកការដ្ឋានសាងសង់កាលពីថ្ងៃអង្គារ ដែលមានទីតាំងនៅក្នុងមជ្ឈមណ្ឌលកម្សាន្តកោះពេជ្រ។
ក្នុងគោលបំណងផ្តល់ជូនសេវាអប់រំកម្រិតស្តង់ដារសម្រាប់ប្រជាជនក្នុងស្រុកដែលមានជីវភាពធូរធារនិងសិស្សបរទេសដែលកំពុងរស់នៅក្នងទីក្រុងភ្នំពេញ សាលាអន្តរជាតិ CISP នេះ ត្រូវបានវិនិយោគនិង គ្រប់គ្រងដោយ លោកស្រី ពុង ការ៉ូលីន កូនស្រីរបស់ លោក ពុង ឃាវសែ ដែលជាពាណិជ្ឋករល្បីឈ្មោះម្នាក់នៅកម្ពុជា។
លោកស្រី ដូណា ត្រាហ្វដ អគ្គនាយិកា សាលាអន្តរជាតិ CISP ឲ្យដឹងថា ការវិនិយោគសាលាលំដាប់អន្តរជាតិមួយនេះនៅកម្ពុជា គឺដើម្បីសម្រួលដល់ការសិក្សាសម្រាប់សិស្សចាប់ពីអាយុ១៨ ខែ ដល់១៨ ឆ្នាំ ពោលគឺចាប់ពីមត្តេយ្យសិក្សាដល់ថ្នាក់ទី១២។ លោកស្រីបន្តថា៖ «យើងមានគោលបំណងដើម្បីផ្តល់ប្រព័ន្ធអប់រំកម្រិតស្តង់ដារដល់សិស្សានុសិស្សជាតិនិង អន្តរជាតិ ដែលមានជាតិសាសន៍ផ្សេងៗគ្នា។ យើងចង់បណ្តុះគំនិតក្មេងឲ្យស្រឡាញ់ការសិក្សាមានសមត្ថភាពឯករាជ្យ និងមានទំនុកចិត្តក្នុងការបន្តក្តីសុបិននិងគោលដៅរបស់ពួកគេ»។
អគារសាលានេះត្រូវបានសាងសង់លើផ្ទៃដីសរុបជាង៣ហិកតា។ នេះបើតាមលោក ទូច សំណាង អគ្គនាយករង ក្រុមហ៊ុន OCIC។
លោកឲ្យដឹងថាអគារសិក្សានេះមានកម្ពស់៤ជាន់នឹងសាងសង់រួចរាល់នៅពាក់កណ្តាលឆ្នាំ ២០១៥។
តាមសេចក្តីប្រកាសព័ត៌មានរបស់ក្រុមហ៊ុន OCIC អគារថ្មីនេះគឺជាការវិនិយោគជំហានទីពីរហើយចាប់តាំងពីក្រុមហ៊ុនបានចាប់ផ្តើមវិនិយោគលើវិស័យសេវាអប់រំ ខណៈជំហានទីមួយត្រូវបានសាងសង់រួចរាល់ហើយកំពុងដំណើរការក្នុងទម្រង់ជាសាលាមត្តេយ្យសិក្សា CISP នៅក្នុងបុរីបាសាក់។
លោក ប៉ិច បូឡែន ប្រធានក្រុមប្រឹក្សាភិបាលក្រុមហ៊ុន Westline Education Group ដែលវិនិយោគលើសាលាចំណេះដឹងទូទៅវេស្ទឡាញ៍ មានប្រសាសន៍ថា សាលាឯកជនកម្រិតអន្តរជាតិ នៅក្នុងរាជធានីកំពុងមានការកើនឡើងគួរឲ្យកត់សម្គាល់នៅប៉ុន្មានឆ្នាំចុងក្រោយនេះ។
លោកបន្តថា ស្ថានភាពសេដ្ឋកិច្ចគ្រួសាររបស់ប្រជាជនក្នុងរាជធានី និង អត្រាប្រជាជនវ័យក្មេងច្រើនពិសេសក្មេងៗដែលស្ថិតក្នុងវ័យសិក្សា បានជួយជំរុញឲ្យមានកំណើនសាលាដែលមានប្រព័ន្ធអប់រំលំដាប់អន្តរជាតិ។ លោកបន្ថែមថា៖ «វាជាការល្អក្នុងវិស័យអប់រំពេលមានអ្នកផ្គត់ផ្គង់កាន់តែច្រើនចូលមក ព្រោះថាការប្រកួតប្រជែងនឹងជំរុញឲ្យតម្លៃធ្លាក់ចុះ ហើយគុណភាពកាន់តែល្អឡើង។ខ្ញុំមិនបារម្ភថា សាលាថ្មីនេះជាគូប្រកួតប្រជែងទេ»៕
No comments:
Post a Comment
yes