សាលាឧទ្ធរណ៍ នៅថ្ងៃពុធនេះ មិនទាន់សម្រេចយ៉ាងណា លើករណីសកម្មជនដីធ្លី អ្នកស្រី យ៉ោម បុប្ផា ដោយនឹងបន្តសវនាការ នៅថ្ងៃទី១៤ ខែមិថុនា។
ការសម្រេចនេះ ធ្វើឡើងបន្ទាប់ពីសាលាឧទ្ធរណ៍ បានចំណាយពេលមួយរសៀលពេញ ចាប់ពីម៉ោង២រសៀល ដល់ម៉ោង៦ល្ងាច ដោយបានសួរមនុស្សចំនួនបួននាក់ ដែលក្នុងនោះមាន អ្នកស្រី យ៉ោម បុប្ផា ស្វាមីអ្នកស្រី យ៉ោម បុប្ផា និងអ្នកជាប់ពាក់ព័ន្ធ គឺក្រុមអ្នកម៉ូតឌុប ចំនួនពីរនាក់។
ចំណែកនៅខាងក្រៅតុលាការវិញ អ្នកគាំទ្រប្រមាណជា២៥០នាក់ មកពីសហគមន៍បឹកកក់ នៅរសៀលថ្ងៃពុធនេះនាំគ្នាមក សាលាឧទ្ធរណ៍ ដើម្បីលើកទឹកចិត្តសកម្មជនដីធ្លី អ្នកស្រី យ៉ោម បុប្ផា ដែលតុលាការកំពុងសវនាការលើសំណុំរឿង អ្នកស្រី។
អ្នកព័ត៌មានរបស់VOD លោក តាំង វីដា ដែលកំពុងតាមដានស្ថានការណ៍នៅខាងក្រៅសវនាការ រាយការណ៍មកថា ក្នុងការតវ៉ា ក៏មានក្រុមអ្នកប្រឆាំង អ្នកស្រី យ៉ោម បុប្ផា គឺក្រុមអ្នកម៉ូតូឌុប ប្រមាណជា៥០នាក់។
អ្នកភូមិបឹងកក់ បានកាន់បដា និងឧគ្ឃោសនស័ព្ទ ដោយស្រែកសុំឲ្យដោះលែង អ្នកស្រី យ៉ោម បុប្ផា។ អ្នកតវ៉ា មានទាំងចាស់ ក្មេង បានស្រែកច្រៀង និងអ្នកខ្លះ បានយំស្រែក សុំយុត្តិធម៌សម្រាប់សកម្មជនដីធ្លី។
ចំណែក ក្រុមអ្នកម៉ូតូឌុប ក៏បានលើកបដា ដែលមានរូបអ្នករបួសស្នាមដោយការប្រើហិង្សា កាលពីកន្លងទៅ។
សាលាដំបូងរាជធានីភ្នំពេញ កាលពីថ្ងៃទី២៧ ខែធ្នូ ឆ្នាំ២០១២ បានចោទប្រកាន់សកម្មជនដីធ្លីរូបនោះថា ជាអ្នកប្រើហិង្សាវាយបុរសអ្នករត់ម៉ូតូឌុបពីរនាក់ ឲ្យរងរបួស និងត្រូវផ្តន្ទាទោសឲ្យជាប់ពន្ធនាគារ៣ឆ្នាំ ដោយពិន័យជាប្រាក់៦០លានរៀល។ រហូតមកដល់ពេលនេះ អ្នកស្រី យ៉ោម បុប្ផា ត្រូវបានជាប់ពន្ធនាគារ ចំនួន២៧៥ថ្ងៃ៕
No comments:
Post a Comment
yes