អ្នកគាំទ្រគណបក្សសង្គ្រោះជាតិម្នាក់ត្រូវជនល្មើសជាអ្នកគាំទ្រគណបក្សប្រជាជនម្នាក់វាយនឹងដំបងស្លាប់ក្នុងវង់ផឹកស៊ី ពីល្ងាចថ្ងៃទី៥ សីហានៅឃុំ សំរោងធំ ស្រុក កៀនស្វាយ។
ទាំងបងប្អូនជនរងគ្រោះនិងសមត្ថកិច្ច មិនសន្និដ្ឋានថា ការស្លាប់នេះពាក់ព័ន្ធនឹងជម្លោះនិន្នាការនយោបាយឡើយ។ តែមន្ត្រីសមាគម អាដហុក ដែលចុះធ្វើការអង្កេតពីថ្ងៃអង្គារបាន សន្និដ្ឋានថា ទោះការផឹកស៊ីមិនជជែកគ្នារឿងនយោបាយ តែបុរសជាជនល្មើសធ្លាប់គំរាមកំហែងអ្នកភូមិផ្សេងៗ មិនឲ្យលើកស្លាកបក្សប្រឆាំង។
ជនរងគ្រោះដែលត្រូវគេវាយស្លាប់មុខផ្ទះខ្លួន មានឈ្មោះ ជិន វ៉ាន់ដន អាយុ ២៥ ឆ្នាំ រីឯជនល្មើសត្រូវជាឪពុកធំសាច់ថ្លៃឈ្មោះ ចិន ឡុញ អាយុ ៤២ឆ្នាំ ជាសន្តិសុខប្រជាការពារភូមិ ព្រែកត្រែង ៣។ នេះបើតាមការរៀបរាប់របស់ព្រះតេជគុណ ជិន វ៉ាន់ឌី ព្រះជន្ម ២៣ វស្សា ជាប្អូនរបស់ជនរងគ្រោះ កាលពីម្សិលមិញ។
ព្រះតេជគុណ មានសង្ឃដីកាពីផ្ទះបុណ្យបូជាសពជនរងគ្រោះថា ៖ «សពបងប្រុសអាត្មា ត្រូវជនល្មើសវាយចំកញ្ចឹងក ២ ដំបង ឯអ្នកដទៃពេលឃើញជនល្មើសរត់ដេញវ៉ៃគាត់ ស្មានតែជាការលេងសើចផឹកស៊ី មានដឹងថា វាយខ្លាំងរហូតដល់ស្លាប់ឯណា ព្រោះគាត់ធ្លាប់លេងសើចជាមួយគ្នាបែបនេះពីមុនមក»។
លោក លី លីន ជំទប់ ទី១ ឃុំ សំរោងធំ ឲ្យដឹងថា ជនល្មើសរត់គេចខ្លួនបាត់តាំង ១៥ នាទីក្រោយជនរងគ្រោះស្លាប់ មិនដឹងថា គេទៅលាក់ខ្លួននៅទីណាទេ។ លោកថា វង់ផឹកស៊ីមានគ្នា ៥ នាក់ ជនរងគ្រោះនិងជនល្មើសភ្នាល់គ្នាឲ្យផឹកស្រាសម្នាក់ ១៥ លីត្រតែជនរងគ្រោះមិនព្រម និងមានការជជែកតឹងសរសៃកដាក់គ្នា។
លោកថា ៖ «គ្មាននរណាប្រាប់ថា គេជជែកគ្នាពីរឿងគណបក្សឡើយ គ្រាន់តែថាជនរងគ្រោះនេះគ្មានតំណែងអ្វីក្នុងបក្សប្រឆាំងទេ តែវាគាំទ្រខ្លាំងក្លាហើយដើរហែក្បួនគ្រប់ពេលក្នុងយុទ្ធនាការឃោសនា។ ឯជនល្មើស មិនចូលចិត្តអ្នកចេញមុខគាំទ្របក្សប្រឆាំង រហូតដល់ធ្លាប់មានដើរបញ្ជាឲ្យសកម្មជនបក្សប្រឆាំងដោះស្លាកចេញពីមុខផ្ទះទៀតផង»។
ប៉ុន្តែ នគរបាលមូលដ្ឋានបដិសេធថា នេះមិនមែនជាករណីនយោបាយអ្វីឡើយ និងថាគ្រាន់តែជាករណីបង្កហិង្សាដល់ស្លាប់ រវាងបងប្អូនឯងក្នុងជម្លោះផឹកស៊ីតែប៉ុណ្ណោះ។
លោក ប៉ា សំអិត អធិការនគរបាលស្រុក កៀនស្វាយ ឲ្យដឹងថា ៖«យើងកំពុងតាមរកជនល្មើសដែលមានអត្តសញ្ញាណហើយនេះ។ យើងគិតថា នេះមិនមែនជារឿងនយោបាយអីឡើយ ទោះបងប្អូនបក្សផ្សេងគ្នាក៏ដោយ»។
ប៉ុន្តែ លោក នី ចរិយា ប្រធានផ្នែកស៊ើបអង្កេតសមាគមសិទ្ធិមនុស្ស អាដហុក បញ្ជាក់ថា ករណីនេះត្រូវ អាដហុក ចាត់ទុកថា ដោយសារអ្នកទាំងពីរមាននិន្នាការផ្សេងគ្នា អាចធ្លាប់មានការជជែកគ្នាពីរឿងនយោបាយ រហូតដល់មានការផឹកស៊ីនិងមានការប្រើហិង្សាដល់ស្លាប់។
លោក ចរិយា បន្តថា ៖ «យើងមិនចោទថា មានការរៀបចំពីថ្នាក់លើជាប្រព័ន្ធឲ្យមានការសម្លាប់អ្វីទេ តែខ្ញុំយល់ថា មានការប៉ះទង្គិចគ្នាជាលក្ខណៈបុគ្គលដែលមាននិន្នាការខុសគ្នា ហើយមានការគុំគ្នាក្នុងចិត្ត»។
ក្រោយការបោះឆ្នោតថ្ងៃទី២៨ ខែកក្កដា សមាគមសិទ្ធិមនុស្ស អាដហុក បានធ្វើការកត់ត្រាបានករណីប្រមាណ ៥ ជាករណីគំរាមកំហែង បំបាក់ស្មារតីដល់អ្នកគាំទ្របក្សសង្គ្រោះជាតិ ហើយក្នុងនោះជនល្មើសច្រើនតែជាអាជ្ញាធរមូលដ្ឋាន៕
No comments:
Post a Comment
yes