ពលរដ្ឋជិត ១០០ គ្រួសាររស់នៅក្នុងស្រុក គិរីសាគរនិង បទុមសាគរ ខេត្ត កោះកុង ត្រូវបានដាក់ឱសានវាទត្រឹមថ្ងៃ ទី២០ កញ្ញា ក្នុងការឲ្យចាកចេញពីលំនៅឋាននិងស្រែចម្ការរបស់ខ្លួន តាមសេចក្តីជូនដំណឹងរបស់អន្តរក្រសួង ដើម្បីទុកដីឲ្យក្រុមហ៊ុន Union Development ធ្វើការអភិវឌ្ឍ ក្នុងគម្រោងដែលផ្តល់ដោយរាជរដ្ឋាភិបាល។
យោងតាមសេចក្តីជូនដំណឹងរបស់លោក អៀង ឡៃ ប្រធានក្រុមការងារចម្រុះនៃគណៈកម្មការអន្តរក្រសួងបញ្ជាក់ថា នៅថ្ងៃទី០១ ខែ តុលា ឆ្នាំនេះ ក្រុមហ៊ុន យូញៀន នឹងយកគ្រឿងចក្រទៅ ឈូសឆាយរៀបចំដីរបស់ក្រុមហ៊ុនដើម្បីធ្វើការអភិវឌ្ឍ។
ក្នុងនោះដែរ ក៏បានបញ្ជាឲ្យអភិបាលស្រុក បទុមសាគរ និង គិរីសាគរផ្សព្វផ្សាយដល់ពលរដ្ឋឲ្យធ្វើការរុះរើផ្ទះតង់ឬខ្ចមដែលធ្វើនៅលើដីក្រុមហ៊ុន និងចាកចេញទៅកាន់ភូមិថ្មី ឲ្យបានមុនថ្ងៃទី២០ខែ កញ្ញានេះជាកំហិត។
សេចក្តីជូនដំណឹង នេះព្រមានថា៖ «បើបងប្អូនមិនព្រមរុះរើចេញពីដីក្រុមហ៊ុនទេ ពេលគ្រឿងចក្រមកឈូសឆាយប៉ះពាល់ខូចខាតរបស់របរនោះក្រុមការងារចម្រុះនៃគណៈកម្មការអន្តរក្រសួងមិនទទួលខុសត្រូវឡើយ»។
ពលរដ្ឋឈ្មោះ ផាន់ អេងអាយុ ៥៧ ឆ្នាំរស់នៅស្រុក បទុមសាគរប្រាប់ថា អាជ្ញាធរបានបិទសេចក្តីជូនដំណឹងនេះតាមតូបលក់ដូរនិងតាមផ្ទះ ពលរដ្ឋ ប៉ុន្តែអ្នកភូមិមិនព្រមចាកចេញនោះទេ បើគ្មានសំណងណាមួយពីក្រុមហ៊ុន។ គាត់បន្តថា៖ «អាជ្ញាធរបានរៀបចំភូមិថ្មីនៅចម្ងាយប្រមាណ ៣ គីឡូម៉ែត្រពីភូមិចាស់ ជាទីតាំងនៅក្នុងព្រៃ មិនអាចរស់នៅបាន»។ គាត់ថា៖ «ឲ្យយើងទៅរស់នៅម៉េចកើត បើសុទ្ធតែព្រៃនៅទីនេះយើងមានដីស្រែចម្ការតាំងពីឆ្នាំ ១៩៩៩»។
អ្នកស្រី ឡៃ គៀន អាយុ ៥៣ ឆ្នាំជាអ្នកភូមិម្នាក់ទៀតប្រាប់ថា ដីជម្លោះជាមួយក្រុមហ៊ុននេះក្រុមនិស្សិតមិនវាស់វែងនោះទេ។ គាត់ថា៖ «ខ្ញុំមិនចេញដាច់ខាត បើគ្មានសំណងព្រោះខ្ញុំមានដីជិត ១០ ហិកតាធ្វើស្រូវចិញ្ចឹមជីវិត»។
លោក អ៊ន ភារៈ អភិបាលស្រុក បទុមសាគរថ្លែងថា ប្រជាពលរដ្ឋភាគច្រើនព្រមផ្លាស់ទីលំនៅទៅរស់នៅភូមិថ្មីហើយ។ លោកថា៖ «អ្នកនៅសល់ពួកគាត់គួរតែចាកចេញទៅភូមិថ្មីនោះដូចគ្នា»។
ពលរដ្ឋដែលមិនបានសំណងបានដាក់ពាក្យប្តឹងមកសមាគមសិទ្ធិមនុស្ស លីកាដូ និង អាដហុក ចាប់តាំងពីមានជម្លោះដីធ្លីក្នុងឆ្នាំ ២០១០ប៉ុន្តែ រហូតមកទល់ពេលនេះនៅតែគ្មានដំណោះស្រាយនិងបានសំណងពីក្រុមហ៊ុន៕
No comments:
Post a Comment
yes