សន្និសីទរបស់គណបក្សសង្គ្រោះជាតិ នៅថ្ងៃទី២០កញ្ញា
ប្រធានគណបក្សសង្គ្រោះជាតិ លោក សម រង្ស៊ី នៅថ្ងៃសុក្រនេះ ប្រកាសសុំការជួបចរចាបន្តជាមួយគណបក្សប្រជាជនកម្ពុជា ដើម្បីពិភាក្សារឿងតុល្យភាពអំណាចក្នុងរដ្ឋសភា។
ក្នុងសន្និសីទសារព័ត៌មាននៅថ្ងៃទី២០ខែកញ្ញា លោក សម រង្ស៊ី ថ្លែងថា គណបក្សសង្គ្រោះជាតិ មិនមែនមិនចង់ចរចាជាមួយគណបក្សប្រជាជនកម្ពុជាទេ គឺគោលជំហរចរចា ដើម្បីផលប្រយោជាតិ ដោយទាមទារតុល្យភាពនៃអំណាចក្នុងរដ្ឋសភា ដើម្បីត្រួតពិនិត្យការងារ និងកុំឲ្យមានការជិះសេះលែងដៃ ដូចអាណត្តិមុនៗ។ លោកបន្តថា គណបក្សសង្គ្រោះជាតិ ស្នើបន្តការចរចាជាមួយគណបក្សប្រជាជនកម្ពុជា ដើម្បីស្វែងរកការពិត ហើយវាត្រូវការពេលវេលាក្នុងការកែទម្រង់ដែលជាអនាគតប្រទេសជាតិ ដូច្នេះប្រសិនបើតក់ក្រហល់ប្រជុំសភា នាំឲ្យមិនមានពេលជជែក ដែលនាំឲ្យខូចប្រយោជន៍ជាតិ។
លោក សម រង្ស៊ី បន្ថែមថា តំណាងរាស្ត្រគណបក្សសង្គ្រោះជាតិ ប្រកាសជំហរចុងក្រោយ និងសារជាថ្មីថា គណបក្ស នឹងមិនចូលរួមសម័យប្រជុំសភាលើកដំបូង នៅថ្ងៃទី២៣ខែកញ្ញា បើទោះជាមានព្រះរាជវត្តមានរបស់ព្រះមហាក្សត្រព្រះបាទនរោត្តមសីហមុនីក៏ដោយ។ លោកបញ្ជាក់ថា ការប្រជុំសភា មិនចាំបាច់តក់ក្រហល់ទេ ដោយសាររដ្ឋធម្មនុញ្ញ បញ្ជាក់ថា សម័យប្រជុំសភា គឺធ្វើឡើងក្រោយពេលបោះឆ្នោត មិនមែនក្រោយថ្ងៃបោះឆ្នោតទេ ហើយគជប ទើបតែប្រកាសលទ្ធផលនៅថ្ងៃទី០៧ខែកញ្ញានេះទេ គឺមិនមែនថ្ងៃទី២៨ខែកក្កដាទេ។
កាលពីថ្ងៃព្រហស្បតិ៍ ទី១៩ខែកញ្ញា ថ្នាក់ដឹកនាំគណបក្សសង្គ្រោះជាតិ បានដាក់លិខិតថ្វាយព្រះមហាក្សត្រជាថ្មី ដើម្បីសុំការពន្យារពេលប្រជុំសភាលើកដំបូងនៅថ្ងៃទី២៣ខែកញ្ញា បន្ទាប់ពីព្រះមហាក្សត្រ បានបដិសេធ លិខិតរបស់គណបក្ស។
កាលពីថ្ងៃពុធ ព្រះមហាក្សត្រ បានបដិសេធលិខិតស្នើសុំរបស់គណបក្សសង្គ្រោះជាតិ ដែលសុំពន្យារពេលការប្រជុំសភា ដោយស្នើឲ្យតំណាងរាស្ត្រគណបក្សទាំង៥៥ររូប ចូលរួមប្រជុំនៅថ្ងៃទី២៣ខែកញ្ញាខាងមុខ។ព្រះរាជសាររបស់ព្រះមហាក្សត្រ សូមតំណាងរាស្ត្រទាំងអស់ អញ្ជើញចូលរួមក្នុងសម័យប្រជុំដំបូងនៃរដ្ឋសភា ដើម្បីបង្ហាញនូវការរួបរួម និងឯកភាពជាតិ៕
ប្រភពពី VOD
No comments:
Post a Comment
yes