ព្រះអង្គម្ចាស់ស៊ីសុវត្ថិ ធម្មិកោ នៅរសៀលថ្ងៃសុក្រនេះ មានព្រះបន្ទូលថា ការយកស្ថាប័នព្រះមហាក្សត្រក្នុងការកោះប្រជុំសភាដំបូងនៅថ្ងៃទី២៣ខែកញ្ញា ជារឿងកំប្លុកកំប្លែងមួយ។
ព្រះអង្គ មានព្រះបន្ទូលបែបនេះ ទៅកាន់អ្នកសារព័ត៌មាន ខណៈព្រះអង្គ បានសមាធិបង្អត់ព្រះស្ងោយ និងគង់រង់ចាំនៅវត្តភ្នំ រហូតទាល់តែគណបក្សប្រជាជនកម្ពុជា មានដំណោះស្រាយសមស្រប និងច្បាស់លាស់ ជូនពលរដ្ឋកម្ពុជា។ នៅរសៀលថ្ងៃសុក្រនេះ ព្រះសង្ឃប្រមាណជា៣០អង្គ ក៏បានគង់នៅជាមួយព្រះអង្គ នៅមរណីដ្ឋានវត្តភ្នំផងដែរ។
អតីតជំនួយការសម្តេចឪ ព្រះអង្គម្ចាស់ស៊ីសុវត្ថិ ធម្មិកោ មិនបានបញ្ជាក់លម្អិតពីមូលហេតុដែលព្រះមហាក្សត្រសម្រេចកោះហៅតំណាងរាស្ត្រទាំងអស់ចូលប្រជុំសភា និងការដែលព្រះមហាក្សត្រ បានបដិសេធការស្នើសុំពន្យារពេលប្រជុំរបស់គណបក្សសង្គ្រោះជាតិ។
ព្រះអង្គម្ចាស់ស៊ីសុវត្ថិ ធម្មិកោ មានព្រះរាជបន្ទូលថា មូលហេតុដែលទ្រង់បង្អត់អាហារ ហើយគង់នៅវត្តភ្នំ គឺដើម្បីទាមទារឲ្យគណបក្សប្រជាជនកម្ពុជា ឈរលើគោលការណ៍ស្មោះត្រង់ មានឆន្ទៈច្បាស់លាស់ រកដំណោះស្រាយ យុត្តិធម៌ ជូនពលរដ្ឋជាម្ចាស់ឆ្នោត ។ព្រះអង្គ មានព្រះបន្ទូលបន្ថែមថា ទ្រង់មិនជឿថា គណបក្សប្រជាជនកម្ពុជា នឹងចូលប្រជុំសភានៅថ្ងៃទី ២៣ កញ្ញានេះទេ ប្រសិនបើមិនមានវត្តមានរបស់គណបក្សសង្គ្រោះជាតិ។
សេចក្តីថ្លែងការណ៍របស់រាជរដ្ឋាភិបាលកម្ពុជា ចេញផ្សាយនៅថ្ងៃទី១៨ខែកញ្ញានេះ ឲ្យដឹងថា ក្នុងរយៈពេលចុងក្រោយនេះ រាជរដ្ឋាភិបាល បានកត់សម្គាល់ឃើញថា ការបញ្ចេញមតិរបស់ប្រជាពលរដ្ឋមួយចំនួន តាមរយៈការផ្សព្វផ្សាយវិទ្យុ កាសែត គេហទំព័រ ជាពិសេសបណ្តាញសង្គមហ្វេសប៊ុក បានជ្រុលជ្រួស នាំឲ្យប៉ះពាល់ព្រះមហាក្សត្រ។ រាជរដ្ឋាភិបាល ទទួលស្គាល់សិទ្ធិបញ្ចេញមតិ និងសេរីភាពសារព័ត៌មានរបស់ប្រជាពលរដ្ឋគ្រប់រូប ដូចមានចែងក្នុងរដ្ឋធម្មនុញ្ញ ច្បាប់ និងការប្រកាសជាសកលស្តីអំពីសិទ្ធិមនុស្សរបស់អង្គការសហប្រជាជាតិ បន្តែការប្រើប្រាស់សិទ្ធិសេរីភាពទាំងនេះ ត្រូវប្រព្រឹត្តទៅតាមលក្ខខណ្ឌកំណត់ក្នុងច្បាប់។ សេចក្តីថ្លែងការណ៍បញ្ជាក់ថា សិទ្ធិសេរីភាពទាំងនោះ មិនត្រូវប៉ះពាល់ដាច់ខាតដល់ស្ថាប័ន និងអង្គព្រះមហាក្សត្រ ដែលជាទីគោរពសក្ការៈ និងជាម្ល់បដ៏ត្រជាក់របស់ប្រជាពលរដ្ឋខ្មែរគ្រប់រូប។
មាត្រា៧ និង៨នៃរដ្ឋធម្មនុញ្ញ ចែងថា អង្គព្រះមហាក្សត្រ មិនអាចនរណារំលោភបំពានបានឡើយ ហើយអង្គព្រះមហាក្សត្រ ទ្រង់គង់ជានិមិត្តរូបនៃឯកភាពជាតិ និរន្តភាព ជាអ្នកធានាឯករាជ្យ អធិបតេយ្យ បូរណភាពទឹកដី និងជាអ្នកធានានូវការគោរពសិទ្ធិ និងសេរីភាពរបស់ប្រជាពលរដ្ឋគ្រប់រូប៕
ប្រភពពី VOD
No comments:
Post a Comment
yes