ពលរដ្ឋប្រមាណ៩០គ្រួសារ នៅឃុំ២ធ្នូ ស្រុកស្នួល ខេត្តក្រចេះ ព្រមានមកភ្នំពេញ ដើម្បីសុំអន្តរាគ មន៍ពីលោកនាយករដ្ឋមន្ត្រី ហ៊ុន សែន បន្ទាប់ពីអាជ្ញាធរខេត្ត នៅព្រឹកថ្ងៃចន្ទ សម្រេចកាត់ដីមានទំ នាស់ច្រើនឆ្នាំ ឲ្យទៅក្រុមហ៊ុនដាំដំណាំកៅស៊ូមួយឈ្មោះ ហាយ យ៉ុង។
ពលរដ្ឋម្នាក់រស់នៅឃុំ២ធ្នូ ស្រុកស្នួល លោក វង្ស វណ្ណា ឲ្យដឹងថា ការព្រមាននេះធ្វើទ្បើង បន្ទាប់ពីពលរដ្ឋ៤០នាក់ អភិបាលស្រុក អភិបាលរងខេត្ត តំណាងក្រុមហ៊ុន ជួបពិភាក្សាដោះស្រាយវិវាទដីធ្លីនេះ។ លោកបន្តថា អាជ្ញាធរសម្រេចកាត់ដីទំហំ៧០ហិកតាឲ្យក្រុមហ៊ុនកាន់កាប់។ លោកថា ប្រជាពលរដ្ឋខកចិត្តយ៉ាងខ្លាំងចំពោះសេចក្តីសម្រេចនេះ ៖ “គោលបំណងខ្ញុំ ប្រមូលកម្លាំងប្រជាពលរដ្ឋអស់មួយភូមិនេះ មានតែឡើងដល់សម្តេចតេជោ ឲ្យគាត់ជួយដោះស្រាយពីរឿងដីធ្លី”។
ប្រជាពលរដ្ឋផ្សេងទៀត រៀបរាប់ថា ពួកគាត់លំបាកយ៉ាងខ្លាំង ចាប់តាំងពីក្រុមហ៊ុនចូលឈូសឆាយយកដីស្រែចម្ការពួកគាត់ ៖ “ស្រែខ្ញុំ ស្រែដំណាំគេឈូសយកអស់រលីងហើយ អត់មានអ្វីទេ លំបាកគ្រប់តែម្តង បើអត់មានស្រែមានចម្ការធ្វើ មានតែដីមួយកន្លែងនោះធ្វើ ប្រមូលអស់ប្រមូលខាងកើតនោះ គ្មានអ្វីធ្វើទេ បើដីក្រុមហ៊ុនយកខាងក្រោមអស់ហើយដីស្រែនោះ។ ខ្ញុំគិតថា ឡើងទៅឲ្យដោះស្រាយ ដោះឲ្យចេញតែម្តង ព្រោះចំនុចនេះវាពិបាកណាស់ ដោះស្រាយឡើងឆ្កែតហើយ ជីវភាពលំបាកវាគ្មានដីធ្វើ បើយកអស់ហើយ គ្មានដីឯណាសល់កន្លះហិចតា មួយហិចតា ហើយកូនមួយវ៉ូងទៀត ជួលដីគេក៏មាន ហើយសំណងនោះដោយបុគ្គលទេ ប្រហែលជាដប់នាក់ទេ សំណងនោះ មួយហិចតាកាលពីមុខ ១០០ដុល្លារ”។
ទោះយ៉ាងណា ពលរដ្ឋមិនទាន់កំណត់ថ្ងៃដែលពួកគាត់នឹងទ្បើងមកសុំអន្តរាគមន៍ពីប្រមុខរាជរដ្ឋាភិបាលនៅទ្បើយទេ។
អភិបាលរងខេត្តក្រចេះ លោក ខ័ណ្ឌ ចំណាន ដែលចូលរួមដោះស្រាយបញ្ហានេះ មានប្រសាសន៍ថា អាជ្ញាធរសម្រេចកាត់ដីនោះឲ្យក្រុមហ៊ុន គឺផ្អែកតាមបទបញ្ជាលេខ០១របស់រាជរដ្ឋាភិបាល។ លោកអះអាងថា ប្រជាពលរដ្ឋភាគច្រើន ទទួលយកសំណងរួចរាល់អស់ហើយ មិនតែប៉ុណ្ណោះក្រុមហ៊ុនបានកាន់កាប់ និងអភិវឌ្ឍលើដីនោះតាំងពីឆ្នាំ២០០៩ ៖ “ក្នុងការអនុវត្តបទបញ្ជាលេខ០១ ឃើញថាដីនេះ គឺជាដីក្រុមហ៊ុន ដែលបានអភិវឌ្ឈរួចហើយអស់ អញ្ជឹងគឺមិនអាចផ្តល់ជូនពួកគាត់បានទេ យើងបានផ្សព្វផ្សាយអញ្ជឹងឲ្យគាត់ តាមច្បាប់ តាមជាក់ស្តែង ដែលយើងបានចុះទៅមើលជាក់ស្តែងឃើញដូច្នេះ។ ចង់និយាយថា ដីនេះក្រុមហ៊ុនថែរក្សាយ៉ាងគត់មុត តាំងពីឆ្នាំ២០០៩មក មិនមានប្រជាពលរដ្ឋទៅធ្វើលើដីនេះទេ មានន័យថារាល់ថ្ងៃគឺស្ថិតក្រោមការគ្រប់គ្រង របស់ក្រុមហ៊ុនជាប់តែម្តង”។
ពលរដ្ឋឲ្យដឹងថា ដីនៅឃុំ២ធ្នូ ស្រុកស្នូល ខេត្តក្រចេះ ចាប់ផ្តើមមានទំនាស់ជាមួយក្រុមហ៊ុនអស់រយៈពេល ៥ឆ្នាំហើយ។ ក្រុមហ៊ុនផ្តល់សំណងឲ្យពួកគេក្នុងមួយហិកតា១០០ដុល្លារអាមេរិក។ ប្រជាពលរដ្ឋរស់នៅលើដីនោះតាំងពីឆ្នាំ១៩៧៩មក៕
No comments:
Post a Comment
yes