មជ្ឈមណ្ឌលសិទ្ធិមនុស្សកម្ពុជា (CCHR) នៅថ្ងៃចន្ទនេះ បង្ហាញការព្រួយបារម្ភពីចំនួនស្ត្រីធ្លាក់ចុះ ក្នុងឆាកនយោបាយសម្រាប់នីតិកាលទី៥នេះ ដែលមិនអាចឲ្យកម្ពុជាអនុវត្តបានជោគជ័យ នូវគោលដៅអភិវឌ្ឍន៍សហស្សវត្សរ៍ឆ្នាំ២០១៥ របស់អង្គការសហប្រជាជាតិ។
សេចក្តីថ្លែងការណ៍របស់CCHR ចេញផ្សាយនៅថ្ងៃទី២៥ ខែវិច្ឆិកានេះឲ្យដឹងថា តាមលទ្ធផលបោះឆ្នោតនីតិកាលទី៥ឆ្នាំ២០១៣ ដែលប្រកាសដោយ គ.ជ.ប បង្ហាញថា ក្នុងចំណោម អាសនៈ ១២៣ក្នុងសភា ស្ត្រីទទួលបានតែ ២៨អាសនៈ ឬស្មើនឹង២០,៣៣ភាគរយប៉ុណ្ណោះ។
មជ្ឈមណ្ឌលសិទ្ធិមនុស្សកម្ពុជា បានដកស្រង់សម្តីមន្ត្រីសម្របសម្រួលគម្រោងលើកស្ទួយសមាសភាពស្ត្រីក្នុងវិស័យនយោបាយ លោក ស្រី ជរ ច័ន្ទធីតា មកចុះផ្សាយថា ការធ្លាក់ចុះតំណាងរាស្ត្រស្ត្រី នេះបង្ហាញថា មានកិច្ចការជាច្រើនដែលត្រូវធ្វើ ដើម្បីឲ្យសម្រេចបានសមភាពយេនឌ័រនៅក្នុងនយោបាយកម្ពុជា ។
កម្ពុជាធ្លាប់ប្តេជ្ញាចិត្តថា នឹងជំរុញឲ្យមានសមាសភាពស្ត្រីចូលរួមក្នុងកិច្ចការនយោបាយ ឲ្យបាន៣០ភាគរយក្នុងគោលដៅអភិវឌ្ឍន៍សហស្សវត្យរ៍ត្រឹមឆ្នាំ២០១៥ ។
សេចក្តីថ្លែងការណ៍ដដែលបានចាត់ទុកថា សមាសភាពយេនឌ័រស្ត្រីចូលរួមក្នុងឆាកនយោបាយ ជាការចាំបាច់ដើម្បីសម្រេចបាននូវភាពរីកចម្រើននានាទាក់ទងនឹងសិទ្ធិស្ត្រីក្នុងគ្រប់វិស័យទាំងអស់របស់សង្គមកម្ពុជា និងក្នុងការកាត់បន្ថយអំពើហិង្សាប្រឆាំងនឹងស្ត្រី៕
No comments:
Post a Comment
yes