ប្រជាពលរដ្ឋ និងព្រះសង្ឃរាប់ពាន់នាក់ គ្រោងហែក្បួនពីខេត្តចំនួន៥ ក្នុងរយៈពេល ១០ថ្ងៃមក កាន់រាជធានីភ្នំពេញ អបអរទិវាសិទ្ធិមនុស្សអន្តរជាតិ១០ធ្នូ ដើម្បីជំរុញឲ្យបញ្ឈប់ការរំលោភសិទ្ធិមនុស្សបង្កើតសន្តិភាព និងយុត្តិធម៌នៅក្នុងសង្គម។
តាមសេចក្តីប្រកាសព័ត៌មានរបស់អង្គការសង្គមស៊ីវិល ដែលឃ្លាំមើលការហែក្បួននេះ បានឲ្យដឹងថា ពិធីហែក្បួន និងចាប់ផ្តើមពីថ្ងៃទី០១ខែធ្នូ រហូតដល់ថ្ងៃទ១០ធ្នូដដែល។ ខេត្តទាំង ៥ដែលប្រជាពលរដ្ឋនិងព្រះសង្ឃ កំណត់យកជាគោលដៅនោះ រួមមាន ខេត្តស្វាយរៀង ហែតាមផ្លូវជាតិលេខ១ ខេត្តកំពត ហែតាមផ្លូវជាតិ៣ ខេត្តកំពង់ស្ពឺ ហែតាមផ្លូវជាតិ៤ ខេត្តពោធិ៍សាត់ ហែតាមផ្លូវជាតិ៥ និងខេត្តកំពង់ធំ ហែតាមផ្លូវជាតិ៦។
ក្នុងអំឡុងពេលហែក្បួនមានកម្មវិធីមួយចំនួន ដូចជា ធម្មទេសនាអំពីព្រះពុទ្ធសាសនា និងសិទ្ធិមនុស្ស សំណួរ-ចម្លើយពីសិទ្ធិមនុស្ស សំណួរល្បងប្រាជ្ញា និងការសូត្រកំណាព្យផ្សេងៗទៀត។
តាមគម្រោងអ្នកហែក្បួនទាំង៥ក្រុម នឹងមកជួបជុំគ្នានៅមុខរដ្ឋសភា ក្នុងរាជធានីភ្នំពេញ នៅថ្ងៃទី១០ខែធ្នូ ដើម្បីដាក់របាយការណ៍ពីស្ថានភាពស្ថានភាពសិទ្ធិមនុស្សនៅកម្ពុជាជូនតំណាងរាស្ត្រ។
នៅថ្ងៃទី១០ ខែធ្នូ ឆ្នាំ២០១៣នេះ ជាខួបលើកទី៦៥ នៃការប្រារព្ធទិវាសិទ្ធិមនុស្សអន្តរជាតិ។ នៅកម្ពុជាការប្រារព្ធទិវាសិទ្ធិមនុស្សដែលហែក្បួនពីតាមបណ្តាខេត្តមកកាន់រាជធានី ភ្នំពេញ របៀបនេះ មិនធ្លាប់មានទេកន្លងមក។ ឆ្នាំមុនៗ មានតែការរៀបចំជាវេទិកា ដើម្បីឲ្យប្រជាពលរដ្ឋសំដែងមតិ តែកន្លែងមួយចំនួនត្រូវអាជ្ញាធរមូលដ្ឋានមិនអនុញ្ញាតឲ្យធ្វើ ដោយហេតុផលថា មិនមានការអនុញ្ញាតពីថ្នាក់លើ៕
No comments:
Post a Comment
yes