លោក ប៉ា សុជាតិវង្ស អភិបាលរាជធានីភ្នំពេញ នៅព្រឹកថ្ងៃទី២៤ ខែវិច្ឆិកា ឆ្នាំ២០១៣ នេះ បានប្រកាសប្រាប់ពលរដ្ឋពីសេចក្តីសម្រេចលុប ស.ជ.ណ ទាក់ទងនឹងការប្រគល់ដីទំហុំប្រមាណ២ហិចតានៅបរិវេណវត្តពោធិ៍ព្រឹក្ស ហៅវត្តខ្ទរទៅឲ្យក្រុមហ៊ុនអេងកាំង ឌីវើឡុបមែន ខបភើរេសិន។
ក្រៅពីការដកសិទ្ធិរបស់ក្រុមហ៊ុនក្នុងការគ្រប់គ្រងដីទំនាស់ដែលស្ថិតនៅជាយរាជធានីភ្នំពេញ តាមបណ្តោយផ្លូវជាតិលេខ៦អា ខាងលើ អាជ្ញាធរបានសម្រេចប្រគល់ទីតាំងទំនាស់ឲ្យទៅខាងគណៈកម្មការវត្តធ្វើការគ្រប់គ្រងដើម្បីកសាងឈាបនដ្ឋាន និងសាលារៀនថ្មី។
ការសម្រេចនេះ គឺធ្វើឡើងតែមួយថ្ងៃប៉ុណ្ណោះ បន្ទាប់ពីមានការផ្ទុះការតវ៉ាពីសំណាក់ប្រជាពលរដ្ឋរាប់រយនាក់ដើម្បីប្រឆាំងនឹងគម្រោងឈូសឆាយដី និងកម្ចេចឈាបនដ្ឋាន របស់ក្រុមហ៊ុនអេងកាំង។ ការតវ៉ាបានឈានទៅដល់ការដុតកម្ចេចអេស្កាវ៉ាទ័រ និងឧបករណ៍ផ្សេងៗទៀតរបស់ក្រុមហ៊ុនកាលពីព្រឹកថ្ងៃម្សិលមិញ។
យោងតាមកម្មវត្ថុនៃលិខិតដែលចុះហត្ថលេខាដោយ លោក ឃឹម រុស្ស៊ីដា រដ្ឋលេខាធិការទីស្តីការគណរដ្ឋមន្ត្រី ស.ជ.ណ ស្តីពីការផ្លាស់ប្តូរទីតាំងឈាបនដ្ឋានវត្តពោធិ៍ព្រឹក្ស ត្រូវបានចាត់ទុកជានិរាករណ៍ ពោលគឺទីតាំងដីត្រូវរក្សាទុកឲ្យនៅដដែល៕
No comments:
Post a Comment
yes