ពែកមី បដិសេធដឹកដៃ ខ្ញុង ចាកចេញពី ស៊ីធីអ៊ីន

ភ្នំពេញៈ តារាកំប្លែង ដែលទើបតែបោះ ជំហានចូលប្រឡូក ក្នុងវិស័យសិល្បៈមិនបាន ប៉ុន្មានឆ្នាំផង តែហាក់បីដូចជា ទទួលបាននូវការ គាំទ្រច្រើន សម្បើម ក្នុងពិភពកំប្លែង មិនចាញ់តារាជើងចាស់ លោក ពែកមី បានច្រានចោលពាក្យ ព័ត៌មានចចាមអារ៉ាមថា លោកបានដឹកដៃតារាកំប្លែង ស្រីរួម ក្រុមជាមួយគ្នា អ្នកនាង ខ្ញុង ចាកចេញពី ស៊ីធីអ៊ីន ព្រោះមួយរយៈនេះ វត្តមានក្នុងក្រុមកំប្លែង ពេលសម្ដែងរាល់កម្មវិធី កម្សាន្តចុងសប្ដាហ៍ ទស្សនិក ជន មិនបានផ្ទុះសំណើចសើចក្អាកក្អាយ ជាមួយនាយ ពែកមី ទៀតឡើយ ទើបបណ្ដាលឲ្យមានមន្ទិល សង្ស័យជាច្រើនកើតឡើង ជុំវិញករណីនេះ ។

ស្របពេលជាមួយគ្នានេះ នាង ខ្ញុង ក៏មិនឃើញបង្ហាញមុខក្នុងពេលកំប្លែងដូចគ្នា ទើបមានព័ត៌មាន លេចឮពីមាត់មួយ ទៅមាត់មួយថា លោក ពែកមី បានដឹកដៃ នាង ខ្ញុង ចាកចេញពី ស្ថានីយទូរទស្សន៍ ស៊ីធីអិន ផ្ដើមចេញពីមាន រឿងដ៏រសើបនេះឡើង និង ដោយសារតែ មានបញ្ហាផ្ទៃក្នុងជាមួយ អ្នកដឹក នាំលោក សុវណ្ណ ឬទ្ធី ហៅ តាវ៉ិចទ័រ ។

ស្របពេលដែលលេចឭព័ត៌មាន ដ៏ពុះកញ្ជ្រោលបែបនេះ តារាកំប្លែង ពូកែសម្ដីចាក់ទឹកមិនលិច នាយ ពែកមីបាន និយាយស្ទើរតែ ភ្លេចដកដង្ហើម ចេញមុខបកស្រាយ ប្រាប់មជ្ឈមណ្ឌលព័ត៌មាន ដើមអម្ពិល តាមទូរស័ព្ទ នៅថ្ងៃទី២៩ ខែឧសភា ឆ្នាំ២០១២នេះថា គឺមិនមែនជាការពិតនោះទេ ។

នាយពែកមី អះអាងថា “មូលហេតុដែលខ្ញុំបាត់វត្តមាន មិនបានឡើងស្ថានីយ ទូរទស្សន៍គឺ ដោយសារតែខ្ញុំ និងអ្នកនាងខ្ញុង ជាប់រវល់ដើរឃោសនា បោះឆ្នោតជូនគណបក្ស ប្រជាជនកម្ពុជា ជាមួយលោក ហ៊ុន ម៉ាណែត នៅខេត្តកំពង់ចាម ហើយការចូលរួម ឃោសនានេះដែរ ក៏មានវត្តមានតារា កំប្លែង ជាច្រើនដួងទៀត នៅស្ថានីយ ទូរទស្សន៍ស៊ីធីអ៊ីន ដូចគ្នា” ។

ពែកមី ក៏បានបន្ថែមទៀតថា នៅពេលដែលយុទ្ធនាការឃោសនាបោះឆ្នោតត្រូវបានបញ្ចប់ លោកនិងអ្នកនាងខ្ញុង នឹងចូលខ្លួនមក បម្រើអារម្មណ៍ ទស្សនិកជន វិញជាក់ជាមិនខាន ដោយសារតែបងប្អូន ប្រជាពលរដ្ឋគាត់ចង់ ឃើញវត្តមានលោកផ្ទាល់ អញ្ចឹងហើយបានជាលោកត្រូវ បាត់វត្តមាន ពីស្ថានីយទូរទស្សន៍ និងខកខានការ ឡើងសម្តែង ហើយមិនមែនដូចពាក្យ ចចាមអារ៉ាម ខាងលើនោះទេ ។

គេនៅមិនទាន់ជឿមួយរយភាគរយពីការអះអាង របស់នាយពែកមី នៅឡើយទេ ព្រោះស្របពេល មានរឿងអាស្រូវ ផ្ទុះឡើងភ្លាម ក៏បាត់ខ្លួនអ្នក ទាំង ពីរភ្លែត… ហើយលោកឆ្លើយថា ជាប់រវល់ចុះឃោសនា រកសម្លេងឆ្នោតទៅវិញ ។ មានសំណួរ ជាច្រើនបានលើកឡើងថា ចុះតារា កំប្លែង ក្នុងក្រុមល្បីៗ ជាច្រើនរូប ម្ដេចក៏ពួកគេមិនជាប់ រវល់ឃោសនា ហេតុអ្វីក៏មាន តែនាយពែកមី និងនាងខ្ញុង បែបនេះ ? តើនាយពែកមីប្រាកដ ចិត្តទេថា នាយមិនជាប់ ពាក់ព័ន្ធ នឹងរឿងស្នេហា ជាមួយនាងខ្ញុង ? បើទស្សនិកជនចង់ឃើញ ពួកគាត់ពិតជាចង់ឃើញ សមាជិក្រុមកំប្លែងទាំងអស់ មិនមែនចង់ ឃើញតែ នាយពែកមី និងនាងខ្ញុងនោះទេ ៕