បំនែកយន្តហោះរបស់ថៃដែលបានផ្ទុះធ្លាក់ (រូបភាពដោយ
អ្នកនាំពាក្យកងរាជអាវុធហត្ថលើផ្ទៃប្រទេស)
មន្ត្រីកងរាជអាវុធហត្ថលើផ្ទៃប្រទេសអះអាងថា សំឡេងផ្ទុះនៅក្បែរតំបន់ប្រាសាទព្រះវិហារ ដែលធ្វើឲ្យប្រជាពលរដ្ឋ និងកងទ័ពភ្ញាក់ផ្អើល កាលពីម៉ោង១០ព្រឹកមិញនេះ ជាការផ្ទុះប្រភេទយន្តហោះបញ្ជាពីចម្ងាយ១គ្រឿងរបស់ប្រទេសថៃ។
អ្នកនាំពាក្យកងរាជអាវុធហត្ថលើផ្ទៃប្រទេស លោក ខេង ទីតូ បានឲ្យដឹងនៅរសៀលថ្ងៃចន្ទនេះថា តាមការសន្និដ្ឋានរបស់ក្រុមមន្ត្រីមានភារកិច្ចស្រាវជ្រាវករណីការផ្ទុះ កាលពីព្រឹកថ្ងៃទី៩ធ្នូព្រឹកមិញនេះ គឺជាប្រភេទកូនយន្តហោះបញ្ជាពីចម្ងាយដោយប្រទេសថៃ។ លោកថា គ្រឿងយន្តនេះ បានផ្ទុះ និងធ្លាក់រាយប៉ាយ ខ្លះនៅក្បែរជើងភ្នំ ប្រាសាទព្រះវិហារ ខ្លះនៅក្នុងភូមិស្រអែម គឺមិនមែនជាការបាញ់ផ្លោងពីប្រទេសថៃ ដូចបណ្តាញសង្គមហ្វេសប៊ុកបាននិយាយទេ។
លោក ខេង ទីតូ បន្ថែមថា វត្ថុតាងដែលជាកំទិចគ្រឿងយន្តទាំងអស់ ត្រូវបានប្រមូលរក្សាទុកនៅទីបញ្ជាការដ្ឋានកងពលលេខ៣ សម្រាប់ធ្វើជាភស្តុតាងតែលោកបញ្ជាក់ថា កម្ពុជាមិនទាន់មានចំណាត់ការណា មួយលើប្រទេសថៃទេ លើបញ្ហានេះ។
គួររំលឹកដែរថា ក្នុងអំឡុងពេលស្ថានភាពតាមបណ្តោយព្រំដែនកម្ពុជា-ថៃ តានតឹងពេលកន្លងទៅ ថៃក៏បាន ប្រើយន្តហោះប្រភេទនេះ មកយកការណ៍នៅក្នុងទឹកដីខ្មែរ តែកម្ពុជាមិនមាន ចំណាត់ការអ្វីលើប្រទេសថៃទេ៕
No comments:
Post a Comment
yes