ក្រុមកម្មករហែក្បួនមកចូលរួមបាតុកម្មជាមួយគណបក្សសង្គ្រោះជាតិ នាទីលានប្រជាធិបតេយ្យ ទាមទារដំឡើងប្រាក់ខែគោល ដែលដឹកនាំដោយ លោក សម រង្ស៊ី ប្រធានគណបក្សសង្គ្រោះជាតិ តាមបណ្ដោយផ្លូវជាតិលេខ២ ជិតស្ពានអាកាសក្បាលថ្នល់ នៅថ្ងៃទី២៥ ខែធ្នូ ឆ្នាំ២០១៣
សហជីពធំៗ ៣ នៅលើពិភពលោក ដែលមានសមាជិកចំនួន ២០០លាននាក់ នឹងទៅជួបជុំគ្នានៅតាមស្ថានទូតខ្មែរនៅបណ្ដាប្រទេសនានា ដើម្បីទាមទារឲ្យរដ្ឋាភិបាលកម្ពុជា ដោះលែងសកម្មជនដីធ្លី និងកម្មករ ២៣នាក់ដែលកំពុងជាប់ឃុំ និងដោះស្រាយបញ្ហាប្រាក់ឈ្នួលកម្មករឲ្យសមរម្យ។
ប្រធានសហភាពការងារកម្ពុជា លោក អាត់ ធន់ បានថ្លែងនៅថ្ងៃទី៨ កុម្ភៈ ថា សហភាពសហជីពធំ ៣ នៅលើសាកលលោក មានដូចជា សហភាពការងារអន្តរជាតិ ហៅកាត់ជាភាសាអង់គ្លេសថា អាយ.ធី.យូ.ស៊ី (ITUC) សហជីពឧស្សាហកម្មពិភពលោក ហៅជាភាសាអង់គ្លេសថា Industry all និងសហជីពខាងសេវាកម្ម ហៅកាត់ថា យូ.អេន.អាយ (UNI) គ្រោងនឹងជួបជុំគ្នានៅតាមស្ថានទូតខ្មែរនៅក្រៅប្រទេសនៅថ្ងៃទី១០ កុម្ភៈ។ លោក អាត់ ធន់ ក្នុងនាមជាសមាជិកសហជីពនេះដែរ បានគាំទ្រចំពោះសកម្មភាពនេះ។
ទន្ទឹមនឹងគ្នានេះដែរ សហភាពសហជីពក្នុងស្រុកចំនួន ១១ ក៏គ្រោងហែញត្តិនៅថ្ងៃទី១០ ខែកុម្ភៈ ដាក់តាមស្ថាប័នពាក់ព័ន្ធឲ្យដោះស្រាយលើបញ្ហាចំនួន ៧ចំណុច ដែលក្នុងនោះរួមមាន ការដំឡើងប្រាក់ឈ្នួលឲ្យកម្មករ ការទទួលខុសត្រូវចំពោះមនុស្សស្លាប់ និងរបួសក្នុងពេលកងកម្លាំងអាជ្ញាធរបង្ក្រាបបាតុកម្ម ដោះលែងមនុស្សចំនួន ២៣នាក់ ដែលកំពុងជាប់ឃុំឲ្យមានសេរីភាពវិញ រួមទាំងលក្ខខណ្ឌការងារមួយចំនួនទៀត៕
No comments:
Post a Comment
yes