សកម្មជន និងអ្នកគាំទ្រជនជាប់ចោទ ២៣នាក់ ស្រែកទាមទារឲ្យដោះលែង
នៅតុលាការកំពូល នាពេលកន្លងមក(រូបថត ញឹម សុខន)
សមាគមការពារសិទ្ធិមនុស្សអាដហុក នៅថ្ងៃសុក្រនេះ ថ្កោលទោសចំពោះការសម្រេចរបស់តុលាការកំពូល ដែលមិនព្រមដោះលែង លោក វន់ ពៅ និងអ្នកជាប់ចោទ២០នាក់ផ្សេងទៀត ដែលកំពុងជាប់ឃុំនៅក្នុងពន្ធនាគារ ឲ្យមានសេរីភាពឡើងវិញ ហើយថាការចាប់ខ្លួននេះ គ្មានមូលដ្ឋានច្បាប់ទេ ។
នៅព្រឹកថ្ងៃសុក្រនេះ តុលាការកំពូល តម្កល់សេចក្ដីសម្រេចរបស់សាលាឧទ្ធរណ៍ ដែលបានសម្រេចមិនឲ្យ លោកវន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងអ្នកជាប់ឃុំ២០នាក់ផ្សេងទៀត ឲ្យនៅក្រៅឃុំបណ្តោះអាសនុ្ន ព្រោះតែសវនាការជំនុំជម្រះកំពុងដំណើរការ។
សេចក្តីថ្លែងការណ៍សមាគមអាដហុក ចុះថ្ងៃទី៩ ខែឧសភានេះ ឲ្យដឹងថា តាមការស៊ើបអង្កេត និង តាមដានយ៉ាងយកចិត្តិទុកដាក់លើសំណុំរឿងខាងលើ សមាគមអាដហុកចាត់ទុកថា ការចាប់ និងឃាត់ខ្លួន លោកវន់ ពៅ និងកម្មករ២២នាក់ផ្សេងទៀតនោះ គឺធ្វើឡើងដោយរំលោភច្បាប់ (រំលោភនីតិវិធី និងគ្មានមូលដ្ឋាន អង្គហេតុ និងអង្គច្បាប់ សម្រាប់ជាមូលដ្ឋាន ក្នុងការចាប់ និងឃុំខ្លួនអ្នកទាំង២៣រូប) ដែលជាការំលោភសិទ្ធិមនុស្សយ៉ាងធ្ងន់ធ្ងរ ។
ជនជាប់ចោទ២១ នាក់នេះ ដែលក្នុងនោះមាន លោកវន់ ពៅ គឺជាសកម្មជន តំណាងសង្គម និងកម្មករ ដែលត្រូវបានចាប់ខ្លួន នៅថ្ងៃទី២ និងទី៣ ខែមករា ក្នុងហេតុការណ៍បង្ក្រាបមួយទៅលើការតវ៉ារបស់កម្មករ ដែលទាមទារដំឡើងប្រាក់ឈ្នួលសមរម្យ១៦០ដុល្លារ ហើយពេលនោះបង្កឲ្យមានអំពើហិង្សាផ្ទុះឡើង នៅខាងមុខរោងចក្រយ៉ាក់ជីង ខណ្ឌពោធិ៍សែនជ័យ និងនៅខាងមុខសួនកាណាឌីយ៉ាផ្លូវស្រេង។ រហូតមកដល់ពេលនេះ កងកម្លាំងរដ្ឋាភិបាលដែលបង្ក្រាបទៅលើអ្នកតវ៉ា បណ្ដាលឲ្យមានអ្នកស្លាប់ និងរបួសរាប់សិបនាក់នោះ មិនទាន់ត្រូវបានចាប់ខ្លួនមកផ្ដន្ទាទោសនៅឡើយទេ៕
No comments:
Post a Comment
yes