ក្រុមសមត្ថកិច្ច ដែលថតបាន ពេលប្រើហិង្សាលើអ្នកសារព័ត៌មាន និងពលរដ្ឋ
ក្នុងទិវាពលកម្មអន្តរជាតិ ០១ ឧសភា (រូបថត តាត ឧត្តម)
បណ្តាញពលរដ្ឋខ្មែរដើម្បីកម្ពុជា ដែលមានមូលដ្ឋាននៅអាមេរិកស្នើទៅក្រសួងយុត្តិធម៌ និងក្រសួងមហាផ្ទៃ ឲ្យចាត់វិធានការចាប់ជនដៃដល់ ដែលបានវាយដំលើអ្នកសារព័ត៌មាន និងប្រជាពលរដ្ឋ នៅក្បែរទីលានប្រជាធិបតេយ្យ កន្លងមក យកទៅផ្តន្ទាទោសតាមផ្លូវច្បាប់ ។
លិខិតរបស់បណ្តាញពលរដ្ឋខ្មែរដើម្បីកម្ពុជា និងសមាជិកបណ្តាញផ្សេងទៀត ដែលមានមូលដ្ឋាននៅសហរដ្ឋអាមេរិក ចុះថ្ងៃទី០៥ ខែឧសភា បានបញ្ជាក់ថា កងកម្លាំងសន្តិសុខខណ្ឌដូនពេញបានប្រើអំពើហិង្សាទៅលើប្រជាពលរដ្ឋ ដែលមកតវ៉ាក្នុងករណីជម្លោះដីធ្លី និងករណីផ្សេងៗទៀត ដោយប្រើហិង្សា ជាពិសេស កងកម្លាំងសន្តិសុខក៏បានប្រើដំបងវាយដំទៅលើអ្នកសារព័ត៌មាន ដែលធ្វើឲ្យមានរបួលធ្ងន់ធ្ងរថែមទៀត ។
លិខិតដែលមានហត្ថលេខា លោក មឿង សុន ដែលត្រូវបានតុលាការកាត់ទោស ទាក់នឹងការរិះគន់ អំពីការបំពាក់អំពូលភ្លើងនៅអង្គរវត្តនោះ បន្តថា ជាក់ស្តែងនៅថ្ងៃទី០២ ខែឧសភា ឆ្នាំ២០១៤ អ្នកយកព័ត៌មានរបស់(VOD) លោក ឡាយ សាមានបានត្រូវកងកម្លាំងសន្តិសុខខណ្ឌដូនពេញ វាយឲ្យបាក់ឆ្អឹងថ្ពាល់ខាងស្តាំ ជាំក្បាលនិងដៃ។
កាលពីថ្ងៃទី០៤ ខែឧសភា ឆ្នាំ២០១៤ ក្រសួងព័ត៌មានចេញសេចក្តីថ្លែងការណ៍មួយដោយចាត់ទុកថា ជាការគំរាមកំហែង ការប្រើអំពើហិង្សា ការរឹបអូសសម្ភារៈ និងការប្រមាថចំពោះអ្នកសារព័ត៌មានថាជាការរំលោភបំពានធ្ងន់ធ្ងរដល់សេរីភាពសារព័ត៌មាននៅកម្ពុជា៕
No comments:
Post a Comment
yes