សង្គមស៊ីវិល ដែលធ្វើការលើការបោះឆ្នោត
បានលើកពីចំណុចគន្លឹះមួយចំនួន ប្រាប់ទៅ
គណៈប្រតិភូរបស់ប្រទេសជប៉ុនដែលមកជួយធ្វើការកែទម្រង់ គជប នៅកម្ពុជា
ដើម្បីទម្លាយភាពជាប់គាំងនយោបាយ។
នាយកប្រតិបត្តិគណៈកម្មាធិការអព្យាក្រឹត
និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវ(និចហ្វិច)
លោក ហង្ស ពុទ្ធា មានប្រសាសន៍ថា កាលពីថ្ងៃទី១៦ខែឧសភា
មន្ត្រីស្ថានទូតជប៉ុនបានជួបអ្នកជំនាញសម្ព័ន្ធកំណែទម្រង់ការ
បោះឆ្នោត (ERA) ដើម្បីពិភាក្សាលើការកែទម្រង់ការបោះឆ្នោតនៅកម្ពុជា។
លោកថា ជំនួបនោះ សម្ព័ន្ធកំណែទម្រង់ការបោះឆ្នោត បានស្នើឲ្យជប៉ុន
កែទម្រង់ គជប តាមរយៈដូរសមាសភាព គជប
និងធ្វើបញ្ជីឈ្មោះអ្នកបោះឆ្នោតសាជាថ្មី
ដើម្បីឲ្យការបោះឆ្នោតនៅកម្ពុជាទទួលបានសេរី និងយុត្តិធម៌។
លោក ហង្ស ពុទ្ធា បន្ថែមថា
បន្ទាប់ពីសម្ព័ន្ធកំណែទម្រង់ការបោះឆ្នោតស្នើទៅស្ថានទូតជប៉ុនដូចនេះ
មន្ត្រីស្ថានទូតមួយនេះឆ្លើយតបថា នឹងយកសំណើនេះ
ទៅពិភាក្សាជាមួយអ្នកជំនាញគណៈប្រតិភូជប៉ុន។
គណៈប្រតិភូរបស់ប្រទេសជប៉ុន១០រូប
ដែលមានជំនាញលើការងារបោះឆ្នោត កាលពីថ្ងៃ២០ ខែឧសភា ម្សិលមិញ
បានជួបជាមួយមន្ត្រីគណបក្សសង្គ្រោះជាតិ និងគណបក្សប្រជាជនកម្ពុជា
ដើម្បីសិក្សាពីចំណុចនៃកំណែទម្រង់ការបោះឆ្នោតនៅកម្ពុជា។
ប្រធានក្រុមគណៈកម្មការចម្រុះផ្នែកការ
បោះឆ្នោតនៃគណបក្សសង្គ្រោះជាតិ លោក សុន ឆ័យ មានប្រសាសន៍ថា
គណៈប្រតិភូជប៉ុនដែលមកជួបក្រុមការងារគណបក្សនេះ
មិនលើកយកបញ្ហានយោបាយទេ។ លោកថា ជំនួបនេះ
គ្រាន់តែជំហានដំបូងដែលក្រុមការងារជប៉ុន
ចុះមកស្រាវជ្រាវលើលទ្ធភាពនៃកំណែទម្រង់ការបោះឆ្នោត
ដើម្បីធ្វើរបាយការណ៍ជូនទៅរដ្ឋាភិបាលជួយលើការកែទម្រង់
ការបោះឆ្នោតនៅកម្ពុជាតែប៉ុណ្ណោះ «ទីមួយគេស្រាវជ្រាវសិន
ឲ្យដឹងថាតើប្រទេសកម្ពុជា ខ្វះខាតអី ត្រូវការអ្វីខ្លះ
បន្ទាប់ស្រាវជ្រាវហើយ គេនឹងធ្វើរបាយការណ៍មួយទៅរាជរដ្ឋាភិបាល
ដើម្បីរៀបចំជាគម្រោងជំនួយដើម្បីជួយលើកិច្ចការកំណែ
ទម្រង់ការបោះឆ្នោតនៅកម្ពុជា»។
កាលពីថ្ងៃអង្គារម្សិលមិញនោះដែរ
រដ្ឋមន្ត្រីក្រសួងមហាផ្ទៃ លោក ស ខេង
ក៏បានជួបជាមួយគណៈប្រតិភូជប៉ុនផងដែរ។ លោកបញ្ជាក់ថា
ការពិភាក្សាផ្តោតថាតើអ្វីខ្លះចាំបាច់ ដើម្បីធ្វើការកែទម្រង់
ហើយជប៉ុនមិនមានជំហគាំទ្រគណបក្សណាមួយឡើយ។
បេសកម្មរបស់ជប៉ុនលើការបោះឆ្នោតនៅ
កម្ពុជា ធ្វើឡើងបន្ទាប់ពីនាយករដ្ឋមន្ត្រីលោក ហ៊ុន សែន
បានជួបនាយករដ្ឋមន្ត្រីជប៉ុន លោក ស៊ីនហ្សូ អាបេ (Shinzo Abe)
ដោយស្នើឲ្យជប៉ុនបញ្ជូនមន្ត្រីជំនាញការបោះឆ្នោតមកកាន់កម្ពុជា
ដើម្បីជួយធ្វើកំណែទម្រង់ការបោះឆ្នោត ខណៈគណបក្សប្រជាជនកម្ពុជា
និងគណបក្សសង្គ្រោះជាតិ
មិនទាន់ដោះស្រាយភាពជាប់គាំងនយោបាយនៅកម្ពុជានៅឡើយ៕
No comments:
Post a Comment
yes