ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ គ្រោងចេញទៅក្រៅប្រទេស នៅអំឡុងពាក់កណ្តាលខែក្រោយនេះ ដើម្បីពិនិត្យសុខភាព ខណៈលោកទើបចេញពីពន្ធនាគារ។
គម្រោងចេញទៅក្រៅប្រទេសរបស់សកម្មជនរូបនោះ ធ្វើឡើងមួយថ្ងៃប៉ុណ្ណោះ ក្រោយពីសាលាដំបូងរាជធានីភ្នំពេញ បានកាត់តម្រឹមទោស ឲ្យនៅក្រៅឃុំបណ្តោះអាសន្ន កាលពីថ្ងៃសុក្រទី៣០ខែឧសភាឆ្នាំ២០១៤ ។
លោក វន់ ពៅ ឲ្យVODដឹងនៅថ្ងៃទី៣១ខែឧសភានេះថា នៅថ្ងៃទី១៨ខែមិថុនាឆ្នាំ២០១៤ខាងមុខនេះ លោកនឹងទៅប្រទេសថៃ ដើម្បីពិនិត្យតាមដានសុខភាព ក្រោយពេលលោកបានវះកាត់សាច់ដុំក្រលៀន កាលពីថ្ងៃទី២៣ខែឧសភាឆ្នាំ២០១៣។
សកម្មជនរូបនោះឲ្យដឹងទៀតថា គ្រូពេទ្យជំនាញ តម្រូវឲ្យលោកទៅពិនិត្យសុខភាព ៣ទៅ៦ខែម្តង ដើម្បីតាមដានកាវិវឌ្ឍន៍នៃអាការៈជំងឺ។ ប៉ុន្តែលោកថា លោកបានខកខាន ធ្វើតាមវេជ្ជបញ្ជារបស់គ្រូពេទ្យ ដោយសារតុលាការមិនអនុញ្ញាតឲ្យលោកនៅក្រៅឃុំ ពេលរដ្ឋាភិបាលចាប់ឃុំខ្លួនលោក។
រដ្ឋាភិបាលបានចាប់ឃុំខ្លួន លោក វន់ ពៅ នាថ្ងៃទី២ខែមករាឆ្នាំ២០១៤ ដោយចោទប្រកាន់ពីបទញុះញង់ឲ្យមានហិង្សា បង្កឲ្យមានការបំផ្លាញទ្រព្យសម្បត្តិសាធារណៈ និងបទចោទមួយចំនួនទៀត ពេលលោកចុះឃ្លាំមើលកម្មករតវ៉ាទាមទារប្រាក់ឈ្នួល១៦០ដុល្លារ មុខរោងចក្រយ៉ាកជីង ជាយរាជធានីភ្នំពេញ។
ការចាប់ខ្លួននោះចំពេលដែលចលនាអ្នកគាំទ្របក្សប្រឆាំង ធ្វើបាតុកម្មហែក្បួនក្នុងរាជធានី ប្រឆាំងលទ្ធផលបោះឆ្នោត ជំរុញឲ្យលោកនាយករដ្ឋមន្ត្រី ហ៊ុន សែន ដែលកាន់អំណាចជាង៣០ឆ្នាំមកនេះ ចុះចេញពីតំណែង ។
ក្រោមហេតុផលនេះ អ្នកតាមដានព្រឹត្តិការណ៍សង្គមយល់ថា ការចាប់ខ្លួន លោក វន់ ពៅ និងមនុស្សផ្សេងទៀត នាពេលនោះ ថាជាវិធានការទប់ស្កាត់ដើម្បីការពារអំណាច។
No comments:
Post a Comment
yes