លោកនាយករដ្ឋមន្ត្រី ហ៊ុន សែន បានសម្រេចកាត់ដី នៅស្រុកស្នួលខេត្តក្រចេះ ទំហំជាង៧០០ហិកតា ឲ្យពលរដ្ឋដែលបានបណ្តេញចេញជាង៤០០គ្រួសារ ដើម្បីបញ្ចប់ការតវ៉ា ដើរហែក្បូនក្នុងរាជធានីភ្នំពេញ។
តាមលិខិតជូនដំណឹង របស់អភិបាលខេត្តក្រចេះ លោក សរ ចំរុង ដែលVODទទួលបាននៅថ្ងៃទី៣១ខែឧសភានេះ ឲ្យដឹងថា លោកនាយករដ្ឋមន្ត្រី បានឯកភាព ឲ្យក្រសួងរៀបចំដែនដីនគរោបនីយកម្មនិងសំណង់ ប្រគល់ដីសម្បទានសង្គមកិច្ច ទំហំ៧៥០ហិកតា នៅចំណុចត្រពាំងឈូក ភូមិស្រែថ្មី ឃុំឃ្សឹម ស្រុកស្នួល ខេត្តក្រចេះ ជូនប្រជាពលរដ្ឋដែលបានបណ្តេញចេញ ដើម្បីបញ្ចប់ការតវ៉ា។
កាលពីដើមខែឧសភាឆ្នាំ២០១៤នេះ អ្នកដែលបានបណ្តេញចេញនៅខេត្តក្រចេះ បានឡើងមកតវ៉ានៅរាជធានីភ្នំពេញ ដោយហែក្បួនតាមដងផ្លូវ ដាក់ញត្តិទៅក្រសួងពាក់ព័ន្ធ និងខុទ្ទកាល័យលោកនាយករដ្ឋមន្ត្រី ហ៊ុន សែន សុំអន្តរាគមន៍ដើម្បីឲ្យពួកគេបានទៅរស់នៅកន្លែងដើមវិញ។
លិខិតអភិបាលខេត្តក្រចេះបញ្ជាក់ថា ការសម្រេចឲ្យដីប្រជាពលរដ្ឋនេះ ជាការអនុគ្រោះរបស់ថ្នាក់ដឹកនាំ បើទោះបីដឹងថាពលរដ្ឋទាំងអស់បានមករស់នៅលើដីរដ្ឋខុសច្បាប់មុនការបណ្តេញចេញក៏ដោយ។
ប៉ុន្តែស្រាប់តែពលរដ្ឋដែលបានបណ្តេញចេញអះអាងថា ពួកគេ៤០៥គ្រួសារនៅម្តុំពាមប៉ោអូបី ភូមិស្រែថ្មី ឃុំឃ្សឹម ស្រុកស្នួលខេត្តក្រចេះ ត្រូវបានអាជ្ញាធរខេត្ត ដុតផ្ទះពួកគេ បណ្តេញចេញ កាលពីចុងខែមេសាឆ្នាំ២០១៤ ដើម្បីយកដីជាង២០២៥ហិកតា ឲ្យទៅក្រុមហ៊ុនវៀតណាម ឈ្មោះ ប៊ិញ ភឿកពីរ ដែលទទួលបានដីសម្បទានពីរដ្ឋាភិបាល។
នៅថ្ងៃទី៣១ខែឧសភានេះ អ្នកមានជម្លោះដីធ្លី ដែលកំពុងស្នាក់នៅវត្តសាមគ្គីរង្សី រាជធានីភ្នំពេញ នឹងទៅពិនិត្យទំហំដីជាក់ស្តែង ដែលអាជ្ញាធរខេត្ត សន្យាផ្តល់ឲ្យ ហើយបានអំពាវនាវឲ្យអង្គការឃ្លាំមើលការរំលោភសិទ្ធិមនុស្ស និងអ្នកសារព័ត៌មាន អមដំណើរ ដោយបារម្ភពីការចាប់ខ្លួនពួកគេ។
No comments:
Post a Comment
yes