ទីភ្នាក់ងារសារព័ត៌មានចិនស៊ីនហួរបានរាយការណ៍ថា មកដល់ថ្ងៃអាទិត្យនេះពលរដ្ឋចិនដែលជាអ្នកជំនួញ និងអ្នកទេសចរ បានភៀសខ្លួនចេញពីប្រទេសវៀតណាម កើនឡើងជា៣០០០នាក់ហើយ ដោយសារពួកគេខ្លាចផ្ទុះអំពើហិង្សាផ្ទុះជាថ្មីម្ដងទៀត ដែលពលរដ្ឋវៀតណាមបានធ្វើឡើងកាលពីថ្ងៃ១៣ ខែឧសភានេះ។
អំពើហិង្សានៅប្រទេសវៀតណាមដែលបាតុករផ្ទុះកំហឹងប្រឆាំងចិន ករណីជម្លោះសមុទ្រចិនភាគខាងត្បូងបានទាញទម្លាក់ស្ថានការណ៍ទំនាក់ទំនងចិនវៀតណាម ធ្លាក់ចុះមួយកម្រិតថែមទៀត ហើយស្របពេលនេះទីភ្នាក់ងារសារព័ត៌មានផ្លូវការរបស់ចិនដដែលនេះបានបញ្ជាក់ថា ពលរដ្ឋចិនមានមុខរបរជាអ្នកជំនួញក្ដី ជាអ្នកទេសចរក្ដី បានភៀសខ្លួនចេញពីប្រទេសវៀតណាមកើនជាង៣០០០នាក់ គឺចាប់តាំងពីថ្ងៃទី១៣ ឧសភាមកនោះ។
នៅក្នុងកុប្បកម្មរបស់ជនជាតិវៀតណាមប្រឆាំងចិន ករណីជម្លោះព្រំដែនសមុទ្រចិនភាគខាងត្បូង យ៉ាងហោចណាស់បណ្ដាលឲ្យមានការដុតបំផ្លាញរោងចក្រចិនចំនួន១៥ កន្លែង ហើយពលរដ្ឋចិន១៦នាក់រងរបួសធ្ងន់ ក្នុងនោះម្នាក់បានស្លាប់។
រដ្ឋាភិបាលទីក្រុងប៉េកាំង បានដាក់ការទទួលខុសត្រូវទាំងស្រុងទៅលើរដ្ឋាភិបាលទីក្រុងហាណូយ ហើយបានទាមទារឲ្យក្រុងហាណូយផ្ដល់សំណងលើការខូចខាតទ្រព្យសម្បត្តិដែលត្រូវបានបំផ្លាញ ហើយទទួលខុសត្រូវចំពោះអាយុជីវិតរបស់អ្នកស្លាប់ជនជាតិចិនទៀតផង។
សូមជម្រាបថា កុប្បកម្មផ្ទុះកាលពីថ្ងៃទី១៣ ឧសភា ដោយកំហិងជាតិនិយមរបស់ពលរដ្ឋវៀតណាម គឺបានផ្ទុះឡើងចំនួន២៣ខេត្ត ក្នុងចំណោម៦៣ ខេត្តនៃប្រទេសវៀតណាម។ ខេត្តដែលផ្ទុះកុប្បកម្មខ្លាំងជាងគេនៅខេត្តប៊ីងឌុង ភាគខាងត្បូង។
ដើមចមនៃអំពើកុប្បកម្មនេះ ដោយសារតែជនជាតិវៀតណាមផ្ទុះកំហិងប្រឆាំងចិន ដែលបានបញ្ជូននានាមកខួងយកឧស្ម័ននៅប្រជុំកោះស្ព្រាតលី សមុទ្រចិនភាគខាងត្បូង កាលពីថ្ងៃទី១២ ឧសភា ដោយពួកគេចាត់ទុកថា ជាដែនអធិបតេយ្យរបស់វៀតណាម៕
No comments:
Post a Comment
yes