តំណាងបុគ្គលិកក្រុមហ៊ុនកាល់តិច ដាក់ញត្តិទៅស្ថានទូតអាមេរិក
នាព្រឹកនេះ (រូបថត៖ កាន់ វិច្ឆិកា)
តំណាងបុគ្គលិកក្រុមហ៊ុនកាល់តិច ប្រមាណជា៥០នាក់ នៅព្រឹកថ្ងៃព្រហស្បតិ៍នេះ បានយកញត្តិដាក់ទៅស្ថានទូតអាមេរិកប្រចាំកម្ពុជា សុំឲ្យជួយអន្តរាគមន៍ទៅក្រុមហ៊ុនឈេហ្វរ៉ុន ដំឡើងប្រាក់ខែគោលចំនួន ១៦០ដុល្លារ និងប្រាក់ខែទី១៣ ដល់ពួកគាត់។
តំណាងបុគ្គលិកផ្នែកចាក់សាំងសាខាទឹកល្អក់ លោក យឿន រ៉េត ឲ្យដឹងថា លោករួមនឹងសហជីព ព្រមទាំងតំណាងបុគ្គលិកផ្សេងទៀត បានដាក់ញត្តិសុំអន្តរាគមន៍នេះ នៅស្ថានទូតអាមេរិកប្រចាំនៅកម្ពុជា ក្នុងសង្កាត់វត្តភ្នំ នៅម៉ោងប្រមាណ ៩ព្រឹកនេះ ដោយរំពឹងថាអាមេរិកនឹងជំរុញឲ្យឈេហ្វរ៉ុនខេមបូឌាលីមីធីត ដែលជាអ្នកផ្តល់សេវាឲ្យក្រុមហ៊ុនកាល់តិច ដោះស្រាយលើការទាមទាររបស់ពួកគាត់បានឆាប់ ដើម្បីធានាដល់ការរស់នៅសមរម្យ និងលក្ខខណ្ឌការងារល្អប្រសើរសម្រាប់កម្មករនិយោជិតនៅកម្ពុជា «យើងនឹងបន្តកូដកម្មដោយអហិង្សាតទៅទៀត ដំណាក់កាលជម្រើសចុងក្រោយរបស់យើង គឺស្ថានទូតដែលជាស្ថានទូតរបស់អាមេរិក ហើយជាក្រុមហ៊ុនរបស់អាមេរិក សង្ឃឹមថា ស្ថានទូតអាមេរិក នឹងមិនបណ្តែតបណ្តោយឲ្យរឿងហ្នឹងអូសបណ្លាយពេលវេលាតទៅទៀតទេ»។
ក្នុងញត្តិដែលដាក់ទៅស្ថានទូតអាមេរិករបស់បុគ្គលិកក្រុមហ៊ុនកាល់តិច គឺសុំឲ្យមានអន្តរាគមន៍លើក្រុមហ៊ុនឈេហ្វរ៉ុនលីមីធីត ផ្តល់នូវប្រាក់ខែសមរម្យ និងលក្ខខណ្ឌការងារមួយចំនួន ដូចជា ស្នើឲ្យក្រុមហ៊ុនផ្តល់ប្រាក់រង្វាន់ប្រចាំឆ្នាំ (ប្រាក់ខែទី១៣) យ៉ាងហោចណាស់ឲ្យស្មើនឹងប្រាក់ឈ្នួលខែចុងក្រោយរបស់កម្មករនិយោជិតដោយអនុវត្តសម្រាប់ឆ្នាំ២០១៤នេះ និងសុំឲ្យដំឡើងប្រាក់ឈ្នួលគោលដល់កម្មករនិយោជិតផ្នែកអនាម័យ ផ្នែកចាក់សាំង ប្តូរប្រេងម៉ាស៊ីនចំនួន ១៦០ដុល្លារក្នុងមួយខែ និងដំឡើងប្រាក់ឈ្នួលបន្ថែមចំនួន៥០ដុល្លារ ដល់កម្មករនិយោជិត ផ្នែកបេឡាករ និងត្រូវដំឡើងចាប់ពីខែឧសភា ឆ្នាំ២០១៤នេះតទៅ។
ប្រធានសហពន្ធ័សហជីពកម្មករចំណីអាហារ និងសេវាកម្មកម្ពុជា លោក ស ម៉ូរ៉ា ក៏បានបង្ហាញក្តីជឿជាក់យ៉ាងមុតមាំ ចំពោះការឆ្លើយតបជាវិជ្ជមានពីស្ថានទូតអាមេរិក ព្រោះកម្មករនៅក្រុមហ៊ុនកាល់តិចទទួលបានប្រាក់ខែតិច បើប្រៀបធៀបនឹងបណ្តាក្រុមហ៊ុនប្រេងឥន្ធនៈផ្សេងៗទៀតក្នុងប្រទេសកម្ពុជា ។ លោកបន្តថា អាមេរិកនឹងមិននៅស្ងៀមចំពោះការស្នើសុំរបស់លោក និងបុគ្គលិកនោះទេ ដោយសារតែក្រុមហ៊ុនឈេហ្វរ៉ុនជាក្រុមហ៊ុនស្តង់ដារអន្តរជាតិរបស់អាមេរិក «សម្រាប់ជំហររបស់បងប្អូនកម្មករនិយោជិក នៅពេលនេះ កូដកម្មរបស់ពួកគាត់នៅតែបន្ត ហើយសម្រាប់សហជីព យើងធ្វើយុទ្ធនាការអន្តរជាតិ ហើយនិងធ្វើ Global Compaign ផងដែរ។ យុទ្ធនាការអន្តរជាតិនោះគឺយើងទំនាក់ទំនងជាមួយ សហជីពអន្តរជាតិសុំឲ្យមានការ Solidarity Action ដែលជាសកម្មភាពសាមគ្គី នៅតាមបណ្តាលប្រទេសដែលមានកាល់តិច នៅទីនោះ»។
ទាក់ទងនឹងករណីនេះ មន្ត្រីទំនាក់ទំនងសេដ្ឋកិច្ចប្រចាំស្ថានទូតអាមេរិកនៅកម្ពុជា លោក David R. Myers បានស្វាគមន៍ និងទទួលយកញត្តិនោះ ហើយមានប្រសាសន៍ថា លោកនឹងបញ្ជូនញត្តិនេះទៅឯកអគ្គរដ្ឋទូត ដើម្បីពិនិត្យ «ពួកយើង នឹងយកញត្តិនេះ ទៅខាងផ្នែកគោលនយោបាយ រួចបញ្ជូលទៅលោកឯកអគ្គរដ្ឋទូត»។
ក្រុមហ៊ុនកាល់តិចមាន២៦ស្ថានីយទូទាំងរាជធានីខេត្ត។ បើតាមការបញ្ជាក់របស់ប្រធានសហពន្ធ័សហជីពកម្មករចំណីអាហារ និងសេវាកម្មកម្ពុជា បុគ្គលិកដែលធ្វើកូដកម្មទាមទារដំឡើងប្រាក់ខែគោល ១៦០ដុល្លារ និងប្រាក់ខែទី១៣ ចាប់តាំងពីថ្ងៃចន្ទ ទី១២ ខែឧសភាមកនោះ គឺមានតែបុគ្គលិកធ្វើការនៅរាជធានីភ្នំពេញ ទាំង១៨ស្ថានីយប៉ុណ្ណោះ។ ដោយឡែកស្ថានីយនៅតាមបណ្តាខេត្តមួយចំនួន ដូចជា ខេត្តសៀមរាប ខេត្តបាត់ដំបង កំពង់ចាម និងព្រះសីហនុ បើកដំណើរការជាធម្មតា។ តែទោះជាយ៉ាងណា រហូតមកដល់ថ្ងៃនេះ ការធ្វើកូដកម្មបានឈានដល់ថ្ងៃទី៤ហើយ នៅតែពុំទាន់មានដំណោះស្រាយណាមួយនៅឡើយ ហើយក្រុមហ៊ុនបានដាក់រនាំងដែក និងចងខ្សែព័ទ្ធបិទស្ថានីយ៍ចាក់សាំងទាំងអស់។ ចំណែកបុគ្គលិកវិញ នៅតែប្រកាន់ជំហរធ្វើកូដកម្មនេះជារៀងរាល់ថ្ងៃ រហូតដល់មានដំណោះស្រាយសមរម្យសម្រាប់ពួកគាត់៕
No comments:
Post a Comment
yes