អាជ្ញារធរខេត្តកំពង់ឆ្នាំងរារាំងពលរដ្ឋឃុំតាជេសមិនឲ្យដាក់ញត្តិជូនអភិបាលខេត្ត

កាលពីថ្ងៃទី០៩ មិថុនា ២០១៤ ពលរដ្ឋរងគ្រោះដីធ្លីនៅភូមិឡពាង ឃុំតាជេស ស្រុកកំពង់​ត្រឡាច ខេត្តកំពង់ឆ្នាំង ជាង១០០នាក់ តំណាងឲ្យ៨៨គ្រួសារ បានយកញត្តិស្វែងរកអន្តរាគមន៏​រឿងជម្លោះ​ដីធ្លី​ជា​មូយ​ក្រុមហ៊ុន KDC ដាក់ជូនអភិបាលខេត្តកំពង់ឆ្នាំង តែត្រូវបានអាជ្ញាធររារាំង ។

ការដាក់ញត្តិរបស់ពលរដ្ឋ ស្វែងរកអន្តរាគមន៏ពីអភិបាលខេត្តកំពង់ឆ្នាំង គឺធ្វើឡើងស្របពេល​ការ​ប្រកាសសុពលភាពក្រុមប្រឹក្សាខេត្ត ក្រុង កំពង់ឆ្នាំង និងស្រុករលាប្អៀ នៅសាលាខេត្ត តែត្រូវ​បាន​អា​ជ្ញារ​ធរ​រារាំង មិនអនុញត្តិឲ្យពលរដ្ឋដាក់ញត្តិជូនអភិបាលខេត្តឡើយ ដោយបិទទ្វារបង​ចាក់សោ​សាលាខេត្ត ហើយប្រាប់ពលរដ្ឋថាមិនមានមន្រ្តីសាលាខេត្តធ្វើការនោះឡើយ ។

លោក កែវ ថៃ ក្រុមប្រឹក្សាជាប់ឆ្នោតរបស់គណបក្សសង្គ្រោះជាតិ ខេត្តកំពង់ឆ្នាំង ដែលបានចូល រួមប្រកាសសុពលរដ្ឋ នៅថ្ងៃនោះ លោកបានមានប្រសាសន៏ឲ្យកម្មវិធី សម្លេងសង្គ្រោះជាតិ ដឹង​ថា មូលហេតុដែលអាជ្ញាររារាំង ហើយលើកហេតុផលមិនមានមន្រ្តីសាលាធ្វើការនោះ គឺជារឿង​មិន​ពិត តែអ្វីធាតុពិតជាក់ស្តែង អាជ្ញាធរមិនចង់ឲ្យ​ពលធ្វើការតវ៉ារឿងរ៉ាងទំនាស់ដីធ្លី​តំបន់ឡពាង​បន្តទៀតជាមួយក្រុមហ៊ុន KDC ភរិយាលោក ស៊ុយ សែម ដែលរដ្ឋមន្រ្តីក្រសួងរ៉ែ និងថាមពល ។

លោកបន្តថា ក្នុងព្រឹត្តិការណ៏នោះ សូម្បីតែក្រុមប្រឹក្សាខេត្ត និងស្រុករលាប្អៀ របស់គណបក្ស ប្រជាជន ដែលទើបប្រកាសសុពលភាពនៅលាលាខេត្ត ព្រឹកថ្ងៃទី០៩ មិថុនានោះ ក៏បានគេចខ្លួន ពីការស្វែងរកអន្តរាគមន៏របស់ពលរដ្ឋ រឿងជម្លោះដីធ្លីជាមួយលោកស្រី ជា ខេង នេះផងដែរ ។

លោក កែវ ថៃ បន្ថែមទៀតថា ក្នុងនោះមានតែក្រុមប្រឹក្សារបស់គណបក្សសង្គ្រោះជាតិ តែ​ប៉ុណ្ណោះ ដែលជួបជាមួយពលរដ្ឋ ដោយសន្យាស្វែងរកអន្តរាគមណ៏ជូនពួកគាត់ ពីបញ្ហាជម្លោះដី ធ្លីដ៏រាំរ៉ៃរបស់ពួកគាត់ជាមួយក្រុមហ៊ុន KDC នេះ តាមគ្រប់រូបភាពដើម្បីផ្តល់យុត្តិធម៌ជូនពួកគាត់ ដែលជាម្ចាស់ដី ។

ជម្លោះដីធ្លីរវាងប្រជាពលរដ្ឋ នៅភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង ជា​មួយក្រុមហ៊ុន KDC របស់លោកស្រី ជា ខេង ភរិយាលោក ស៊ុយ សែម បានកើតឡើងតាំងពីឆ្នាំ ២០០៧មកម្លេះ ដែលមានចំនួន១៤៥ហិតា ប៉ះពាល់ចំនួន៨៨គ្រួសារ រហូតមានការចាប់តំណាង​ពល​រដ្ឋ​ដាក់ពន្ធនាគារជាច្រើនខែ ។

សូមជំរាបថា បញ្ហាជម្លោះដីធ្លីនៅកម្ពុជាសព្វថ្ងៃ បានក្លាយទៅជាជម្ងឺមហារីកដ៏ធ្ងន់ធ្ងរ ដូច្នេះចាំ​បាច់​ត្រូវតែមានវិធានការទប់ស្កាត់ជាបន្ទាន់ ដើម្បីកុំឲ្យករណីនេះបន្តកើតមានកាន់តែរីករាលដាល ធំឡើងៗបន្ថែមទៀត ព្រោះអ្នកដែលរងទុក្ខគឺពលរដ្ឋក្រីក្រទុកខ្សោយ ៕