ប្រទេសកម្ពុជានិងគ្មានសង្រ្គាម ឬការរើសអើងពូជសាសន៍ឡើយប៉ុន្ដែមានការរើសអើងនយោបាយ និងវិសមភាពនៃការអនុវត្តច្បាប់រវាងអ្នកមានអំណាច និងអ្នកក្រគ្មានអំណាច

ដោយ៖ ទេព សស៊ីណា

លោកប្រធាន សម រង្ស៊ី និងលោកអនុប្រធាន កឹម សុខា បានបញ្ជាក់ពីគោលជំហររបស់លោក និងគណបក្សសង្រ្គោះជាតិ ថា គណបក្សសង្រ្គោះជាតិ​គ្មានគោលនយោបាយរើសអើង​ជាតិ​សាសន៍ ឬជនជាតិណាមួយ ដូចការលើកឡើងរបស់អ្នកមួយចំនួននោះទេ តែផ្ទុយទៅវិញ​គណ​បក្សសង្រ្គោះជាតិ នឹងជំរុញឲ្យមានសមភាព និងយុតិ្ដធម៌ខាងនយោបាយ សេដ្ឋកិច្ច និងសង្គម​កិច្ច​ស្របតាមគោលការណ៍ប្រជាធិបតេយ្យ ដើម្បីកែលំអរសង្គម ប្រកបដោយត្រឹមត្រូវ។

ថ្លែងក្នុងពិធីបុណ្យរ៉ូយ៉ាហាជី នៃសាសនាឥស្លាម កាលពីថ្ងៃទី២៤ ខែកញ្ញា ឆ្នាំ២០១៥ នៅខេត្ត​កំពង់ឆ្នាំង លោកអនុប្រធាន កឹម សុខា មានប្រសាន៍ថា ប្រទេសកម្ពុជា នឹងគ្មានសង្រ្គាមនោះទេ នៅពេលគណបក្សសង្រ្គោះជាតិឈ្នះឆ្នោត ព្រោះគណបក្សសង្រ្គោះជាតិ មិនដែលយកអ្នកមាន ឬអ្នកក្រ ឬជាតិសាសន៍ណាមួយជាសត្រូវឡើយ ហើយគោលនយោបាយរបស់គណបក្ស​សង្រ្គោះជាតិ នឹងការពារប្រជាពលរដ្ឋទាំងអស់​ដែលរស់នៅស្រប​ច្បាប់នៅកម្ពុជា​ដោយយុត្តិធម៌​ក្នុងក្របខ័ណ្ឌច្បាប់ ជូនទាំងអ្នកមាន និងទាំងអ្នកក្រ ដើម្បីទទួលបាននូវឱកាស និងភាពស្មើគ្នា​ខាងផ្នែកនយោបាយ សេដ្ឋកិច្ច សង្គមកិច្ច និងយុតិ្ដធម៌សង្គមជាដើម។

ជុំវិញករណីនេះ លោកអនុប្រធាន កឹម សុខា ក៏បានសម្ដែងការសោកស្ដាយចំពោះ​ភាពអយុត្ដិ​ធម៌សង្គម នយោបាយ និងច្បាប់ដែលមិនមានការអនុវត្តន៍ឲ្យបានស្មើគ្នារវាងអ្នកមានអំណាច និង​អ្នកក្រ ។ លោកបន្ដថា គ្មានទេជំលោះរវាងអ្នកមាន និងអ្នកក្រ ដូចនេះសង្រ្គាមក៏គ្មានដែរ ព្រោះគណបក្សសង្រ្គោះជាតិ គោរពសិទ្ធិសេរីភាព នយោបាយ សេដ្ឋកិច្ច និងជំនឿសាសនា​របស់ប្រជាពលរដ្ឋ ។ ( សំឡេង )

ពាក់ព័ន្ធនឹងករណីនេះ លោកប្រធាន សម រង្ស៊ី ក៏បានលើកឡើង​ពីការដាក់បញ្ចូល​ជនជាតិ​ចាម​ជាបេក្ខជនតំណាងរាស្រ្ដ ជាជនជាតិឥស្លាម ដើម្បីជួយសម្រួលដល់ទុក្ខលំបាក និងស្វែងយល់​ពី​តម្រូវការទូទៅរបស់ប្រជាពលរដ្ឋខ្មែរឥស្លាមផងដែរ។

គួរបញ្ជាក់ថា សេរីភាពនៃជំនឿសាសនាត្រូវបានគាំពារដោយច្បាប់រដ្ឋធម្មនុញ្ញ​នៃព្រះរាជាណា​ចក្រកម្ពុជា ឆ្នាំ១៩៩៣ ហើយរដ្ឋធម្មនុញ្ញ និងច្បាប់អន្ដរជាតិ ក៏មិនអនុញ្ញាតិឲ្យមានការរើស​អើង​ជាតិសាសន៍ណាមួយដែរ ហេតុនេះសិទ្ធិសេរីភាពរបស់ប្រជាពលរដ្ឋ ត្រូវបានគាំពារដោយច្បាប់​ជាតិ និងអន្ដរជាតិ ដើម្បីការរួមរស់ជាមួយគ្នាដោយសេចក្ដីថ្លៃថ្នូរ និងសន្ដិភាពក្នុងសង្គមឆ្ពោះទៅ​រកការអភិវឌ្ឍន៍ជាតិដ៏ពិតប្រាកដ៕