តុលាការកំពូលប្រកាសសាលក្រមរឿងមេបក្សប្រឆាំង
សម រង្ស៊ី រឿងដកបង្គោលព្រំដែនថ្ងៃទី១ មិនា
តុលាការកំពូល បើកសវនាការជំនុំជម្រះលើសំណុំរឿងដកតម្រុយបង្គោលព្រំដែនកម្ពុជា-វៀតណាម លេខ ១៨៥ នាព្រឹកថ្ងៃទី២៣កុម្ភៈ ឆ្នាំ២០១១។ដោយអ្នកតំណាងរាស្ត្រគណបក្សសម រង្ស៊ី ជាច្រើនរូប និងកសិករ មាសស្រី និងលោក ព្រំ ជា អភិបាលស្រុកចន្ទ្រា លោក ជា យាង រួមទាំងលោក ជូង ជូងី មេធាវីការពារលោកសមរង្ស៊ី និងកសិករ ២ រូប ព្រមទាំងមេធាវីការពារអភិបាលស្រុកចន្ទ្រា លោក ច័ន្ទ
សុខយាង។នៅក្នុងសវនាការ កសិករពីរនាក់គឺ លោក ព្រំ ជា និងអ្នកស្រី មាស ស្រី បានស្នើសុំដល់លោកចៅក្រម លើកលែងការចោទប្រកាន់ ដោយសំអាងថា គ្មានលុយដើម្បីបង់សំណង ហើយសុំឲ្យដោះស្រាយដីស្រែ ដែលត្រូវបានបោះបង្គោលតម្រុយព្រំដែន។ចំណែកលោកមេធាវី ជូង ជូងី ដែលការពារលោកសមរង្ស៊ី
និងកសិករពីររូប បានសុំឲ្យតុលាការ លើកលែងការចោទប្រកាន់ ដោយថា លោកសមរង្ស៊ី ដែលកំពុងគេចខ្លួន នៅក្រៅប្រទេស គ្មានចេតនា ក្នុងការបំផ្លាញតម្រុយបង្គោលព្រំដែនកម្ពុជាវៀតណាមឡើយ។ លោកសមរង្ស៊ី គ្រាន់តែការពារទឹកដីប៉ុណ្ណោះ។ចំណែកលោកមេធាវី ច័ន្ទ សុខយាង ការពារក្តីឲ្យអភិបាលស្រុកចន្ទ្រា បានស្នើដល់ចៅក្រមតុលាការកំពូល ឲ្យរក្សាសេចក្តីសម្រេចរបស់តុលាការសាលាឧទ្ធរណ៍ និងតុលាការរាជធានីភ្នំពេញ។ លោកមេធាវី សំអាងថា រាល់ការបោះ
បង្គោលតម្រុយព្រំដែន ធ្វើឡើងស្របតាមច្បាប់ និងអនុសញ្ញាព្រំដែនបំពេញ
បន្ថែម។លោកមេធាវី បានចាត់ទុកទង្វើរបស់លោកសមរង្ស៊ី ក្នុងការដកតម្រុយបង្គោលព្រំដែន ថាជាទង្វើអាណាធិបតេយ្យ និងរំលោភច្បាប់។
គួរបញ្ឆាក់ថា កាលពីថ្ងៃទី២៧មករា ឆ្នាំ២០១០ លោកសមរង្ស៊ី ដែលកំពុងស្នាក់នៅក្រៅប្រទេស ត្រូវបានតុលាការខេត្តស្វាយរៀង សម្រេចផ្តន្ទាទោសដាក់ពន្ធនាគាររយៈពេល ២ ឆ្នាំ ក្នុងសំណុំរឿងដកតម្រុយបង្គោលព្រំដែនកម្ពុជា-វៀតណាម នៅខេត្តស្វាយរៀង។ រីឯកសិករពីររូបទៀត គឺអ្នកស្រី មាស ស្រី និងលោក ព្រំ ជា ត្រូវតុលាការផ្តន្ទាទោសដាក់ពន្ធនាគាររយៈពេល ១ ឆ្នាំ ម្នាក់។ ពិរុទ្ធជនទាំងបី ក៏ត្រូវរួមគ្នាបង់សំណងរដ្ឋប្បវេណី នូវទឹកប្រាក់សរុបចំនួន ៦៣ លានរៀល។កាលពីថ្ងៃទី១៣តុលា ឆ្នាំ២០១០ ចៅក្រមតុលាការសាលាឧទ្ធរណ៍ បានសម្រេចតម្កល់សាលក្រមព្រហ្មទណ្ឌ របស់តុលាការខេត្តស្វាយរៀង ( កាលពីថ្ងៃទី២៧ ខែមករា ឆ្នាំ២០១០ ) ទុកជាបានការ។ ប៉ុន្តែចៅក្រមសាលាឧទ្ធរណ៍ បានកែប្រែត្រង់ចំនុចទណ្ឌកម្មដាក់ពន្ធនាគារលើពិរុទ្ធជន អ្នកស្រី មាស ស្រី និងលោក ព្រំ ជា ដោយត្រូវកែប្រែពីទោសជាប់ពន្ធនាគារមួយឆ្នាំម្នាក់ មកទោសជាប់ពន្ធនាគារចំនួន ៩ ខែ និង ២០ ថ្ងៃ។ រីឯទោសនៅសល់ ត្រូវព្យួរ។ ពោលគឺកសិករទាំងពីរ ត្រូវបានដោះលែងពីពន្ធនាគារ កាលពីថ្ងៃទី១៤តុលា ឆ្នាំ២០១០៕
No comments:
Post a Comment
yes